پاۆلوداردا مالدار ميتينگىگە شىقتى (ۆيدەو)

پاۆلودار وبلىسىندا اقسۋ قالاسىنا قاراستى قالقامان كەنتىنىڭ تۇرعىندارى مالدى تاڭعى ورىسكە ەمەس، تۋرا اكىم كەڭسەسىنىڭ الدىنا ايداپ اپاردى. جايىلىمنان جۇتاعان جۇرتتىڭ باسقا امالى جوق ەكەنىن ايتادى تۇرعىندار. سويتسە، اۋىل اكىمى تالاي جىلدان بەرگى جايىلىم جەردى جەكە مەنشىككە جالعا بەرىپ جىبەرگەن. قالقامان كەنتى تۇرعىندارى بۇگىن قوتانداعى مالدى ورىسكە ەمەس، اكىم كەڭسەسىنە ايداپ كەلدى. كوك شىققالى ءبىر ايدان اسسا دا، كوتەرىلمەگەن زەڭگى بابا تۇقىمى وسى ماڭداعى كوكتى بىردەن جاپىرىپ جىبەردى. مالدىڭ جەلىنى تارتىلىپ قالعانى جايىلىمنىڭ جوقتىعىنان عانا ەمەس. اۋىلدان قول سوزىم جەرگە كوكونىس سالىپ تاستاعان فەرمەر القاپتاردى سۋارۋ ءۇشىن شاعىن توعاندى دا مەنشىگىنە قاراتىپ العان. بۇل جەردە جەر استى سۋىنىڭ كوزى بار. امالى تاۋسىلعان تۇرعىندار تەمىر جول مەن تاس جولدىڭ ورتاسىنداعى الاقانداي اۋماققا مال جايۋعا ءماجبۇر. بۇعان جەتۋ ءۇشىن دە بىرنەشە شاقىرىم جول جۇرك كەرەك. سونىڭ وزىندە بۇل اۋماق مالعا دا، جانعا دا قاۋىپتى بولىپ تۇر.