بۇگىن جامبىل وبلىسى اكىمدىگى ىشكى ساياسات باسقارماسىنىڭ تاپسىرىسىمەن «ادىرنا» ۇلتتىق-ەتنوگرافيالىق بىرلەستىگى اباي قۇنانبايۇلىنىڭ 175 جىلدىق مەرەيتويىنا وراي "عىلىم تاپپاي ماقتانبا" دەلفيلىك ويىندارى مەن «ماڭگىلىك ەلدىڭ تۇلعالارى» اتتى ەسسە جازۋ ينتەرنەت-بايقاۋىنىڭ ماراپاتتاۋ ءراسىمىن وتكىزدى. شاراعا جامبىل وبلىسىنىڭ جانە تاراز قالاسىنىڭ 14-35 جاس ارالىعىنداعى تۇرعىندارى قاتىستى. سوعان وراي قوس بىردەي بايقاۋدىڭ جەڭىمپازدارى تاراز «Jastar» قابىلەت ورتالىعىندا ماراپاتتالدى. ماراپاتتاۋ ءراسىمىنىڭ شىمىلدىعىن جامبىل وبلىسى اكىمدىگى ىشكى ساياسات باسقارماسىنىڭ باسشىسى بەيسەنقۇلوۆ داۋىل ىنتىقبايۇلى اشىپ، ارى قاراي ءسوز كەزەگىن ۇلت مۇددەسى جولىندا قوعامدىق ەڭبەك ەتىپ جۇرگەن ادىرنا» ۇلتتىق-ەتنوگرافيالىق بىرلەستىگىنىڭ پرەزيدەنتى اۋباكىر ارمان سەرىكۇلى جالعاپ، جاستاردى جالىندى سوزدەرمەن دەمەدى.
كارانتيندىك مەزگىلدە شىعارماشىلىق تۇرعىدان دامۋ كەرەك دەپ تۇيگەن بولۋ كەرەك، «عىلىم تاپپاي ماقتانبا» اتتى دەلفيلىك ويىندارىنا 60 قاتىسۋشى بەلسەندى قاتىسىپ، ىشىنەن 17 جەڭىمپاز وق بويى وزىق شىقسا، «ماڭگىلىك ەلدىڭ الىپ تۇلعالارى» بايقاۋىنان 3 جەڭىمپاز انىقتالدى. جۇلدەلى ورىنداردان بولەك، قاتىسۋشىلاردىڭ ىنتاسىنا قاراپ 2 اۆتورعا ىنتالاندىرۋ سىيلىقتارى تاعايىندالدى.
سونداي-اق، ماراپاتتاۋ ءراسىمى اياقتالعاننان كەيىن جاستاردى ورتا عاسىردىڭ قۇندى تۋىندىلارىمەن تانىستىرۋ ماقساتىندا ءال-ءفارابيدىڭ 1150 جىلدىعىنا ارنالعان عىلىم جانە تەحنولوگيالار كورمەسى ءوتتى.
"ادىرنا" ۇلتتىق پورتالى
