شىمكەنت قالاسىنىڭ تۋريستىك نىساندارىنا قىزىعۋشىلىق كۇننەن كۇنگە ارتۋدا. بۇل جولى شىمقالاعا تۋريستىك ماقساتتا سولتۇستىك وڭىردەن ءبىر توپ باق وكىلدەرى كەلدى. ولاردىڭ قاتارىندا قوستاناي مەن پاۆلودار وبلىسىنان كەلگەن جۋرناليست، بلوگەرلەر بار.
باق وكىلدەرى ءۇشىن بۇل ساياحاتتى «Fly Arystan» اۋە كومپانياسىنىڭ قولداۋىمەن شىمكەنت قالاسىنىڭ تۋريزم باسقارماسى ۇيىمداستىردى.
وزگە وڭىردەن كەلگەن قوناقتار «قىلۋەت» ەتنوگرافيكالىق مۇراجايىنا، ۇلتتىق ونەردى دارىپتەگەن بەسبەكوۆتەر وتباسىنىڭ سۋرەت كورمەسىنە، ەسكى قالاشىق تسيتادەلگە، سونداي-اق اربات، ەتنواۋىل، بايدىبەك بي ەسكەرتكىشى سەكىلدى تانىمدىق ورىندار مەن كورىكتى جەرلەردى ارالادى.
مۇنان سوڭ تەرىسكەيلىك ارىپتەستەر قالا اكىمىنىڭ ورىنباسارى م.يساحوۆتىڭ قاتىسۋىمەن وتكەن كونفەرەنتسياعا قاتىستى.
«شىمكەنت - ۇلى جىبەك جولى بويىندا ورنالاسقان كونە شاھار. ول بۇكىل وڭتۇستىك ءوڭىر ءۇشىن تۋريستىك ورتالىق بولا الادى. سەبەبى مۇنداعى كليماتتىڭ الۋان تۇرلىلىگى، تۇركىستان، تاراز، تاشكەنت، سامارقاند سەكىلدى ءىرى تاريحي قالالاردىڭ جانىندا ءساتتى ورنالاسۋى قالاداعى ءتۋريزمنىڭ دامۋىنا ءوز ۇلەسىن قوسادى» - دەدى كونفرەنتسيادا ماقسۇت يساحوۆ.
ءوز كەزەگىندە تۋريست-جۋرناليستەر ۇيىمداستىرۋشىلارعا ءوز العىستارىن ءبىلدىردى.
شىمكەنت قالاسى اكىمىنىڭ ءباسپاسوز قىزمەتى
