قر پرەزيدەنتى ق.توقاەۆتىڭ بۇگىنگى ۇندەۋىنە قاتىستى ۇلتتىق كەڭەس مۇشەسى، قوعام قايراتكەرى مۇرات ابەنوۆ پىكىرى ءبىلدىردى. بۇل تۋرالى "ادىرنا" strategy2050-گە سىلتەمە جاساپ حابارلايدى.
بۇگىن مەملەكەت باسشىسى ادەتتەگىدەن شىنايى، رەسمي ەمەس، حالىققا تىكەلەي قاراپ، جۇرەكجاردى سوزدەرىن جولدادى. شىنىندا، سوڭعى كۇندەرى ەل باسىنا قارا بۇلت ءۇيىرىلدى. قارتتارىمىزدى قازىناعا بالاعان حالىق ەدىك. ۇلكەندەرىمىز شەت-شەتىنەن مەرت بولىپ جاتقانى جانعا باتادى. سوعىس كەزەڭى سياقتى. كەشە نەمەرەلەردىڭ ورتاسىندا وتىرعان قاريالارىمىز ۇزاق اۋىرماي اتتانىپ كەتىپ جاتىر. ارتىندا قالعان بالالارى ارۋلاپ جەر قوينىنا تاپسىرۋعا قينالۋدا. جانازاسىن شىعارىپ ۇلگەرمەي قالعاندار دا بار. بارىنە سەبەپ مىنا كورونوۆيرۋستىق ەپيدەميا. وسىنى ەسكەرگەن قاسىم-جومارت توقاەۆ حالىقتىڭ قايعىسىنا ورتاقتاسىپ، ازا تۇتۋ كۇنىن بەلگىلەدى، - دەدى ابەنوۆ.
ول ءدارى-دارمەكتىڭ قىمباتتاۋى مەن ءدارىحانا سورەلەرىنەن جوعالۋىنا قاتىستى پىكىرىن ءبىلدىردى.
قازاق قايعى جۇتقان ادامعا كوڭىل ايتىپ، سابىرلىققا شاقىرادى. ەندى سابىرعا كەلىپ، مىنا پاندەمياعا قارسى ناعىز ارەكەتتەر جاسايتىن كەز كەلگەنىن ايتتى پرەزيدەنت. بۇگىنگى سوزىندە ول ۇكىمەتتەگى بىرنەشە مينيسترلىكتى قاتاڭ سىنعا الدى. شىنىندا ناۋرىز ايىندا حالىقتى ۇيگە قاماپ قويدى دا، دەنساۋلىق ساقتاۋ سالاسى ستاتسيونارلار مەن ءدارى-دارمەك جاعىن قازىرگىدەي قيىن كۇندەرگە دايىندامادى. اۋرۋحانالاردا ورىن جوق، ءدارىحانالاردا ءدارى جوق. پرەزيدەنت ءدارى-دارمەكتەن پايدا كورەمىن دەپ قىمباتقا ساتىپ جاتقاندار مىندەتتى تۇردە جازالاناتىنىن ايتتى. ەلىمىزگە پدر تەستتەرىن جاسايتىن بىرنەشە كومپانيالار كىرگىزىلدى. الايدا، ولاردىڭ جۇمىسى كورىنبەدى. ويتكەنى، ولاردى تەكسەرۋ جۇمىستارى ايلارعا سوزىلىپ كەتكەن. قازىر پرەزيدەنتتىڭ تىكەلەي ارالاسۋىمەن ءدارى-دارمەككە قاتىستى ماسەلە شەشىمىن تاۋىپ جاتىر، - دەدى ۇلتتىق سەنىم كەڭەسىنىڭ مۇشەسى.
مۇرات ابەنوۆ جاقىندارىنان ايىرىلعان ادامدارعا كوڭىل ايتىپ، سابىرعا شاقىردى.
قازىر ءبىر-ءبىرىمىزدى كەشىرەتىن، ءبىر-بىرىمىزگە جاناشىر بولاتىن، بىرلىگىمىز سىنالاتىن كەزەڭ كەلدى. بىرىگۋىمىز كەرەك، بەرىلمەۋىمىز كەرەك. ەلىمىزدە ۆيرۋستىق اۋرۋدىڭ تارالۋى توقتاسا ەكەن دەپ تىلەيمىن، - دەپ قورىتىندىلادى قوعام قايراتكەرى.
اينارا بايجان،
strategy2050
