ءسىز ءۇشىن
پويىزدار جۇيتكيدى زىمىراپ،
بەيمازا كۇي كەشىپ كورگىسىز.
ىشىنەن وزىنشە تىنىپ اپ،
ءسىز دە ءبىر ويلارمەن ءجۇرمىسىز؟
ءجۇرمىسىز ءۇن-ءتۇنسىز كۇيزەلىپ،
جۇرەكتىڭ اۋەنىن سالا الماي؟
ءسىز-داعى كورىڭىز سەزىنىپ،
تاعدىر دا تەربەلىپ بارادى-اي...
نەلىكتەن كوڭىلسىز قالىپتا،
وتىرسىز جابىرقاۋ جۇزبەنەن؟
قاراڭعى ءسىز ءۇشىن جارىق پا،
ساعىنتىپ قالعان با كۇز دەگەن؟
سىر تۇنعان الەمگە قۇمارتار،
كۇتتىرىپ قويدى ما سارى دالا؟
مۇڭ شالعان كوڭىلدى جۇباتار،
ءسىز ءۇشىن اق جاۋىن عانا ما؟
جول ۇزاق.
كورەسىز جالعاسىن
اۋىردى، جەڭىلدى ارقالاپ.
ءسىز ءۇشىن ۇمىت بوپ قالماسىن،
كوز جەتپەس قيىرلار... شارتاراپ.
اق تاڭدار
ارايلاپ اتقان اق تاڭدار –
جۇرەككە ساۋلە جاققاندار!
ءۇمىت پەن سەنىم وياتىپ،
كۇنباتىس جاققا باتپاڭدار!
سەندەرمەن بىرگە ويانام،
ساۋلەڭە سەنىڭ تويا المان.
مەزگىلدىڭ جىلدام وتكەنىن
بىلگىزدى ماعان وي-ارمان.
قۋانام اق تاڭ اتقاندا،
ۇيقىدان تۇرىپ جاتقاندا.
عاجايىپ اسەم دۇنيە
شۇعىلا – كوزىن اشقاندا.
ايدانا بەيسەن،
ءال-فارابي اتىنداعى قازۇۋ
فيلولوگيا جانە الەم تىلدەرى
فاكۋلتەتى ستۋدەنتى، «ۋاقىت جانە
كەڭىستىك» اتتى ولەڭدەر جيناعىنىڭ اۆتورى
