الەۋمەتتىك جەلىدە الماتىداعى №71 مەكتەپ-ليتسەي ديرەكتورى قىزمەتىنەن زاڭسىز الىندى دەگەن اقپارات تاراعان ەدى. الماتى قالاسىنىڭ ءبىلىم باسقارماسى اتالعان جازبانىڭ قاساقانا ۇيىمداستىرىلعانىن ايتىپ، ارنايى مالىمدەمە جاسادى.
باسقارمانىڭ حابارلاۋىنشا, №71 مەكتەپ-ليتسەي ديرەكتورى كۋليك س.ن. ەسىمدى ايەل زاڭدى نەگىزدە قىزمەتىنەن الىنعان. الماتى قالاسىنىڭ سىبايلاس جەمقورلىققا قارسى قىزمەتى كۋليك س.ن. ۇستىنەن قر قك 189 بابى، 3-ب. ء(وزىنىڭ قىزمەت بابىن پايدالانا وتىرىپ، سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋ) بويىنشا ءىس قوزعالعان.
تەرگەۋ بارىسىندا انىقتالعانداي، №71 مەكتەپ-ليتسەي ديرەكتورى س.ن.كۋليك 2017 جىلدىڭ 1 قىركۇيەگىنەن باستاپ 2019 جىلدىڭ 31 جەلتوقسانىنا دەيىن جوق مۇعالىمدى جۇمىسقا قابىلداۋ ارقىلى قالاداعى بانكوماتتاردان 3 155 000 تەڭگە اقشانى زاڭسىز العان. سويتە تۇرا، اتالعان كەزەڭدە "جۇمىسقا قابىلدانعان" مۇعالىمنىڭ قازاقستاندا جۇمىس ىستەۋى مۇمكىن ەمەس بولعان. ول كىسى قازاقستان اۋماعىندا دا بولماعان، تۇراقتى تۇردە شەتەلدە تۇراتىن ادام ەكەن.
قازىرگى كەزدە كۋليك س.ن. ءوز كىناسىن مويىنداپ، جاساعان قىلمىسى ءۇشىن قاتتى وكىنەتىنىن ايتىپ وتىر.
الماتى قالاسىنىڭ ءبىلىم بەرۋ باسقارماسى الماتى قالاسىنىڭ سىبايلاس جەمقورلىققا قارسى قىزمەتىنىڭ ۇسىنىسىمەن ديرەكتورعا قاتىستى ازىرگە ەڭبەك كەلىسىمشارتىن ءۇزۋ تۇرىندەگى تارتىپتىك جازا قولدانۋ كەرەك دەپ شەشتى.
"ادىرنا" ۇلتتىق پورتالى
