كاسىپكەر ەرلان نۇرپەيىسوۆتىڭ باستاماسىمەن ءبىر توپ ازامات شىلدە ايىنىڭ 11-نەن باستاپ COVID-19 ۆيرۋسىمەن ينفەكتسيالانعان ناۋقاستاردى تەگىن ەمدەۋ ماقساتىندا كۇندىزگى قوعامدىق ستاتسيونار اشۋدى قولعا العان بولاتىن. كقس جوباسىنىڭ نەگىزگى ماقساتى مەن ۇيىمداستىرۋ جۇمىستارى تۋرالى ءبىز بۇعان دەيىن تانىستىرعان ەدىك . قازىرگى كەزدە جوبا ۇيىمداستىرۋشىلارىنىڭ تاباندى ەڭبەگىنىڭ ارقاسىندا بۇل ءىس ءبىر ىزگە ءتۇسىپ، اپتا سوڭىنان باستاپ ناۋقاستاردى تەگىن ەمدەي باستاماق.
ۇيىمداستىرۋشىلاردىڭ ايتۋى بويىنشا جوبا باستاپقىدا بيۋروكراتيالىق شەشىمدەردىڭ ىقپالىنان ءبىرشاما كەدەرگىگە ۇشىراپ، تىعىرىققا تىرەلگەن. ياعني، ناۋقاستار قابىلدايتىن ستاتسيونار اشۋ ءۇشىن ارنايى ليتسەنزيا الۋ تالابى مىندەتتەلگەن. بىراق جاعداي ۋشىعىپ، حالىق ەم-دومعا ءزارۋ شاقتا ليتسەنزيا الۋعا ۇزاق ۋاقىت پەن كۇش كەتەتىندىكتەن، ۇيىمداستىرۋشى ازاماتتار كوپ ۇزاماي-اق بۇل ماسەلەنىڭ شەشىمىن تاپتى. جوبا جەتەكشىلەرى نەعۇرلىم ىندەتتىڭ ۋشىعىپ تۇرعان ايماعىنىڭ ءبىرى الماتى قالاسىندا كقس-دى اشىپ، تۇرعىندارعا تەزىرەك كومەك بەرۋ ماقساتىندا شاڭىراق ىقشاماۋدانىنداعى «تالانت» كلينيكاسىمەن كەلىسسوزدەر جۇرگىزدى. ەندىگى كەزەكتە، جوبانى رەسمي تۇردە بەكىتۋ ماسەلەلەرى شەشىمىن تاپقان سوڭ، جوبا تەگىن ەمدەۋ قىزمەتىن كورسەتۋدى باستايدى.
جوبا اياسىندا:
- COVID-19 ۆيرۋسىن جۇقتىرعان تۇرعىندار تەگىن ەمدەلەدى;
- ناۋقاستار تەگىن ءدارى-دارمەكپەن قامتاماسىز ەتىلەدى;
- ناۋقاستار تەگىن اناليز تاپسىرا الاتىن بولادى;
- ناۋقاستار تەگىن رەنتگەنگە تۇسىرىلەدى;
- جاعدايى كەلمەيتىن ناۋقاستار كلينيكاعا تەگىن تاسىمالدانادى، - دەپ حابارلادى جوبا ۇيىمداستىرۋشىلارىنىڭ ءبىرى نۇراددين سادىقوۆ Facebook پاراقشاسىندا.
سونداي-اق ول ەلىمىزدەگى جاعدايعا بايلانىستى: «...سوڭعى كۇندەرى جەر-جەردەن «جاعداي تۇراقتالدى، كوۆيد اۋىزدىقتالا باستادى» دەگەنگە ساياتىن پىكىرلەر جازىلا باستادى. مەنىڭشە، بۇل – قازىرگى ۇكىمەت مۇشەلەرىنىڭ كوزجۇمباي ستاتيستيكاسى. جاعداي ءالى كۇنگە وتە قيىن جاعدايدا. ءالى كۇنگە اۋرۋلار ەسەلەپ ارتىپ، اۋرۋحانالاردا ورىن مەن ءدارىحانالاردا ءدارى-دارمەك تاپشى. سوندىقتان، بىزگە ارقانى كەڭگە سالۋعا ءالى ەرتە،» - دەپ پىكىر ءبىلدىردى.
ايتا كەتەيىك، كقس جوباسى الماتى قالاسىندا جۇزەگە اسقان سوڭ ارىقاراي باسقا وبلىستار مەن اۋدانداردا دا اشىلاتىن بولادى. وسى ورايدا جوبا باستاماشىلارى وزگە ايماقتاعى ازاماتتاردان ەل يگىلىگى ءۇشىن وسى ءىستى جالعاستىرۋىن سۇرايدى. ىنتالى ازاماتتار تابىلسا، كقس جوباسىن ۇيىمداستىرۋشىلار كەڭەس بەرىپ، قولداۋعا ءازىر.
جوباعا قولداۋ بىلدىرەم دەسەڭىز:
«كراسيۆىە دەتي كازاحستانا» قورى
بسن 080 740 007 650
زاڭدى مەكەن-جايى: الماتى قالاسى، مەدەۋ اۋدانى، سامال-3 شاعىن اۋدانى، 1 ءۇي
پرەزيدەنت: نۇرپەيىسوۆا گۇلشات ايتبايقىزى
بانك دەرەكتەرى:
بيك: IRTYKZKA
يك: KZ7796502F0008690340
Kبe 17
قورعا تۇسكەن بارلىق قاراجات تۋرالى جوبا ۇيىمداستىرۋشىلارى ەسەپ بەرەدى.
ايجان قۇرمانباي،
"ادىرنا" ۇلتتىق پورتالى
