اقتوبە وبلىستىق سوتىنىڭ اپەللياتسيالىق القاسى 60 جاستاعى جىلقىشى راحات سارسەنوۆكە قاتىستى ۇكىمدى وزگەرتىپ، ونى سوت زالىنان بوساتتى، دەپ حابارلايدى "ادىرنا" ءتىلشىسى.
بۇعان دەيىن ول 100 باس جىلقىنى جىمقىردى دەگەن ايىپپەن 7 جىلعا باس بوستاندىعىنان ايىرىلعان.
سوتتا ۇسىنىلعان قوسىمشا دالەلدەر ناتيجەسىندە 100 ەمەس، ءبىر عانا جىلقىنىڭ جوعالعانى انىقتالدى. وسىعان بايلانىستى سوت ونىڭ ارەكەتىن قازاقستان رەسپۋبليكاسى قىلمىستىق كودەكسىنىڭ 189-بابى 4-بولىگىنىڭ 2-تارماعىنان 189-باپتىڭ 1-بولىگىنە قايتا سارالادى.
اپەللياتسيالىق سوت راحات سارسەنوۆكە 6 اي مەرزىمگە باس بوستاندىعىن شەكتەۋ جازاسىن تاعايىنداپ، راقىمشىلىق تۋرالى زاڭعا سايكەس بۇل مەرزىمدى 3 ايعا دەيىن قىسقارتتى. قاماۋدا بولعان ۋاقىتى ەسەپكە الىنعاندىقتان، جازا وتەلگەن دەپ تانىلىپ، ول سوت زالىنان دەرەۋ بوساتىلدى.
سونداي-اق سوت ماتەريالدىق شىعىن كولەمىن 30 ميلليون تەڭگەدەن 600 مىڭ تەڭگەگە دەيىن ازايتتى.
قورعاۋشىنىڭ مالىمەتىنشە، راحات سارسەنوۆ 1993 جىلدان بەرى جىلقىشى بولىپ ەڭبەك ەتكەن. ايىپتاۋ تاراپى باستاپقىدا وعان 100 باس جىلقىنىڭ جوعالۋىنا قاتىستى ايىپ تاققانىمەن، اپەللياتسيالىق ساتىدا ۇسىنىلعان قوسىمشا دالەلدەر بۇل مالىمەتتىڭ راستالماعانىن كورسەتتى.
ەسكە سالايىق، العاشقى ينستانتسيا سوتى ونى 100 جىلقىنى جىمقىردى دەپ تانىپ، 7 جىلعا باس بوستاندىعىنان ايىرعان.
