Şymkent qalasynyŋ Tūran audanynda injenerlık infraqūrylymdy jaŋǧyrtu, jol sapasyn jaqsartu jäne tūrǧyndarǧa qolaily orta qalyptastyru baǧytynda keşendı jūmystar jürgızılude. Audan äkımı B. Äzımberdievtıŋ mälımetınşe, 2026 jyly auyz su, elektr energiiasy, gaz, kärız jüiesı jäne abattandyru salalarynda bırqatar joba jüzege asyrylǧan.
Qazırgı taŋda Tūran audanynyŋ aumaǧy 36 300 gektardy qūraidy. Mūnda 22 şaǧyn audan, 39 357 jeke tūrǧyn üi men 548 köpqabatty üi ornalasqan. Jalpy tūrǧyndar sany – 232 708 adam. Audan aumaǧynda 1 229 köşe men 293 äleumettık nysan bar.
İnjenerlık infraqūrylym boiynşa barlyq 22 şaǧyn audan sapaly auyz sumen jäne elektr energiiasymen tolyq qamtylǧan. Qūrsai şaǧyn audanynda su jüiesın tartu jūmystary kezeŋ-kezeŋımen jürgızılude. Bırınşı kezeŋ aiaqtalyp, paidalanuǧa berılse, ekınşı kezeŋdı jyl soŋyna deiın aiaqtau josparlanǧan. Sonymen qatar biyl audanda 12 jaŋa transformatorlyq stansiia ornatyldy.
Tabiǧi gazben qamtu deŋgeiı 85,7 paiyzdy qūrap, 19 şaǧyn audan kögıldır otyn paidalanyp otyr. Qūrsai men Jaŋatalaptyŋ jekelegen aumaqtaryn gazdandyru 2026–2027 jyldarǧa josparlanǧan. Al Aiköl şaǧyn audanynda jobalyq qūjattama äzırleu jūmystary kelesı jyly jürgızıledı. Kärız jüiesımen 13 şaǧyn audan qamtylǧan. Qazırgı uaqytta ortalyq aumaqtaǧy jäne Qorǧasyn şaǧyn audanyndaǧy 14 köşede kärız jelılerınıŋ qūrylysy bastaldy.
Köşe infraqūrylymyn jaqsartu baǧytynda biyl 68 köşede jöndeu jūmystary jürgızıldı. Onyŋ 66-sy ortaşa jöndeuden ötıp, ekı köşege jaŋa asfalt töseldı. Būǧan deiın 2025 jyly 251 köşede 112,3 şaqyrym jol jaŋartylǧan bolatyn.
Tūrǧyndardyŋ qauıpsız qozǧalysyn qamtamasyz etu üşın irrigasiialyq jüieler men aiaqjoldar salynuda. Bügınde 203 köşede 134,5 şaqyrym irrigasiialyq jüie bar. Biyl 28 köşede 16,1 şaqyrym su būru jüiesınıŋ qūrylysy aiaqtaldy. Sondai-aq 36 köşede aiaqjol salu jūmystary jürgızılıp, paidalanuǧa berıldı.
Abattandyru aiasynda köşelerdı jaryqtandyru jäne qoǧamdyq demalys oryndaryn köbeituge köŋıl bölıngen. Qazırgı uaqytta «Tūran» kommunaldyq mekemesı 1 098 köşege, al «Abm-Building 2007» JŞS 131 köşege qyzmet körsetedı. Jyl soŋyna deiın 42 auladaǧy köşeler men ötkelderge qosymşa 93 jaryqşam ornatu josparlanǧan.
Sonymen qatar audannyŋ jetı aumaǧynda ämbebap demalys oryndary men gülzarlar salu közdelgen. Biyl Rysqūlov pen Adyrbekov, Rysqūlov pen Baitūrsynov köşelerınıŋ qiylysynda subūrqaqtar ornatyldy. Abai jäne Metallurg saiabaqtarynda şahmat klubtary aşyldy.
Qoǧamdyq qauıpsızdıktı nyǧaitu maqsatynda sifrlyq baqylau jüielerı de jetıldırılude. 2025 jyly köşeler men aulalarǧa 282 beinebaqylau kamerasy ornatylǧan. Biyl qosymşa kameralar ornatu jūmystary jürgızılıp, üş mekteptıŋ aumaǧyna qūqyq būzuşylyqtardyŋ aldyn aluǧa arnalǧan drondar qoiyldy.
Ekologiialyq ahualdy jaqsartu baǧytyndaǧy ırı jobalardyŋ bırı – qatty qaldyqtardy öŋdeitın zamanaui keşen qūrylysy. Qūny 54 mlrd teŋgenı qūraityn jobany «Shaanxi Construction Engineering Kazakhstan Co., Ltd.» kompaniiasy 2026–2028 jyldary jüzege asyrudy josparlap otyr. Jalpy aumaǧy 12 gektar bolatyn keşende jylyna 1 000 tonnaǧa deiın qaldyq öŋdeu, 24 MVt-qa deiın elektr energiiasyn öndıru jäne kemınde 80 tūraqty jūmys ornyn aşu közdelgen.
Tūrǧyn üi infraqūrylymyn jaqsartu jūmystary da jalǧasuda. Audandaǧy 548 köpqabatty üidıŋ 503-ı ortalyq jylu jüiesıne qosylǧan, qalǧandary avtonomdy jylytu jüiesın paidalanady. Ortalyq jylu jüiesıne qosylǧan barlyq üi jylu mausymyna tolyq daiyn. Biyl tört köpqabatty üige kürdelı jöndeu jürgızılıp, taǧy bır nysanda jūmystar jalǧasuda. Sonymen qatar alty mekenjaidaǧy ǧimarattardyŋ 1 080 şarşy metr qasbetıne mural salu aiaqtaldy.
Balalar men jastarǧa arnalǧan infraqūrylym da keŋeiıp keledı. Qazırgı uaqytta audanda 419 balalar oiyn alaŋşasy jäne 121 aşyq sport alaŋşasy bar. Biyl qosymşa 19 balalar oiyn alaŋşasy men 10 keşendı sport alaŋşasynyŋ qūrylysy tolyq aiaqtalyp, paidalanuǧa berıldı.
Jalpy, Tūran audanynda injenerlık jelılerdı jaŋartu, joldardy jöndeu, tūrǧyn üi qoryn jaqsartu jäne qoǧamdyq keŋıstıkterdı damytu jūmystary jüielı türde jüzege asyryluda. Būl jobalar tūrǧyndardyŋ ömır süru sapasyn arttyryp, audannyŋ infraqūrylymdyq äleuetın nyǧaituǧa baǧyttalǧan.
