Şymkent qalasynda köpqabatty tūrǧyn üilerdıŋ tehnikalyq jaǧdaiyn jaqsartu, injenerlık infraqūrylymdy jaŋǧyrtu jäne tūrǧyndardyŋ qauıpsızdıgın qamtamasyz etu baǧytyndaǧy jūmystar kezeŋ-kezeŋımen jüzege asyryluda. Biyl tūrǧyn üi qoryn kürdelı jöndeuden ötkızuge jäne ortaq paidalanylatyn nysandardy jaŋartuǧa basymdyq berılgen.
2026 jyly qaladaǧy 31 tūrǧyn üidı kürdelı jöndeuden ötkızuge 2,7 mlrd teŋge bölındı. Qazırgı uaqytta onyŋ 23-ınde qūrylys jūmystary tolyq aiaqtalǧan. Qalǧan nysandardaǧy jöndeu jūmystaryn jyl soŋyna deiın aiaqtau josparlanyp otyr.
Aldaǧy jylǧa arnalǧan daiyndyq jūmystary da bastalǧan. 2027 jyly 28 tūrǧyn üidegı 41 liftını auystyru jäne 31 köpqabatty üige kürdelı jöndeu jürgızu üşın jobalyq-smetalyq qūjattama äzırleu közdelgen. Sonymen qatar jūmys ısteitın jastar baǧdarlamasy boiynşa bosatylǧan 639 päterdı jöndeuge biudjettık ötınım ūsynyluda.
Qala kelbetın jaqsartu maqsatynda köpqabatty tūrǧyn üilerdıŋ qasbetterın jaŋartu mäselesı de qolǧa alynǧan. Osy baǧytta bıryŋǧai säulettık kelbet tūjyrymdamasy äzırlenıp, tiıstı jūmystardy 2027 jyly bastau josparlanyp otyr. Būl bastama tūrǧyn üilerdıŋ syrtqy körınısın bırızdendırıp, qalalyq ortanyŋ estetikalyq sapasyn arttyruǧa baǧyttalǧan.
Tūrǧyn üi qoryn tiımdı basqaru da maŋyzdy baǧyttardyŋ bırı. Qazırgı taŋda Şymkentte 2 595 köpqabatty tūrǧyn üi tırkelgen. Onyŋ ışınde 139 üide mülık ielerı bırlestıgı jūmys ısteidı. Al 1 247 tūrǧyn üide tıkelei bırlesıp basqaru täsılı taŋdalyp, basqaruşy kompaniialarmen kelısımşart jasalǧan. Mūndai basqaru tetıkterı tūrǧyndardyŋ ortaq mülkın kütıp ūstau jäne üidı paidalanu mäselelerın jüielı ūiymdastyruǧa mümkındık beredı.
Köpqabatty üilerdıŋ tehnikalyq qauıpsızdıgıne de erekşe köŋıl bölınude. Qalada bügınde 1 748 lift, 218 eskalator jäne 14 travolator paidalanylyp keledı. Olardyŋ qauıpsız ärı talapqa sai jūmys ısteuı tūraqty baqylauda. Tūrǧyndardyŋ ötınışterı negızınde basqaruşy ūiymdardyŋ qyzmetıne de tekseruler jürgızılıp, anyqtalǧan mäseleler boiynşa tiıstı şaralar qabyldanuda.
İnjenerlık qauıpsızdıktıŋ maŋyzdy bölıgı sanalatyn gaz jabdyqtaryn paidalanu mäselesı de nazardan tys qalǧan joq. Jyl basynan berı «Şymkent qalalyq gaz tehnikalyq qyzmetı» mekemesınıŋ mamandary 158 077 üidı aralap, tūrǧyndarǧa gaz qūrylǧylaryn dūrys paidalanu, qauıpsızdık talaptaryn saqtau jäne jabdyqtardy uaqtyly tekseru jönınde tüsındıru jūmystaryn jürgızgen. Tekseru kezınde adam ömırıne qauıp töndıruı mümkın aqauy bar 134 abonent anyqtalyp, tiıstı qauıpsızdık şaralary qabyldandy. Qazırgı taŋda atalǧan nysandardaǧy barlyq aqaular tolyq joiylǧan.
Tūrǧyn üi qoryn jaŋǧyrtu men qauıpsızdıktı qamtamasyz etu jūmystarynyŋ özara bailanysy zor. Sebebı köpqabatty üilerdıŋ sapaly jöndeluı, liftılerdıŋ jaŋartyluy jäne injenerlık jüielerdıŋ talapqa sai jūmys ısteuı tūrǧyndardyŋ kündelıktı ömırıne tıkelei äser etedı.
Osy baǧyttaǧy jūmystar aldaǧy uaqytta da jalǧasyp, tūrǧyn üilerdıŋ tehnikalyq jaǧdaiyn jaqsartu, basqaru jüiesın jetıldıru jäne qauıpsızdık talaptaryn saqtau mäselelerı tūraqty baqylauda bolady.
