22-ءشى ماۋسىمدا دەنساۋلىق ءمينيسترىنىڭ ءبىرىنشى ورىنباسارى بولىپ تاعايىندالعان الەكسەي تسوي ەندى مينيسترلىكتىڭ تىزگىنىن ۇستادى.
پارلامەنت ءماجىلىسىنىڭ الەۋمەتتىك-مادەني دامۋ كوميتەتى دەنساۋلىق ساقتاۋ ءمينيسترى لاۋازىمىنا تاعايىنداۋ ءۇشىن الەكسەي تسويدىڭ كانديداتۋراسىن قولداعان.
قر پرەمەر-ءمينيسترى اسقار مامين مەملەكەت باسشىسىنىڭ جارلىعىمەن تاعايىندالعان مينيستر الەكسەي تسويدى دەنساۋلىق ساقتاۋ مينيسترلىگىنىڭ ۇجىمىنا تانىستىردى. ۇكىمەت باسشىسى بۇل ۇجىمعا الەكسەي تسويدى وسىمەن ەكىنشى رەت تانىستىرىپ وتىر.
الەكسەي ۆلاديميروۆيچ تسوي 1977 جىلى 2 ساۋىردە وڭتۇستىك قازاقستان وبلىسىندا دۇنيەگە كەلگەن. Sells College (لوندون), قازاقستان مەملەكەتتىك مەديتسينا اكادەمياسىنىڭ اسپيرانتۋراسىن، وڭتۇستىك قازاقستان مەملەكەتتىك مەديتسينا اكادەمياسىن، «دانەكەر» حالىقارالىق قۇقىق جانە حالىقارالىق بيزنەس ينستيتۋتىن، رف پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىنىڭ كورپوراتيۆتىك باسقارۋ جوعارى مەكتەبىن تامامداعان. ستەنفورد ۋنيۆەرسيتەتىندە (اقش), سينگاپۋردا، ماسكەۋدە، گەرمانيادا، ۇلىبريتانيادا جانە ت. ب. ەلدەردە تاعىلىمدامادان وتكەن. ىسكەرلىك اكىمشىلىك دوكتورى، مەديتسينا عىلىمدارىنىڭ كانديداتى.
حيرۋرگ-ەندوسكوپيست بولىپ جۇمىس ىستەگەن، قالپىنا كەلتىرۋ حيرۋرگياسى جانە ترانسپلانتولوگيا ورتالىعىنىڭ اعا عىلىمي قىزمەتكەرى، ۇلتتىق عىلىمي مەديتسينا ورتالىعىنىڭ ىشكى مەديتسينا ورتالىعىنىڭ جەتەكشى عىلىمي قىزمەتكەرى، «ەۋروازياتتىق رەسپيراتورلىق قوعام» قوعامدىق بىرلەستىگىنىڭ باس حاتشىسى، قر پرەزيدەنتى ءىس باسقارماسىنىڭ زاماناۋي مەديتسينالىق تەحنولوگيالاردى ەنگىزۋ ورتالىعىنىڭ ديرەكتورى، قر پرەزيدەنتى ءىس باسقارماسىنىڭ مەديتسينالىق ورتالىعىنىڭ باسشىسى، استانا قالاسىنىڭ №1 قالالىق اۋرۋحاناسىنىڭ باس دارىگەرى، قر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى، قر دەنساۋلىق ساقتاۋ ۆيتسە-ءمينيسترى قىزمەتتەرىن اتقارعان.
2019 جىلعى اقپاننان باستاپ وسى ۋاقىتقا دەيىن قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعىن باسقاردى.
"ادىرنا" ۇلتتىق پورتالى
