22-şı mausymda Densaulyq ministrınıŋ bırınşı orynbasary bolyp taǧaiyndalǧan Aleksei Soi endı ministrlıktıŋ tızgının ūstady.
Parlament Mäjılısınıŋ Äleumettık-mädeni damu komitetı Densaulyq saqtau ministrı lauazymyna taǧaiyndau üşın Aleksei Soidyŋ kandidaturasyn qoldaǧan.
QR Premer-Ministrı Asqar Mamin Memleket basşysynyŋ Jarlyǧymen taǧaiyndalǧan ministr Aleksei Soidy Densaulyq saqtau ministrlıgınıŋ ūjymyna tanystyrdy. Ükımet basşysy būl ūjymǧa Aleksei Soidy osymen ekınşı ret tanystyryp otyr.
Aleksei Vladimirovich Soi 1977 jyly 2 säuırde Oŋtüstık Qazaqstan oblysynda düniege kelgen. Sells College (London), Qazaqstan memlekettık medisina akademiiasynyŋ aspiranturasyn, Oŋtüstık Qazaqstan memlekettık medisina akademiiasyn, «Däneker» halyqaralyq qūqyq jäne halyqaralyq biznes institutyn, RF Prezidentı janyndaǧy Resei halyq şaruaşylyǧy jäne memlekettık qyzmet akademiiasynyŋ korporativtık basqaru joǧary mektebın tämamdaǧan. Stenford universitetınde (AQŞ), Singapurda, Mäskeude, Germaniiada, Ūlybritaniiada jäne t. b. elderde taǧylymdamadan ötken. Iskerlık äkımşılık doktory, medisina ǧylymdarynyŋ kandidaty.
Hirurg-endoskopist bolyp jūmys ıstegen, Qalpyna keltıru hirurgiiasy jäne transplantologiia ortalyǧynyŋ aǧa ǧylymi qyzmetkerı, Ūlttyq ǧylymi medisina ortalyǧynyŋ ışkı medisina ortalyǧynyŋ jetekşı ǧylymi qyzmetkerı, «Euroaziattyq respiratorlyq qoǧam» qoǧamdyq bırlestıgınıŋ bas hatşysy, QR Prezidentı Is basqarmasynyŋ Zamanaui medisinalyq tehnologiialardy engızu ortalyǧynyŋ direktory, QR Prezidentı Is basqarmasynyŋ Medisinalyq ortalyǧynyŋ basşysy, Astana qalasynyŋ №1 qalalyq auruhanasynyŋ bas därıgerı, QR densaulyq saqtau jäne äleumettık damu vise-ministrı, QR densaulyq saqtau vise-ministrı qyzmetterın atqarǧan.
2019 jylǧy aqpannan bastap osy uaqytqa deiın Qazaqstan Respublikasy Prezidentı Is basqarmasynyŋ Medisinalyq ortalyǧyn basqardy.
"Adyrna" ūlttyq portaly
