Torǧai dalasynan saq däuırıne jatatyn «Altyn būiymdy adamnyŋ» qorymy tabyldy. Būl turaly "Qazaqstan" ūlttyq arnasy habarlady.
Arheologtar mūndai köne jädıger būl ölkede alǧaş ret kezdesıp otyrǧanyn aitady. Iаǧni, aimaqtyŋ tarihy üşın – «Altyn adam» tabylǧanymen bırdei.
Bızdıŋ jyl sanauymyzǧa deiıngı 7-6 ǧasyrǧa jatatyn ejelgı Saq qorǧany Arqalyqtan 80 şaqyrym jerde Saba jäne Torǧai özenderınıŋ tüiısken tūsynda tūr. Ornalasqan jerdıŋ batysynda Torǧai jazyǧy jatyr. Al şyǧysqa qarai Ūlytau sılemderı bastalady.Qos özen toǧysyp, jazyq pen tau sılemderı tüiısken tūs – köne Saq taipalarynyŋ qorymy bolǧanǧa ūqsaidy. Osy jerde 20 şaqty obanyŋ orny bar. Qazba jūmystary 2017-şı jyly bastalypty. Sodan berı tört oba zerttelgen. Alaida, tarih üşın asa baǧaly qazyna soŋǧysynan tabyldy. Arheologtar būl qorymǧa saq bekzadalarynyŋ bırı jerlengen dep esepteidı.
Äbdınūr Nūsqabai, arheolog: Altyn zattaryna qaraǧanda äleumettık joǧary toptyŋ ökılı ekendıgı belgılı. Qūrylysy men arhitekturalyq erekşelıgı şendı adam bolǧandyǧyn (tabylǧan adam - red.) körsetedı.Tek äşekeiler ǧana emes, kiımderınıŋ özı öte ūsaq altyn monşaqtarmen bezendırılgen. Būiymdardyŋ jasaluy da öte kürdelı. Būl Saq zergerlerınıŋ şeberlıgın, altyndy öndıru men öŋdeudı qanşalyqty tereŋ meŋgergendıgın körsetedı. Eŋ bastysy - är zat ölkenıŋ köne zamandaǧy tarihynan qūndy derekter jetkızıp tūr. Qorǧannan tabylǧan jädıgerler aldymen hattalyp, keiın mūrajailarǧa tapsyrylady. Al qazba jūmystary jürgılıgen jerdıŋ özın turizm nysanyna ainaldyru josparda bar. Alaida köne qorym küre joldan jyraqta jatyr. Sondyqtan būl jospardy qalai, qaitıp jüzege asyruǧa bolatyny äzır beimälım.
Däurenbek ÄBDIBEK,
"Qazaqstan" ūlttyq arnasy
