قازاقستاندىق كوممۋنيستەر تۇرعىلىقتى جەرى جوق ادامدارعا كومەك كورسەتۋگە باعىتتالعان ءتۇرلى قىزمەتتەر مەن ۆەدومستۆولاردىڭ جۇمىسىن ۇيلەستىرۋگە مۇمكىندىك بەرەتىن جەكە زاڭ قاجەت دەگەن باستاما كوتەردى. بۇل تۋرالى كوكشەتاۋدا «حالىقتىڭ الەۋمەتتىك جاعىنان وسال توبى. پاندەميا كەزىندە تۋبەركۋلەزدىڭ تارالۋ ماسەلەسى، قاۋپى، تاۋەكەلى» تاقىرىبىمەن وتكەن دوڭگەلەك ۇستەل بارىسىندا تالقىلاندى.
«ءار ۆەدومستۆو ءوز جۇمىسىن وزىنشە جۇرگىزەدى. الايدا، ۆەدومستۆولار اراسىندا ۇيلەستىرۋ جەتىسپەيدى. ماسەلەن، دەنساۋلىق ساقتاۋ سالاسىنداعىلار ناۋقاستاردى ەمدەپ شىعارىپ، الەۋمەتتىك ورتاعا جىبەرەدى. كەيىن بۇل ادامدارعا ەشكىم قارامايدى دا، قايتا ناۋقاستانادى. ءسويتىپ، ءبارى قايتادان باسىنان باستالادى. سول سەبەپتى بارلىق ۆەدومستۆولار مەن ۇكىمەتتىك ەمەس ۇيىمداردىڭ، زاڭدى جانە جەكە تۇلعالاردىڭ باسىن بىرىكتىرەتىن زاڭ قاجەت»، - دەيدى قكحپ اقمولا وبلىستىق فيليالىنىڭ توراعاسى ولجاس سىزدىقوۆ.
قاڭعىباستار ۆيرۋستى تاراتۋشى توپ پا؟ مۇنداي پىكىر قاي كەزدە پايدا بولدى؟
تۋبەركۋلەز – جۇقپالى عانا ەمەس، سونىمەن قاتار ازاماتتاردىڭ الەۋمەتتىك وسال ساناتتارى اراسىندا جەدەل تارالاتىن اۋرۋ. قازاقستاندا حالىقتىڭ ەداۋىر بولىگى كەدەيلىك شەگىنەن تومەن دەڭگەيدە ءومىر ءسۇرىپ جاتىر. تابىسى تومەن ادامدار وزدەرىن قاجەتتى زاتتارمەن، ونىڭ ىشىندە ازىق-تۇلىك ونىمدەرىمەن، ۆيتاميندەرمەن جانە ءدارى-دارمەكپەن قامتاماسىز ەتە المايدى. وسى ورايدا السىرەگەن ادام اعزاسى قاۋىپتى ينفەكتسيالارعا تەز بەرىلەدى.
كوۆيدتان كەيىنگى كەزەڭ اسىرەسە الەۋمەتتىك تۇرعىدان دا، مەديتسينالىق تۇرعىدان دا تۋبەركۋلەزگە قاتىستى جاعدايدى ۋشىقتىردى. قاۋىپ-قاتەرگە ىلىنەتىن توپتا ءۇيسىز ادامدار، سوتتالعاندار، بالالار ءۇيىنىڭ تۇلەكتەرى عانا ەمەس، بۇعان دەيىن تۇراقتى تابىسى بولعان ادامدار دا بار. كارانتينگە بايلانىستى كوپتەگەن قازاقستاندىقتار جۇمىسىنان ايرىلدى. ياعني، قالىپتى ءومىر ءسۇرۋ، وتباسىلارىن اسىراۋ، تۇرعىن ءۇيدى جالعا الۋ مۇمكىندىگى دە تومەندەدى. ونىڭ ۇستىنە ۆيرۋستىڭ ءوزى دە رەسپيراتورلىق سيپاتقا يە.
– قازىرگى ۋاقىتتا ءۇيسىز ادامدار سانى ءوسۋ ۇستىندە. ءبىزدىڭ قالاداعى بەيىمدەلۋ ورتالىعى تەك 50 ادامدى عانا قابىلداي الادى. بىراق بۇل جەتكىلىكسىز. اسىرەسە قىس مەزگىلىندە، – دەدى كوممۋنيستەر.
جيىنعا قاتىسۋشىلار ءار اۋداندا وسىنداي ۇيىم اشىپ، بەيىمدەۋ قىزمەتىنىڭ جۇمىسىن ۇيلەستىرۋ تۋرالى ۇسىنىس جاسادى.
– كارانتين كەزىندە بەيىمدەۋ ورتالىقتارى ازاماتتاردىڭ وسال ساناتتارىن قابىلداعان جوق. ارينە، ولاردان پتر-گە ەشكىم تەست العان جوق. اۋرۋحانالارعا دا ەشكىم قابىلدامادى. ال اۋرۋدىڭ قاۋىپتىلىك توبى كەڭەيدى، – دەدى ولجاس سىزدىقوۆ.
دوڭگەلەك ۇستەل قورىتىندىسى بويىنشا ايتىلعان ۇسىنىمدار «حالىق كوممۋنيستەرى» پارلامەنتتىك فراكتسياسىنا جىبەرىلەتىن بولدى.
– وسى جىلدىڭ سوڭىنا دەيىن ءبىزدىڭ دەپۋتاتتار ءۇيسىز ادامدار تۋرالى زاڭ قابىلداۋ قاجەتتىگىن جەتكىزەدى دەپ ۇمىتتەنەمىن، – دەدى ولجاس سىزدىقوۆ. بۇل تۋرالى قازاقستان حالىق كوممۋنيستىك پارتياسى سايتىندا حابارلاندى.
فوتو اشىق دەرەككوزدەن الىندى.
اياۋلىم ءابىلدا
“ادىرنا” ۇلتتىق پورتالى
