بىلتىرعى جىلدىڭ قازان ايىندا قاستەر مۇساحان مەن مۇراگەر ءالىمۇلى ەسىمدى ازاماتتار قىتايدان قاشىپ قازاقستان شەكاراسىنا وتكەن بولاتىن. الايدا، ءبىر جىلعا جۋىق ۋاقىت وتسە دە ەكى قانداسىمىزدىڭ ماسەلەسى بىرجاقتى شەشىمىن تاپقان جوق.
بيىلعى جىلدىڭ قازانىندا ەكى ازاماتتىڭ «پانا ىزدەۋشى تۇلعا» كۋالىگىنىڭ مەرزىمى اياقتالادى. وسىعان وراي، ولار ادۆوكات باۋىرجان ازانوۆتان كومەك سۇراپ، ارنايى مالىمدەمە جاسادى.
-بىلتىرعى جىلدىڭ 14 قازانىندا وسى ىسكە كىرىسكەنمىن. تەرگەۋ امالدارى باستالماس بۇرىن مەن قىلمىستىق ءىستى قىسقارتىڭدار دەپ بىرنەشە رەت ايتتىم. ال بۇل ءوز كەزەگىندە ەكى ازاماتتىڭ بوسقىن مارتەبەسىن الۋىنا سەپتىگىن تيگىزەتىن ەدى. مەن ولارمەن العاشقى كەزدەسكەن كۇننەن شەكارانى جايدان-جاي كەسىپ وتپەگەندەرىڭدى، باستارىڭا تونگەن قاۋىپتى ايتىڭدار دەۋدەن جالىقپادىم. الايدا، ولار سوتتا «كىنالىمىز» (زاڭدىق تۇرعىدان), «شەكارانى بۇزىپ وتتىك» دەدى. باستارىنا تونگەن قاۋىپ-قاتەر تۋرالى ءتىس جارمادى. قىلمىستىق ءىس قىسقارتىلسىن دەگەن ءسوز سوتقا قاتىسۋشىلاردىڭ اۋزىنان شىقپاعان. شەكارانى بۇزىپ ءوتۋ دەگەنىمىز قازاقستاننىڭ زاڭناماسى بويىنشا قىلمىس بولىپ تابىلادى. ياعني، قىلمىسكەر دەپ تانىلدى. سوت ۇكىمى كۇشىنە ەنەتىن 15 كۇن ىشىندە اپپەلياتسيالىق شاعىم دا جازىلماعان. بۇل – سوت ۇكىمىمەن كەلىسكەننىڭ بەلگىسى. جاعدايدىڭ ۋشىعۋىنا باستى سەبەپ – وسى،- دەيدى پاۆلودار ادۆوكاتتار القاسىنىڭ مۇشەسى باۋىرجان ازانوۆ.
«پانا ىزدەۋشى كۋالىگىنىڭ» مەرزىمى اياقتالعان سوڭ جاعداي قالاي بولماق دەگەن ساۋالىمىزعا باۋىرجان ازانوۆ بىلاي دەدى:
-بۇل ەكى ازامات بوسقىن مارتەبەسىن العان جوق. مەنىڭ ماقساتىم قىلمىستىق ءىستى قىسقارتىپ، بوسقىن مارتەبەسىن الىپ بەرۋ بولاتىن. ماعان ونى ىستەۋگە مۇمكىنشىلىك بەرمەدى. مەنىڭ ويىمشا، كۋالىك مەرزىمى اياقتالعاننان كەيىن دەپورتاتسيالاۋ قاۋپى وتە جوعارى. ياعني، قازاقستاندا قالدىرمايدى. نە قىتايعا كەرى قايتارىلۋى مۇمكىن نەمەسە ساياسي باسپانا بەرۋشى ەل بولسا سول جاققا جونەلتىلەدى.
جاعداي قالاي ءوربىپ جاتىر دەگەن ماسەلە بويىنشا كىنالى دەپ تابىلعان مۇراگەر الىمۇلىنىڭ وزىمەن حابارلاسىپ كورگەن ەدىك.
– ءبىز قازىرگى تاڭدا ەشقانداي ادۆوكاتتان باس تارتقان جوقپىز. ءبىر جاعىنان قارجى ماسەلەسى دە قيىنشىلىق تۋدىرىپ تۇر. تەگىن قول ۇشىن سوزامىز دەگەن كەز كەلگەن قورعاۋشىنىڭ كومەگىنە جۇگىنۋگە ءازىرمىز. جاعدايدىڭ قازان ايىنان كەيىن قالاي ءوربۋى ناقتى ەمەس شىنى كەرەك. ەلىمىز، جەرىمىز دەپ كەلىپ وتىرعاننان كەيىن قىتايعا قايتارماسا ەكەن دەپ تىلەگىمىز بار. ەلدە قالعىمىز كەلەدى.
«ادىرنا» ۇلتتىق پورتالى
