9 مامىر – جەڭىس كۇنى! ماڭگى ۇمىتىلماس كۇن!

12219
Adyrna.kz Telegram

ەستەن كەتپەس ەڭ سۇمدىق سوعىستىڭ بولىپ وتكەنىنە 75 جىل تولدى. ياعني، ۇلى جەڭىسكە 75 جىل!

ۇلى جەڭىستىڭ ۇمىتىلمايتىنى سياقتى، سوعىس تا ۇمىتىلماستاي ءىزىن قالدىردى. سول زامانىندا قانشاما جاننىڭ ءومىرىن قيدى، قانشاما جان مۇگەدەك حالگە ءتۇستى. ءتىپتى، امان-ەسەن ورالىپ كەلگەندەردىڭ ويلارىندا وت ورانعان كۇندەردىڭ ەلەسى قالدى. ماسەلەن، مەنىڭ ناعاشى اتام سۇم سوعىستان كوز جانارىنان ايىرىلىپ ورالعان ەكەن. سول سوعىستىڭ ءىزى بۇل ومىردەن وتكەنشە جوعالماعان. سونداي-اق، اتام جىل سايىن «جەڭىس كۇنىنە» ارنالعان پارادقا بارار كەزدە سۇمدىق كۇندەردى، سول كۇندەردە قاسىندا بولعان جولداستارىن ەسكە الىپ، ءار جىلعى جەڭىس كۇنىن جەڭىسكە جاڭا قول جەتكىزگەندەي ەرەكشە سەزىممەن قارسى الادى ەكەن. انام ول كەزدەرى ءسابي جۇرەگىمەن، اكەسىنىڭ سول ءبىر سەزىمدەرىنە اسا ءمان بەرمەگەن. كەيىن وسە كەلە اكەسىنىڭ اسەرلى اڭگىمەلەرىن ەستىپ، جەڭىس كۇنىنىنىڭ قانشالىقتى ەرەكشە كۇن ەكەندىگىن تۇسىنگەن. ەندى انام سول اكەسىنىڭ اڭگىمەسىنەن ۇققانىن، سەزىنىپ-تۇسىنگەنىن بۇگىندە بىزدەرگە اڭگىمەلەپ وتىرادى. مەنىڭ ويىمشا، بۇگىنگى جاستاردىڭ ارقايسىسىنىڭ اتا-اجەلەرىنەن ەستەلىككە قالعان «جەڭىس كۇنى» تۋرالى ەرەشكە ۇعىمدارى بار. ەندەشە، بۇگىنگى بەيبىت كۇنىمىز ءۇشىن ءبىز ولارعا ماڭگى قارىزدارمىز دەپ ويلايمىن.

جەڭىس كۇنى – بۇل سان مىڭداعان ۇرپاق ءۇشىن ورتاق مەرەكە. بۇل مەرەكە – بەيبىتشىلىكتىڭ جانە قايىرىمدىلىقتىڭ ماڭگى جاسامپازدىعىن دالەلدەيتىن، وتانىن قورعاعان جاۋىنگەرلەر مەن وفيتسەرلەردىڭ ايبىنىن، جەڭىستى جاقىنداتقان تىل ەڭبەككەرلەرىنىڭ ماڭگى وشپەيتىندىگىن دالەلدەيتىن بەلگى بولىپ قالماق.

سول ءبىر سۇراپىل جىلدارى قازاق حالقى ءوزىنىڭ وتانىنا، جەرىنە دەگەن پەرزەنتتىك پارىزدارىن، ۇلتتىق ماقتانىشتارىن دالەلدەدى. 

ءبىزدىڭ اتا-اجەلەرىمىزدىڭ ەرلىكتەرى مەن جانقيارلىقتارى، ولاردىڭ ءوز وتانىنا دەگەن شەكسىز سۇيىسپەنشىلىكتەرى قازاقستاننىڭ بۇگىنگى ۇرپاعى ءۇشىن ماقتان تۇتارلىق ۇلگى عانا ەمەس، بۇل – بىرنەشە ۇرپاقتى بايلانىستىراتىن قوعامنىڭ رۋحاني دامۋى مەن ۇلتتىق قايتا ورلەۋىنىڭ جوعارى ادامگەرشىلىك نەگىزى دەپ ويلايمىن.

  جەڭىس كۇنى – ابىروي مەن داڭقىمىزدىڭ مەرەكەسى. تاباندىلىق پەن ەرلىك، وتانعا دەگەن سۇيىسپەنشىلىك سۇم سوعىستا جەڭىسكە جەتكىزدى.

9 مامىر – مەرەكە عانا ەمەس، بۇل حالىقتىڭ باتىرلىعى، بۇل جانكەشتىلىكپەن جەڭىسكە جەتۋ جولىنداعى ەرەن ەڭبەك. 

ءبىزدىڭ ازاماتتىق پارىزىمىز – بۇل كۇندى ماڭگىلىك ەستە ساقتاۋ، وتاندى ءسۇيۋ، ەلدىڭ، جەردىڭ ادال پەرزەنتى بولۋ. 

 

وزبەكوۆ داۋلەت جانبولاتۇلى

الماتى قالاسى

 

پىكىرلەر