Qobda audanynda halyqtyŋ densaulyǧyn saqtau salasynda taǧy bır igı qadam jasaldy. Jaryq jäne Ötek auyldarynda jaŋa medisinalyq punktter paidalanuǧa berıldı.
Aşylu saltanatyna oblys äkımınıŋ orynbasary Asylbek Esenbaev, audan äkımı Izgılık Tynymgereev, sondai-aq oblystyq densaulyq saqtau, qūrylys, säulet jäne qala qūrylysy basqarmalarynyŋ ökılderı qatysty.
Jaryq auylyndaǧy medisinalyq punkt Memleket basşysynyŋ auyldyq aimaqtardy damytu jäne medisinalyq infraqūrylymdy jaŋǧyrtu jönındegı tapsyrmalarynyŋ aiasynda salynsa, Ötek auylyndaǧy nysan «Auyl – el besıgı» baǧdarlamasy boiynşa boi köterdı.
Qūrylys jūmystaryn «Rus Tal» jäne «Aqtöbe Adal Qūrylys» jauapkerşılıgı şekteulı serıktestıkterı belgılengen merzımde oryndady.
«Prezident Qasym-Jomart Kemelūly Toqaevtyŋ bastamasymen öŋırlerde medisinalyq infraqūrylym qarqyndy damyp keledı. Oblys kölemınde jaŋa densaulyq saqtau nysandary salynyp, qoldanysqa berılude. Biylǧy jyly oblys boiynşa 11 jaŋa medisinalyq punkttıŋ qūrylysy jürgızılude. Būl jūmystar auyl tūrǧyndarynyŋ sapaly medisinalyq qyzmetke qoljetımdılıgın qamtamasyz etuge baǧyttalǧan», – dedı oblys äkımınıŋ orynbasary Asylbek Esenbaev.
Bügıngı künı qoldanysqa berılgen zamanaui qūral-jabdyqtarmen qamtamasyz etılgen jaŋa medisinalyq punktter Ötek jäne Jaryq auyldarynyŋ 500-den astam tūrǧynyna alǧaşqy jäne şūǧyl medisinalyq kömektı sapaly türde aluǧa mümkındık beredı.
Qazırgı taŋda Qobda audanynda 27 medisinalyq mekeme halyqqa qyzmet körsetude. Onyŋ ışınde 1 audandyq auruhana, 6 därıgerlık ambulatoriia, 2 feldşerlık-akuşerlık punkt jäne 18 medisinalyq punkt bar.
