J.Täşenev atyndaǧy universitette ǧalymdar, zaŋgerler men studentter bas qosyp, Memleket basşysynyŋ «Qazaqstannyŋ jaŋa tarihi kezeŋdegı özektı mındetterı» atty Joldauynyŋ negızgı baǧyttary jönınde oilaryn ortaǧa saldy.
Kezdesudıŋ basty maqsaty – Prezident bastamalarynyŋ elımızdıŋ äleumettık-ekonomikalyq jäne qoǧamdyq-saiasi ömırıne yqpalyn zerdeleu, sondai-aq otandyq ǧylym men joǧary bılım berudı damytudyŋ jaŋa baǧyttaryn aiqyndau boldy.
Universitet rektory, zaŋ ǧylymdarynyŋ kandidaty Janar Rysbekova Memleket basşysy kötergen bastamalar aiasynda joǧary bılım berudıŋ strategiialyq basymdyqtary turaly baiandama jasady.
– «Prezident Joldauynyŋ basty ideiasy – Qazaqstan jaŋa tehnologiialardy tūtynuşy ǧana emes, bılım men ǧylymnyŋ kömegımen olardy özı jasaityn elge ainaluy kerek. Memleket basşysy bolaşaq ūrpaqqa bılımge negızdelgen, quatty ärı joǧary tehnologiialy Qazaqstandy qaldyru qajettıgın atap öttı. Sondai-aq jasandy intellekt negızınde sifrlyq ekonomikany qalyptastyrudy jalpyūlttyq mındet retınde belgıledı.
Joldauda ǧylymdy, öndırıstı, logistikany jäne tehnologiialyq käsıpkerlıktı bırıktıretın öŋırlık ekojüieler qūru qajettıgı naqty aitylǧan. Bügınde zerthanada düniege kelgen ǧylymi ideia ekonomikaǧa engızıletın daiyn önımge ainaluy tiıs. Prezident Joldauy joǧary bılım men ǧylym salasyna jaŋa mındettermen qatar, tyŋ mümkındıkter de ūsynyp otyr, – dedı universitet rektory.
Jiynǧa qatysuşylar zaŋ üstemdıgın qamtamasyz etu jäne «Zaŋ men tärtıp» qaǧidatyn ädılettı qoǧamnyŋ negızı retınde ıs jüzınde ornyqtyru mäselelerın de jan-jaqty talqylady. Sonymen qatar, Konstitusiialyq negızderdı nyǧaitu jäne qoǧamdyq kelısımdı saqtau taqyryptary qozǧaldy.
Talqylaudyŋ maŋyzdy bölıgı Qazaqstan Respublikasy Täuelsızdıgınıŋ 35 jyldyǧyna arnaldy. Spikerler men qonaqtar elımızdıŋ tarihi damu joly, ūlttyq qūndylyqtardy saqtau, azamattyq jauapkerşılık pen qazırgı kezeŋdegı qoǧam bırlıgın nyǧaitu mäselelerı jönınde pıkır almasty.
Diskussiiaǧa universitet basşylyǧy, oqytuşylar, sarapşylar, zaŋgerler qauymdastyǧynyŋ ökılderı, qoǧam belsendılerı men jurnalister qatysty.
Ūiymdastyruşylardyŋ aituynşa, mūndai aşyq pıkır almasu alǧa qoiylǧan mındetterdıŋ mänın tereŋırek tüsınuge, sarapşylar men qoǧam arasyndaǧy dialogty nyǧaituǧa jäne jastardyŋ Qazaqstannyŋ qoǧamdyq-saiasi ömırıne degen qyzyǧuşylyǧyn arttyruǧa mümkındık berdı.
