تورعاي دالاسىنان التىن بۇيىمدى ادامنىڭ قورىمى تابىلدى

3117
Adyrna.kz Telegram

تورعاي دالاسىنان ساق داۋىرىنە جاتاتىن «التىن بۇيىمدى ادامنىڭ» قورىمى تابىلدى. بۇل تۋرالى "قازاقستان" ۇلتتىق ارناسى حابارلادى.

ارحەولوگتار مۇنداي كونە جادىگەر بۇل ولكەدە العاش رەت كەزدەسىپ وتىرعانىن ايتادى. ياعني، ايماقتىڭ تاريحى ءۇشىن – «التىن ادام» تابىلعانىمەن بىردەي.

ءبىزدىڭ جىل ساناۋىمىزعا دەيىنگى 7-6 عاسىرعا جاتاتىن ەجەلگى ساق قورعانى  ارقالىقتان 80 شاقىرىم جەردە سابا جانە تورعاي وزەندەرىنىڭ تۇيىسكەن تۇسىندا تۇر. ورنالاسقان جەردىڭ باتىسىندا تورعاي جازىعى جاتىر. ال شىعىسقا قاراي ۇلىتاۋ سىلەمدەرى باستالادى.

 

قوس وزەن توعىسىپ، جازىق پەن تاۋ سىلەمدەرى تۇيىسكەن تۇس – كونە ساق تايپالارىنىڭ قورىمى بولعانعا ۇقسايدى. وسى جەردە 20 شاقتى وبانىڭ ورنى بار. قازبا جۇمىستارى 2017-ءشى جىلى باستالىپتى. سودان بەرى ءتورت وبا زەرتتەلگەن. الايدا، تاريح ءۇشىن اسا باعالى قازىنا سوڭعىسىنان تابىلدى. ارحەولوگتار بۇل قورىمعا ساق بەكزادالارىنىڭ ءبىرى جەرلەنگەن دەپ ەسەپتەيدى.

ءابدىنۇر نۇسقاباي، ارحەولوگ:

التىن زاتتارىنا قاراعاندا الەۋمەتتىك جوعارى توپتىڭ وكىلى ەكەندىگى بەلگىلى.  قۇرىلىسى مەن ارحيتەكتۋرالىق ەرەكشەلىگى شەندى ادام بولعاندىعىن (تابىلعان ادام - رەد.) كورسەتەدى. 

تەك اشەكەيلەر عانا ەمەس، كيىمدەرىنىڭ ءوزى وتە ۇساق التىن مونشاقتارمەن بەزەندىرىلگەن. بۇيىمداردىڭ جاسالۋى دا وتە كۇردەلى. بۇل ساق زەرگەرلەرىنىڭ شەبەرلىگىن، التىندى ءوندىرۋ مەن وڭدەۋدى قانشالىقتى تەرەڭ مەڭگەرگەندىگىن كورسەتەدى. ەڭ باستىسى - ءار زات  ولكەنىڭ كونە زامانداعى تاريحىنان قۇندى دەرەكتەر جەتكىزىپ تۇر.

قورعاننان تابىلعان جادىگەرلەر الدىمەن حاتتالىپ، كەيىن مۇراجايلارعا تاپسىرىلادى. ال قازبا جۇمىستارى جۇرگىلىگەن جەردىڭ ءوزىن تۋريزم نىسانىنا اينالدىرۋ جوسپاردا بار. الايدا كونە قورىم كۇرە جولدان جىراقتا جاتىر. سوندىقتان بۇل جوسپاردى قالاي، قايتىپ جۇزەگە اسىرۋعا بولاتىنى ءازىر بەيمالىم.

داۋرەنبەك ابدىبەك،

"قازاقستان" ۇلتتىق ارناسى

 

پىكىرلەر