ەكى پوليتسەيدى قاعىپ ولتىرگەن ازات ازاماتوۆتىڭ اكەسى تالعان مۇقاشەۆ قازا تاپقانداردىڭ وتباسىنا كوڭىل ايتتى.
ول "31 ارناعا" بەرگەن سۇحباتىندا ۇلى جول اپاتى بولعان كەزدە پوليتسيادا قىزمەت ەتىپ جۇرگەنىن ايتتى. وعان قوسا مامىر ايىندا اعا لەيتەنانت شەنىن العان.
"ولار اقىلعا سىيمايتىن مالىمەتتەردى ايتىپ جاتىر. ول جۇمىسىن دۇرىس اتقارماسا، وعان نە ءۇشىن العىس حات بەرىپ، اعا لەيتەنانت شەنىن بەرەدى؟ ۇلىمدى ناشار جۇمىس ىستەدى، القاش دەپ ايىپتاپ جاتىر. وعان وسىنداي ايىپتار تاعىلىپ جاتسا، باسشىلىق قايدا قارادى؟ ىشەتىن ادامعا نەگە ىشكى ىستەر ورگاندارىندا جۇمىس ىستەۋگە رۇقسات بەرەدى؟", - دەيدى پوليتسەيدىڭ اكەسى.
اكەسىنىڭ ايتۋىنشا، ۇلى سوڭعى ۋاقىتتا قاتتى شارشاپ جۇرگەن ەكەن. سەبەبى ۇزاق ۋاقىت بويى دەمالىسسىز جۇمىس ىستەيتىن كورىنەدى. ازات قايعىلى وقيعا بولاتىن كۇنى رولدە وتىرىپ ۇيىقتاپ قالعان بولۋى مۇمكىن دەيدى. سونىمەن قاتار ارىپتەستەرىن قاساقانا قاعىپ كەتتى دەگەنگە سەنبەيتىنىن ايتتى:
"كوروناۆيرۋس باستالعاننان بەرى مۇلدە دەمالعان جوق. 18-19 كۇن جۇمىس ىستەدى. جول اپاتى تاڭعى 5-تە بولعان، سول ۋاقىتتا ۇيىقتاپ قالعان بولۋى مۇمكىن دەپ ويلايمىن. ادام دەمالماي جۇمىس ىستەسە، رولدە وتىرىپ ۇيىقتاپ قالۋى مۇمكىن. ءيا، ول زاڭ بويىنشا جول اپاتى ءۇشىن جاۋاپ بەرۋى كەرەك. بىراق مەن ونىڭ ارىپتەستەرىن قاساقانا قاعىپ ءولتىردى دەگەنگە سەنبەيمىن."
