دەنساۋلىق ساقتاۋ ءمينيسترى الەكسەي تسوي جۇمسالعان قاراجاتتىڭ ەسەبىن بەردى. بۇل تۋرالى "ازاتتىق رۋحى" حابارلادى.
قازاقستان جالپى پاندەميا كەزەڭىندە كوروناۆيرۋس ينفەكتسياسىمەن كۇرەسۋ ءۇشىن 114 ملرد 826 ملن تەڭگە جۇمساعان. بۇگىن دەنساۋلىق ساقتاۋ ءمينيسترى الەكسەي تسوي ۇكىمەت رەزەرۆى مەن رەسپۋبليكالىق بيۋدجەتتەن قانشا قارجى الىنعانىن جانە ول قاراجات قالاي جۇمسالعانىن ايتىپ بەردى.
«مەندە ناقتى مالىمەتتەر بار. كوروناۆيرۋس ينفەكتسياسىنىڭ پايدا بولۋى مەن تارالۋىنىڭ الدىن الۋ ماقساتىندا دەنساۋلىق ساقتاۋ مينيسترلىگى جالپى سوماسى 114 ملرد 826 ملن تەڭگە ءبولدى»، - دەدى مينيستر.
ەندەشە دەنساۋلىق ساقتاۋ ءمينيسترىنىڭ ەسەبىن ۇسىنامىز. ونىڭ ىشىندە 40 ملرد 58 ملن تەڭگە ۇكىمەت رەزەرۆىنەن الىندى:
21 ملرد 184 ملن تەڭگە جەكە قورعانىس قۇرالدارىن ساتىپ الۋعا;
2 ملرد 30 ملن تەڭگەسى – ءدارى-دارمەك پەن مەديتسينالىق بۇيىمدار ساتىپ الۋعا;
2,5 ملرد تەڭگەسى – زەرتحانالاردىڭ قۇرال-جابدىقتارى مەن كوروناۆيرۋستى انىقتايتىن تەست جۇيەلەرىن ساتىپ الۋعا;
100 ملن تەڭگەسى – كورونايرۋستى انىقتاۋعا ارنالعان رەاگەنتتەردى ساتىپ الۋعا;
13,7 ملرد تەڭگەسى – پتر تەست ادىسىمەن زەرتحانالىق قىزمەت كورسەتۋگە;
310 ملن تەڭگەسى جەدەل-جاردەم كولىكتەرىنە ورناتۋ ءۇشىن وتاندىق وندىرىستەن شىققان جاساندى جەلدەتۋ اپپاراتتارىن ساتىپ الۋعا;
131 ملن تەڭگەسى ازاماتتاردى ەۆاكۋاتسيالاۋعا جۇمسالدى.
ال، رەسپۋبليكالىق بيۋدجەتتەن 74 ملرد تەڭگە ءبولىندى:
19,5 ملرد تەڭگە – ينفەكتسيالىق پروۆيزورلار مەن كارانتيندىك ستاتسيونارلاردا مەديتسينالىق قىزمەت كورسەتۋگە;
40,4 ملرد تەڭگە – كارانتيندىك شارالاردى جۇزەگە اسىراتىن قىزمەتكەرلەردى ىنتالاندىرۋعا;
14,8 ملرد تەڭگە – نۇر-سۇلتان، شىمكەنت، الماتى قالالارىندا ءۇش ينفەكتسيالىق اۋرۋحانا سالۋعا جۇمسالدى.
كەنجەكەي توقتامۇرات، نۇر-سۇلتان،
"ازاتتىق رۋحى"
