ەسكى كينولاردى كەرمەك ساعىنىشپەن ەسكە الاسىز با؟ قۇلىپقا سۇيىكتىڭىزبەن قول ۇستاسىپ بارىپ، ءفيلمدى كورىپ، قارىق-قارىق كۇلگەن ۋايىمسىز كەزدەرىڭىزدى اڭسايسىز با؟.. ەندەشە قازاق كينوسىنىڭ التىن قورىنا ەنگەن فيلمدەرگە ءسىز بەن ءبىز بىرگە ساياحاتتايىق!
«جالعىز باستى ەركەكتىڭ كۇنى قۇرىسىن! قاسىندا شەشەسى، ەڭ قۇرىعاندا ءبىر شۇيكەباسى بولۋى كەرەك!»
جوعارىداعى تانا شەشەيدىڭ سوزدەرى ەسىڭىزدە بولار؟! جالعىز ۇلىنىڭ بويداقتىق ومىرىنە بالتا شاپقىسى كەلگەن انا قىزدار ينستيتۋتىنىڭ جاتاقحاناسىنان دا، بالەت تەاترىنان دا تىپتەن اۆتوبۋستان دا قىز ىزدەۋ پروتسەسسىنە كىرىسىپ كەتەدى. ال تايلاق «سەندەي شەشە بۇكىل جەر بەتىندە جوق» دەسە دە، اناسىنىڭ قارسىلىعىنا قاراماي، ءوز سۇيىكتىسى ايشاعا قوسىلۋعا اسىعادى. تانا شەشەيدىڭ قارسىلىق ءبىلدىرۋىنىڭ باستى سەبەبى ايشا كەزىندە تانامەن ءسوز بايلاسىپ، كەيىن سوزىنەن تايقىپ شىققان (اتىنىڭ ءوزى ايتىپ تۇرعانداي) تايىردىڭ تۋعان قىزى بولىپ شىققان.
ايتپاقشى، فيلمدەگى اندەردى ايتساڭىزشى..
«عاشىعىمداي سۇيەم سەنى..
ارمانىمداي ادال،
الاتاۋداي كورەم سەنى،
گۇل الماتىم..گۇل الماتىم..» دەپ باستالاتىن كينوداعى اسەم اۋەن دە، كولدەي كوڭىل دە، الماتىنىڭ بۇرىنعى كورىنىسى دە وتكەن كۇندەرىمىزگە ساياحات جاساعانداي اسەر قالدىرادى.
ال قىزدار ينستيتۋتىندا «ءبىزدىڭ ارامىزداعى ءبىر قىزدى ماسكەۋگە سيمپوزيۋمعا جىبەرۋىمىز كەرەك. وزدەرىڭ بىلەسىڭدەر، وعان كىم كورىنگەندى جىبەرۋگە بولمايدى» دەپ كوممەنداتتىڭ الداپ تۇرعانىن سەزىپ قويعانىن قىزدار اياق-كيىمدەرىن لاقتىرىپ جىبەرىپ، «تى كۋدا، وديسسەي» انىنە بيلەي جونەلەتىنى ەستەرىڭىزدە مە؟ بىلەمىن، بۇل دا ءسال جىميىپ ەسكە الار ءسات بوپ قالدى...
«تاقيالى پەرىشتەگىدەي» ءومىردى، بۇرىنعى الماتىنى اڭساساڭىز، سىلتەمە ارقىلى تاعى ءبىر مارتە كورىپ الۋىڭىزعا بولادى.
جەڭگەسىنە عاشىق بولعان قارا بالا..
«اپو-و-وۋ، اپاتايىم مەنىڭ!» دەپ اپاسىنىڭ بەلىنەن باس سالاتىن «قارا بالانى» تانيتىندارىڭىز بار ما؟
تانىماساڭىزدار تانىستىرايىن. قارا بالا – كومەك سۇراعان جەڭگەلەرىنە «سەندەردىڭ نەمەنە مالايلارىڭ دەيسىڭ بە؟» دەپ تاس توبەدەن ءبىر قوياتىن بالا. قارا بالا–ۇلكەندەۋ بولسا دا بالعىن ەسىمدى جەڭگەسىنە عاشىق بولعان بالا. قارا بالا–اپاسى كورشى قىزعا «كەلىن بولۋعا ابدەن لايىق» دەپ ءسۇيسىنىپ تۇرعاندا «قاپ-قارا عوي» دەپ مەنسىنبەگەن بالا. قارا بالا–قاتىنداردىڭ ءبارى مەنەن ءان سۇراسىن دەگەن بالا. «قارا بالا» ءفيلمى بەيىمبەت ءمايليننىڭ «قارا بالا» شىعارماسىنىڭ جەلىسىمەن تۇسىرىلگەن. ەندەشە كورگىڭىز كەلسە تومەندەگى سىلتەمەدەن ءوتىڭىز.
«اق بۇزاۋىم مەن سەنى قۋامىن، سەن جاناردىڭ ۇيىنە قاش»
كىتاپحاناعا «قانت الامىن» دەپ كەزەكسىز كىرىپ، كىتاپ الىپ شىققان قوجادان مۇعالىم «قاي سىنىپتا وقيسىڭ، اتىڭ كىم؟» دەگەندە «ون ءۇشىنشى سىنىپتا وقيمىن، اتىم چينگا-چكۋك» دەگەنى ەستەرىڭىزدە مە؟! ءيا، ءيا ەندىگى ءفيلمىمىز «مەنىڭ اتىم قوجا» تۋرالى بولماق. فيلم بەردىبەك سوقپاقباەۆتىڭ «مەنىڭ اتىم قوجا» پوۆەستىنىڭ جەلىسىمەن تۇسىرىلگەن. فيلمگە وتكەن عاسىردىڭ ەلۋىنشى جىلدارىنداعى قازاق اۋىلىنىڭ ءومىرى ارقاۋ بولعان. باستى كەيىپكەرى قوجا اقىلدى، سونىمەن بىرگە بۇزىق، اكەسىز وسكەن بالا. فيلم بارىسىندا قوجا عاشىق تا بولادى، توبەلەسەدى دە، بۇزىقتىق تا جاسايدى، ساباقتان دا قۋىلادى، جينالىستا ءتارتىبى قارالادى، مەكتەپتەن قۋىلۋعا شاق قالادى. ال مۇعالىمدەر راحمانوۆ مەن مايقانوۆالار ناعىز پەداگوگيكانىڭ وزىق ۇلگىسىن كورسەتكەن ماماندار ەدى. قوجا بولسا تارتىپسىزدىكتەرگە كەيدە سانالى تۇردە، كەيدە بىلمەستىكپەن بارادى. مۇعالىمدەر «ساباقتان قاشقان كىم-قوجا.سومكەگە باقا سالىپ قويعان كىم-قوجا. ماقتانشاق كىم-قوجا. مەكتەپ تاجىريبەسىنە بارماعان تاعى دا قوجا» دەپ رەنجيتىن. دەگەنمەن قوجا جامان بالا ەمەس ەدى..
قوجانى ساعىنساڭىز تومەندەگى سىلتەمەدەن ءوتىڭىز.
-مەن الدارمىن، الدارمىن،
ساقالىمدى تالدارمىن.
ساقال تۇگىل مۇرت تا جوق،
شايتاندى دا الدادىم – دەگەن ءاندى تالاي ەستىگەن بولارسىز..
سوزگە شەشەن اقىنىڭدى دا الدايتىن، جاس قىزدى شالدىڭ قۇرىعىنان الىپ قالاتىن، بۇلاقتىڭ سۋىن مەككەنىڭ سۋى دەپ بەرەتىن الدار كوسە تالاي جاندى الداسا دا، ادىلەتتىلىك ءۇشىن كۇرەسەتىن ەدى. قاي اۋىلعا بارساڭ دا، الداردىڭ ەسىمى ەل اۋزىنان تۇسپەيدى. ەزۋىڭىزگە كۇلكى ۇيىرەتىن ءفيلمدى كورۋگە كەڭەس بەرەمىز.
اقگۇل ايداربەكوۆا،
«ادىرنا» ۇلتتىق پورتالى
