"ەرتىس" فۋتبول كلۋبى قارجى تاپشىلىعىنا بايلانىستى قازاقستان چەمپيوناتىنا قاتىسۋدان باس تارتتى.
"كلۋب جينالىس وتكىزدى. وندا وسى جىلدىڭ قاڭتار ايىندا قابىلدانعان قارجىلىق مىندەتتەمەلەردى ورىنداۋ مۇمكىن ەمەس ەكەنى ايتىلدى. كوماندانىڭ باس دەمەۋشىسى بۇل جوبانى قارجىلاندىرمايدى. ءبىز دە ءتيىستى قارجىنى تولەي المايمىز. ال قارىز كۇن سايىن جينالىپ جاتىر. سوندىقتان ءبىز جاعدايدى ءتۇسىنىپ، چەمپيوناتقا قاتىسپايتىن بولدىق", - دەيدى پاۆلودار وبلىسى تۋريزم جانە سپورتتى دامىتۋ باسقارماسىنىڭ باسشىسى مارات ايداشەۆ.
چەمپيوناتقا قاتىسپاۋدىڭ باستى سەبەبى - لەگيونەرلەردىڭ كەلىسىم شارتتارىن تولەۋگە قاراجاتتىڭ جەتىسپەۋى. كلۋبتى قارجىلاندىرۋعا 1,8 ميلليارد تەڭگە، دەمەۋشى ەسەبىنەن 1,6 ميلليارد جوسپارلانعان ەكەن.
"جىل باسىنان بەرى دەمەۋشىلەر 200 ميلليون تەڭگە ءبولدى. ولاردا بۇدان ارتىق اقشا جوق. بيۋدجەتتەن 183 ميلليون تەڭگە تولەندى. قالعان 1,6 ميلليارد تەڭگە اقسۋ، ەكىباستۇز فۋتبول كلۋبى ورتالىقتارىنا بەرىلەدى. ولار قازاقستان چەمپيوناتىنا قاتىسادى" - دەدى ايداشەۆ.
ونىڭ ايتۋىنشا، "ەرتىس" فۋتبولشىلارىنا بىرنەشە رەت ۇسىنىس جاسالىپتى.
ء"بىز كوماندالاردى لەگيونەرلەرسىز قالدىرۋدى ۇسىندىق. ولارعا وتەماقى تولەنبەي، تەك جەرگىلىكتى ويىنشىلار قالۋى كەرەك بولاتىن. بىراق بارلىعى اقپان جانە ناۋرىز ايلارىنىڭ جارتىسىندا جينالعان قارىزدى تولەۋدى ءوتىندى. وسىلايشا، ءبىز ويىنشىلارعا بارلىق مىندەتتەمەنى ورىنداي المايتىنىمىزدى تۇسىندىردىك. ولاردى دا تۇسىنۋگە بولادى. ولار مۇندا اقشا تابۋعا كەلدى. ەندى ولار ءار ءتۇرلى ينستانتسيالارعا شاعىم تۇسىرە باستايدى. ەگەر ءبىز ويىندى جالعاستىرا بەرسەك جانە ويىنشىلارعا اقشا تولەمەسەك، شاعىم ءتۇسۋشى دە ەدى. سوتتاسامىز، جاعدايدى باقىلايمىز", - دەدى ايداشەۆ.
سونداي-اق، باسشى كلۋب بانكروتقا ۇشىرادى دەگەن اقپاراتقا جوققا شىعاردى.
"كلۋب بانكروتقا ۇشىرادى دەگەن قاۋەسەتتەر تارادى. الداعى ۋاقىتتا كلۋب بانكروتقا ۇشىرامايدى. قارجىنى ۇنەمدەيمىز. سالىقتار بويىنشا نە ىستەۋگە بولاتىنىن كورەمىز، قىلمىستىق ءىستىڭ قورىتىندىسىن كۇتەمىز", - دەپ تۇيىندەدى ءسوزىن ول.
