فەيسبۋك بەتىندە «نە شىقسا دا، ەكىباستۇزدان شىعادى!» دەگەن زاماناۋي «ناقىل» بار. ونىڭ نەدەن شىققانىن كوزى قاراقتى جۇرتتىڭ ءبىرازى جاقسى بىلەدى. «ءار زاماننىڭ تۇسىندا ءبىر سۇرقىلتاي» دەگەندەيىن، ءار اكىمنىڭ تۇسىندا ەكىباستۇزدا ءبىر سۇرقىلتاي بولىپ تۇرعانىن قايتەيىك.
اتى جامان دەرتپەن كۇرەس قىزىپ، كارانتين جاريالانعان شاقتا ەكىباستۇز قالاسى اكىمىنىڭ ءبىر ورىنباسارى شەتەل اسىپ تاڭىرقاتسا («قاۋىپتى شاقتا شەتەل اسقان قادىرباەۆا قىزمەتىنە لايىق پا؟!»), ەكىنشىسىنىڭ 42500 تەڭگەنىڭ جىرىن ءتۇسىندىرۋ ءۇشىن جۇرتتى ءبىر جەرگە جيناپ، ۆيرۋستى قولدان تاراتۋ قاۋپىن توندىرگەنىن («ەكىباستۇز ۆيرۋستى قولدان كوبەيتپەك پە؟») بۇعان دەيىن جازعانبىز.
جازۋىن جازىپ كەلەمىز عوي، بىراق وعان توقتايتىن ەكىباستۇز با؟! كۇنى كەشە حالىقارالىق بالالاردى قورعاۋ كۇنىندە دارىندى بالالاردى پاركتە جيىپ الىپ، ۆيرۋس ءورشىپ ۇرعانىنا قاراماستان، اكىم ەرجان يمانزايپوۆ ماسكاسىز (قاتىسۋشىلاردان دا ماسكا كيۋدى تالاپ ەتپەستەن) قۇتتىقتادى. ونىڭ قۇتتىقتاۋ ءماتىننىڭ قازاقشاسىن ۇمىتىپ قالىپ، ءارى قاراي ەجەلەي جونەلگەنى وتە كۇلكىلى بولدى. بۇل ماسقارا بىردەن يۋتۋب جەلىسىنە شىعىپ، ءبىر تاۋلىكتە قالىڭ ەلگە تاراپ ۇلگەردى.
ونى بىلاي قويا تۇرىڭىز، ەكىباستۇزدىقتار ەندى QNet سياقتى قيتۇرقى، ساياساتى تازا ەمەس كومپانيانى ناسيحاتتاۋعا اينالىپتى. ول تۋرالى قالانىڭ نەگىزگى رەسمي باسىلىمى – «ەكىباستۇز داۋىسى» گازەتىنىڭ فەيسبۋكتەگى رەسمي پاراقشاسىنان بىلدىك. باسىلىم قىزمەتكەرى جاريا ەتكەن اقپاراتتاعى سۋرەتتە قابىرعاداعى Qnet دەگەن جازۋ سوقىرعا تاياق ۇستاتقانداي كورىنىپ تۇر.
كەزىندە وسى Qnet-تەن ەكىباستۇزدىقتار عانا ەمەس، قازاقستاندىق تالاي ازامات الدانىپ جاپا شەككەن. كوپ ادام باسپاناسىز قالعان. الداعى ۋاقىتتا ولاردىڭ بەرگەن از-ماز سىيلىعىنا الدانعان بۇگىنگى بالالار مۇنى ماقتاۋلى، ىزگى كومپانيا ەكەن دەپ ويلاپ، كەلەشەكتە قۇرىعىنا ءتۇسۋى ابدەن ىقتيمال. ويتكەنى ونى رەسمي باسىلىمنىڭ ءوزى ناسيحاتتاپ وتىر. بۇل ءوزى قالا باسشىسىن كەزەكتى سوگىسكە يتەرمەلەۋدىڭ تاعى ءبىر امالى ەمەس پە ەكەن دەگەن وي كەلەدى وسىندايدا...
بەك قۇسىمان،
ەكىباستۇز قالاسى
"ادىرنا" ۇلتتىق پورتالى
