جۋرناليست كەمەلبەك ويشىباەۆ قازاقستان فۋتبولىنىڭ قازىرگى سىنى مەن شىنىن ءسوز ەتىپ، جەلىدە ەلەڭ ەتكىزەرلىك جازبا قالدىردى. اۆتور ۇلتتىق تەڭبىل دوپ تارلاندارىنىڭ تىنىسى تارىلعانىنا الاڭداپ، تورەشىلەردىڭ وعاش قىلىعىنا شاعىمدانادى. بۇل جايلى "ادىرنا" ۇلتتىق پورتالى حابارلايدى.
- قازاقستاننىڭ فۋتبولى ابدەن ءشىرىپ، بولماس دەڭگەيگە جەتتى. فۋتبولدى باسقاراتىن بارمەنكۋلوۆ باستاعان فۋنكتسيونەرلەرمەن تورەشىلەر ادىلەتسىزدىكتىڭ كوكەسىن كورسەتىپ ءجۇر. وسى ماۋسىمدا فۋتبولدىق پرينتسيپتەردەن الىس كەتكەنى انىق كورىنىپ تۇر. فۋتبولشىلاردىڭ، اسىرەسە شەتەلدىڭ لەگيونەرلەرىنىڭ قازاقستاننىڭ چەمپيوناتىنا سەنىمىن تۇگەل ولتىرگەندەي. بۇدان بىلاي، كىم ويناعىسى كەلەدى بۇل شىرىگەن، ەشقانداي سپورتتىق پرينتسيپتەردى ۇستانبايتىن چەمپيوناتتا. وتكەن ايدا چەمپيوناتتىڭ سوڭعى ويىندارىندا «اقتوبە» كلۋبىنىڭ قاقپاسىنا قالاي وتىرىك پەنالتيلەر قويىپ، ۇپايلارىن ۇرلاعانى، «استانا» كومانداسىن شاشىنان تارتىپ ءبىرىنشى ورىنعا شىعارعانىن جۇرتشىلىق ءالى اڭگىمەلەۋدە. «استانا» كلۋبىنىڭ وتىرىك چەمپيون بولعانىن بارلىعى بىلەدى، - دەپ قازاق فۋتبولىنىڭ كۇنگەي تۇسىنان كولەڭكەلى تۇسىنا قاراي تۋرا نازار سالادى.
كەيىننەن جازبا اۆتورى قازاقستان فۋتبول كوماندالارى اراسىندا وتكەن دوپ-دودالارىندا ورەسكەل جايتتاردىڭ بولعانىن جازادى.
- بۇگىن قازاقستاننىڭ فۋتبول كۋبوگىنىڭ فينالىندا «استانا ارەنا» ستاديونىندا «ورداباسى» كلۋبىمەن «اقجايىق» كوماندالارى كەزدەستى. سول ادىلەتسىزدىكتىڭ جالعاسىن كوردىك. ويىننىڭ كوسىمشا ۋاقىتى بىتەر كەزدە، سوڭىنا 4 مينۋتتاي قالعاندا تورەشى جوق جەردەن ويلاپ تاۋىپ، «اقجايىق» كلۋبىنىڭ قاقپاسىنا پەنالتي قويىپ، «ورداباسى» كومانداسىنا جەڭىس سىيلادى. وسىنداي تورەشىلەر ميلليون تەڭگەلەرگە ساتىلىپ، قازاقستاننىڭ فۋتبولىن ءشىرىتىپ كەلەدى. وسىدان كەيىن قازاقتىڭ فۋتبولىنىڭ دەڭگەيى نەگە تومەن، قازاقتار نەگە فۋتبول ويناۋ بىلمەيدى دەگەن سۇراققا جاۋاپ ىزدەپ كەرەگى جوق. كىم ادىلەتسىزدىكپەن قۇرتىپ وتىرعانى بەلگىلى، - دەدى ك. ويشىباەۆ.
وقىرماندار اۆتوردىڭ جازباسىنا قاتىستى سان قيلى پىكىر ايتى.
"تورەشىلەردىڭ وتە دورەكى قاتەلىكتەرىن مىنا جەردە جازسام، توم-توم كىتاپ بولىپ كەتەدى. كوپ ادامداردىڭ بايقاي بەرمەيتىن قاتەلىكتەرى، ءبىز سياقتى فۋتبولدا جۇرگەندەرگە قاتتى كورىنىپ تۇرادى ەكەن",
"ادىلەتسىزدىك تەك فۋتبولدا عانا ەمەس. كەيبىر جارىستاردى ۇيىمداستىرۋشىلار بارلىق وبلىستا ءوز سپورتشىلارىنا بۇرا تارتادى. مۇنداي جاعداي ەستۋىمشە بۇرىنعى كەڭەستىك رەسپۋبليكالارعا ءتان نارسە ەكەن",
"جەمقورلىق ابدەن بويلارىنا، قاندارىنا ءسىڭىپ كەتكەن عوي ، كىم بولسا، سول حالىقتى توناپ وتىرعانىن بۇتكىلى بىلەدى",
"تەك قازىرگى تاڭدا ەمەس قوي، بۇرىننان دا سول وتىرىك فۋتبولمەن اينالىسىپ كەلە جاتىر عوي. ەۋروپا باقىلاۋشىلارى قازاقستاننىڭ قۇراماسى ويناعاندا عانا كوز سالادى دا، ال ىشكى چەمپيوناتقا كوڭىل بولمەيدى. ولار جانكۇيەرلەردەن شاعىم تۇسسە، سول فۋتبول ويىنىن ساراپتاما جاساپ ۇكىم شىعارادى. سوسىن الگى ادىلقازى جۇيەلەرىن بىتىراتىپ جىبەرۋ ولاردىڭ قولىنان كەلەدى. نەگىزىندە قازاقستاننىڭ فۋتبولى وتپەن ويناپ ءجۇر" دەپ جازدى وقىرماندار."ادىرنا" ۇلتتىق پورتالى
