الماس سەرىكۇلى: دەپۋتاتتىقتان ترەنەرلىگى ارتىق ەدى

3707
Adyrna.kz Telegram

كەشەلى بەرى قازاق ەلى قينالىپ، قارالى بولىپ وتىرعاندا، ساياسات ساحناسىنا شىعام دەگەن اعامىزدىڭ تراگي كومەديا قويعانى وتە ورىنسىز بولدى. جالپى، مۇنداي حايپتى ويناتۋ مەن جىبەرۋدىڭ ورنى بولادى. "ويىن بىلمەگەن بالا... "دەيدى قازاق. ءتىپتى بولماي بارا جاتسا  ەرتەڭ قويسا دا ەشتەڭە ەتپەس ەدى... ارينە، قازاققا ءوز ۇلدارىنان ارتىق ەشكىم جوق.
جۇرتىمىز بەيسەن قۇرانبەك اعانىڭ قازاسىنا قابىرعاسى قايىسىپ وتىرعاندا، مىنا جاقتان "مەنى بەلگىسىز بىرەۋ ۇستاپ كەتتى" دەپ دۇرلىكتىرۋ، ءىزىن الا "بۇل ءجاي قويىلىم ەدى "دەگەنى ونشا ۇتىمدى بولمادى. ونى ەندى وزدەرى بىلەر. ماعان ەش ۇناعان جوق.

حالىقپەن ساياسات ساحناسىنا شىقپاي تۇرىپ ويناعان ادام – مەجەلى جەرگە بارعاننان كەيىن ودان دا سوراقى ويىن كورسەتە الادى. زەلەنسكي پرەزيدەنت اككى اكتەر ەدى، سول اكتەرلىعى ونى بيىككە كوتەردى. ول قازىر ساحنادا ويناماسا دا، حالقىنا كەرەك ادامداردان كوماندا قۇرىپ، ءوز الدىنا جۇمىس ىستەپ جاتىر. ۋكرايناعا باقىت اكەلسىن.

كەشەگى قويىلىمنان ءبىر كۇن بۇرىن تىكەلەي ەفيرگە شىعىپ، ءوزى سياقتى وپپوزيتسيامىز دەگەندەردەن ارانداتۋشىلىققا تاپ بولدى. مەن ول سۇحباتتان جاڭا ۇمىتكەردىڭ ساياساتقا اكەلگەن باعدارلاماسىن سۇراي ما، وسى بۇگىنگى كۇنگى باتىپ بارا جاتقان باتپاقتان قالاي شىعامىز دەگەن ورىندى ساۋالدار كۇتكەم. سويتسەم، قازاقتىڭ قازىرگى باتپاققا كەتىپ بارا جاتقان جۇگىن ولار سۋعا تارتقانداي اسەر قالدىردى.

احمەت اعانىكى تەك امبيتسيا سياقتى كورىندى. اعامىزدىڭ وسى ۋاقىتقا دەيىن كوتەرگەن جۇمىسىنىڭ ەڭ تابىستى دا، ەلگە پايدالىسى دا – بيزنەس ترەنەرلىگى بولدى. سول ءىستى ءارى دامىتا بەرۋ كەرەك-اۋ. ايماقتارداعى 20 فيليال، پارلامەنتتەن تيەتىن 20 دەپۋتاتتىق مانداتتان ارتىق بولار ەدى.

بۇكىل قازاققا ءۇي الىپ بەرۋگە جاعداي جاسايمىن دەگەنى ماعان ۋتوپيا، ميراج بولىپ كورىنەدى. ويتكەنى، ءۇي الماي-اق، سول قارجىنى بيزنەسكە سالىپ، امەريكاندىقتارشا، ەۋروپالىقتارشا ءومىر سۇرەم دەگەن جاستار بار.
سونىمەن قاتار، تۇبىندە ءۇي الاسىڭ عوي. باستىسى ەڭبەگىڭە قاراي اقىسى، تاپقانىڭا قاراي قۇنى بولسا، قايىرلىسى سول.

مەنى تاعى ءبىر ويلاندىراتىن ماسەلە - بيلىككە كەگى كەتكەن، بيزنەسىن تارتىپ العان، بيلىگى بارلار بيزنەسىمدى الىپ قويدى دەگەندەر وسى كۇنى، حالىققا ۇگىت ايتىپ، الاڭعا شاقىرىپ، پارتيا قۇرۋعا، جاستارمەن ەتەنە جاقىن بولۋعا تىرىسىپ جاتىر. مۇحتار ءابليازوۆ، مارعۇلان سەيسەمباي، احمەتبەك نۇرسيلا اعالارىمىزعا كەزىندە اۋمەسەرلەردىڭ قولىمەن بيزەسىن تارتىپ العانى جايلى ءجيى اشىق ايتىلا باستادى.
ويىم دۇرىس ەمەس شىعار، كەلىسپەسەڭىز دە بولادى. بىراق، قولعا تىزگىن تيگەن كۇنى بۇل ەشقانداي حالىقتىكى نە مەملەكەتتىكى ەمەس، مەنىڭ ماڭداي تەرىم دەپ، ەسەبىن تۇگەندەۋى ءۇشىن تىرلىك قىلۋى مۇمكىن. ادام يدەال بولمايدى، ءبىرى بولماسا بىرىنەن سول شىعارىن سەزەمىن. ال كەشەگى دۆك-دانمىن دەگەن وپپوزيتسيونەردىڭ قازىرگى بيلىككە ءىلىنىستىرىپ وتىرعان سۇراقتارى ول كىسىلەردىڭ ىشتارلىعىن كورسەتەدى.
اقاڭ ماعان 30% جەتەدى دەپ تۋراسىن ايتتى. ار جاعىنداعى 70%-دىڭ دۆك قالاعانىن السا بولادى. ولارعا دا 30-40 % جەتەر. قالعان پارتيالار بار. ءبىرىن-ءبىرى شالىپ، ءالى بارماعان پارتيانى ءبىر-بىرىنەن قىزعانۋى، دۆك-دا ەمەستىڭ ءبارىن "نۇربوتسىڭ" دەپ ايىپتاۋ – ەش ۇشپاققا شىعارمايدى.
وسى جازبا ءۇشىن مەن دە نۇربوت بولۋىم مۇمكىن. ولار تۋرالى ءبىر اۋىز ماقتاۋ جازباسام دا! وپپوزيتسياشىل بولساڭ، اشىق پىكىر مەن سىندى كوتەرە الۋىڭ كەرەك. كوتەرە الماساڭ ساعان دەيىنگىلەردەن ايىرماشىلىعىڭ جوق.

جوعارىدا اتالعان كىسىلەرمەن جەكە قىساستىعىم، بولماسا ارازدىعىم جوق. بىراق ەلدىڭ بولاشاعى ءۇشىن ءجۇرمىز دەيتىن اعالاردىڭ  بارىنە ايتاتىنىم وسى.

الماس سەرىكۇلى

پىكىرلەر