اقتوبە وبلىسى مارتوك اۋدانىنىڭ شارۋا قوجالىعىندا ماس تراكتور جۇرگىزۋشىسى جەردە جاتقان ايەلدى ەكى رەت باسىپ وتكەن، دەپ حابارلايدى "ادىرنا" ۇلتتىق پورتالى دياپازونعا سىلتەمە جاساپ.
37 جاستاعى اۋدان تۇرعىنى اششى سۋعا تويىپ، تراكتوردى تىزگىندەگەن.
ورتالىققا كەلگەن قولونەرشى مەن ونىڭ جانىندا ايەل ازىق-تۇلىك الۋعا كەلگەن. قايتار جولدا كولىكتىڭ كابيناسىندا ەكەۋى بىرگە ىشىمدىك ءىشىپ، كيكىلجىڭگە كەلگەن.
ۇرىسىپ قالعان ايەل ادام تراكتوردان ءتۇسىپ، تەحنيكاعا جاقىن جەرگە جاتىپ الادى. ال تراكتور جۇرگىزۋىشىسى ونى اينالىپ ءوتۋ ءۇشىن ارتقا جۇرۋگە ارەكەت جاسايدى. الايدا ازامات قوزعالىس قورابىن دۇرىس ەمەس باعىتقا سالىپ، ايەلدى باسىپ كەتەدى.
ماس جۇرگىزۋشى وسى ارەكەتىنەن كەيىندە جىلدامدىقتى قوسىپ جەردە جاتقان ايەلدى ەكىنشى رەت باسىپ وتەدى.
اۋىر سالماقتان ايەلدىڭ قابىرعاسى سىنىپ، باۋىرىنىڭ ىشىنە قان كەتكەن.
تەرگەپ-تەكسەرۋ ناتيجەسىندە قولونەرشىنىڭ كولىك جۇرگىزۋگە مۇلدەم قۇقىعى جوق ەكەنى انىقتالعان. 37 جاستاعى ازامات 2021 جىلى جەتى جىلعا جۇرگىزۋشى كۋالىگىنەن ايىرىلىپتى.
وسى ارەكەتىنەن كەيىن جۇرگىزۋشى 6 جىلعا باس بوستاندىعىنان ايىرىلدى.
