رەسەي پرەزيدەنتى ۆلاديمير ءپۋتيننىڭ شەشىمىمەن 17-21 شىلدە ارالىعىندا وتكەن رف قارۋلى كۇشتەرىندەگى جاۋىنگەرلىك دايىندىقتى كەنەتتەن تەكسەرۋ جاتتىعۋلارى اياقتالدى، دەپ حابارلايدى رەسەيدىڭ قورعانىس مينيسترلىگى.
«رەسەي فەدەراتسياسىنىڭ قارۋلى كۇشتەرى جاۋىنگەرلىك ازىرلىكتى كەنەتتەن تەكسەرۋ بويىنشا ءىس-شارالاردى اياقتادى. اسكەرلەر مەن تەحنيكالار 35 جاتتىعۋ پوليگوندارى مەن ۋچاسكەلەردە، قارا تەڭىز جانە كاسپي تەڭىزدەرىندەگى 17 تەڭىز جاتتىعۋ الاڭىندا ءتۇرلى دەڭگەيدەگى 50-دەن استام جاتتىعۋلارعا قاتىستى»، - دەلىنگەن حابارلامادا.
وڭتۇستىك اسكەري وكرۋگتىڭ اسكەرلەرى مەن اسكەري باسقارۋ جانە باقىلاۋ ورگاندارىنىڭ بولىگى جانە باتىس اسكەري وكرۋگىنىڭ اسكەرلەرى، اۋە-دەسانتتىق كۇشتەر، سونداي-اق اسكەري-تەڭىز كۇشتەرىنىڭ قۇرامالارى مەن اسكەري بولىمدەرى وزدەرىنىڭ تۇراقتى ورىندارىنا ورالدى. قورعانىس مينيسترلىگى تەكسەرۋ بارىسىندا شتاب، قۇرامالار مەن اسكەري بولىمدەر جاۋىنگەرلىك ازىرلىكتىڭ جوعارى دەڭگەيدە ەكەنىنە كوز جەتكىزدى.«اياق استىنان وتكەن تەكسەرۋدىڭ باستى ماقساتى - اسكەري باسقارۋ جانە باقىلاۋ ورگاندارىنىڭ رەسەي فەدەراتسياسىنىڭ وڭتۇستىك-باتىسىندا قاۋىپ-قاتەر توندىرەتىن تەرروريستىك ارەكەتتەرگە اسكەري قاۋىپسىزدىكتى قامتاماسىز ەتۋ قابىلەتتىلىگىن باعالاۋ، سونداي-اق اسكەرلەردىڭ رەسەيدىڭ وڭتۇستىگىندە الداعى ستراتەگيالىق كوماندالىق-شتابتىق جاتتىعۋلارعا دايىندىق دارەجەسىن انىقتاۋ»، - دەپ ءتۇسىندىردى قورعانىس مينيسترلىگى.
تەكسەرۋ ناتيجەلەرى قارۋلى كۇشتەردىڭ ءىرى قۇرامالارى مەن اسكەري بولىمدەرىن «كاۆكاز-2020» ستراتەگيالىق كوماندالىق-شتابتىق جاتتىعۋلارىنا قاتىسۋعا جىبەرگەن كەزدە ەسكەرىلەتىن بولادى.
"ادىرنانىڭ" ەسەپتەۋىنشە رف قارۋلى كۇشتەرىنىڭ جاۋىنگەرلىك دايىندىعىن تەكسەرۋگە بارلىعى 150 مىڭ اسكەري قىزمەتشى، 400-گە جۋىق ۇشاق، 26 مىڭنان استام قارۋ-جاراق، اسكەري جانە ارنايى تەحنيكا، 100-دەن استام كەمەلەر مەن كومەكشى كەمەلەر تارتىلدى.
