قر ۇكىمەتى 2017 جىلى «تسيفرلىق قازاقستان» مەملەكەتتىك باعدارلاماسىن بەكىتكەن بولاتىن. بيىل وسى باعدارلاما اياسىندا شىمكەنت قالاسىنىڭ ەكونوميكالىق ءال-اۋقاتى مەن باسەكەگە قابىلەتتىلىگىن ارتتىرۋ، سونداي-اق قالا تۇرعىندارىنىڭ ءومىر ءسۇرۋ ساپاسىن جاقسارتۋ ماقساتىندا بىرنەشە سالادا جوسپارلى ءىس-ارەكەتتەر جۇزەگە اسىرىلدى.
ينتەرنەت جەلىسىمەن تولىق قامتۋ. شىمكەنت ەلىمىزدىڭ ماڭىزدى قالالارىنىڭ ءبىرى ستاتۋسىنا يە بولعالى تسيفرلاندىرۋ جۇمىستارىنا ەرەكشە نازار اۋدارىلىپ، قالا 80%-عا ساپالى ينتەرنەت جەلىسىمەن قامتىلدى. بۇل كورسەتكىش 100 %-عا جەتۋى ءۇشىن بازالىق ستانتسيالار تولىق ورناتىلىپ ءبىتۋى ءتيىس.
وسى كۇنگە دەيىن 105 شاعىناۋدان مەن تۇرعىن الاپتارى ينتەرنەت جەلىسىمەن قامتاماسىز ەتىلگەن. ءموبيلدى ينتەرنەتكە – 74, سىمدى ينتەرنەتكە – 79, تالشىقتى-وپتيكالىق بايلانىس ارناسىنا 49 شاعىناۋدان قول جەتكىزگەن.
الداعى ۋاقىتتا قالانى 5G جەلىسىمەن قامتاماسىز ەتۋ قاراستىرىلۋدا.
مەملەكەتتىك قىزمەتتى وڭتايلاندىرۋ. وتكەن جىلى قالا اكىمدىگى ۇسىناتىن 195 مەملەكەتتىك قىزمەتتىڭ 179-ى وڭتايلاندىرىلعان. 2021 جىلعا دەيىن بۇل سالانىڭ 90%-ىن تسيفرلاندىرۋ جوسپارلانعان.
مەديتسينالىق كومەك. كوروناۆيرۋس تۋرالى ناقتى اقپارات تاراتاتىن ارنايى https://covid19shymkent.kz/ اقپاراتتىق پورتالى ىسكە قوسىلدى. سايت ارقىلى قالا تۇرعىندارى پنەۆمونيا جانە جرۆي-مەن اۋىراتىن ناۋقاستار سانى، تاۋلىك ىشىندە اۋرۋحاناعا تۇسكەن جانە ەمدەلىپ شىققان ناۋقاستار سانى تۋرالى اقپارات بىلە الادى.
سونداي-اق سايتتا بىلىكتى دارىگەرلەر بەينە-بريفينگتەر وتكىزىپ، حالىققا اۋرۋدىڭ الدىن الۋ جانە ونىڭ بەلگىلەرى جايلى كەڭ ماعلۇمات بەرەدى. بۇدان بولەك مەديتسينالىق مەكەمەلەر مەن پروۆيزورلىق ورتالىقتاردىڭ مەكەن-جايلارى مەن تەلەفوندارى تۋرالى اقپاراتتى تابۋعا بولادى.
تەك كورونوۆيرۋس ينفەكتسياسىنىڭ تارالۋىنا قاتىستى عانا ەمەس وزگە دە مەديتسينالىق كومەكتەردى ونلاين الۋ ماقساتىندا شىمكەنتتىڭ بىلىكتى دارىگەرلەرى 1430.kz سايتى ارقىلى تەگىن كەڭەس بەرۋگە كوشتى. وسى سايتقا تىركەلە وتىرىپ، حالىق جەرگىلىكتى ەمحانالاردىڭ دارىگەرلەرىنەن ونلاين كەڭەس پەن العاشقى مەديتسينالىق كومەك الۋىنا بولادى. قازىردە سايتقا حيرۋرگ، تراۆموتولوگ، ۋرولوگ، گينەكولوگ سىندى جەتپىسكە جۋىق مامان تىركەلگەن. مۇنداي Start-Up جوبا بۇعان دەيىن نۇر-سۇلتان مەن الماتى قالالارىندا جۇزەگە اسقان.
ءبىلىم سالاسى تسيفرلانۋدا. پاندەمياعا بايلانىستى بيىل وقۋ پروتسەسى ونلاين رەجيمگە وتەتىندىكتەن قالاداعى ءبىلىم بەرۋ ۇيىمدارى جوعارى ساپاداعى ينتەرنەتپەن قامتاماسىز ەتىلۋدە. تاياۋدا شىمكەنت قالاسىنىڭ تسيفرلاندىرۋ باسقارماسى باسشىسىنىڭ مىندەتىن اتقارۋشى دوسان الىبەكوۆ ءباسپاسوز بريفينگىندە قالانىڭ ءبىلىم سالاسى تولىق تسيفرلانعانىن مالىمدەدى. سونداي-اق ول ءوز سوزىندە: «ءبىلىم سالاسى – ەڭ ماڭىزدى الەۋمەتتىك سالانىڭ ءبىرى. بيىل ءبىلىم سالاسى تولىق اۆتوماتتاندىرىلدى. بالالالاردى ءبىلىم ۇيىمدارىنا قابىلداۋ تولىق ەلەكتروندى فورماتتا جۇزەگە استى. سونداي-اق، تەحنيكالىق جانە كاسىپتىك ءبىلىم بەرۋ ۇيىمدارىنا قابىلداۋ، وتباسى جانە بالالارعا قاتىستى قىزمەتتەر، تاعى باسقا قىزمەتتەر تولىق اۆتوماتتاندىرىلدى. قالا اۋماعىن جوعارى جىلدامدىقتى جانە قۋاتتى ينتەرنەت جەلىسىمەن قامتاماسىز ەتۋ ماقساتىندا بۇگىندە 11 بازالىق ستانتسيا ورناتىلۋدا. ولاردى ورناتاتىن 11 ورىن بويىنشا دا قالادا زاڭداستىرۋ جۇمىستارى اياقتالدى. شىمكەنت قالاسىنىڭ اۋماعىنا كىرەتىن بارلىق شالعايداعى ەلدىمەكەندەردى جوعارى ساپاداعى ينتەرنەتپەن قامتۋ ءۇشىن قوسىمشا 43 نۇكتەگە تالداۋ جۇمىستارى جۇرگىزىلدى. قىركۇيەك، قازان ايلارىندا بازالىق ستانتسيالاردىڭ جۇمىسىن ىسكە قوسۋ جۇمىستارى اياقتالادى»، – دەپ وڭ وزگەرىستەرمەن تانىستىردى.
الداعى ۋاقىتتا وزگە سالالاردىڭ دا جۇمىسىن ۋاقىت تالابىنا بەيىمدەۋ ماقساتىندا «تسيفرلىق قازاقستان» مەملەكەتتىك باعدارلاماسى اياسىندا جوسپارلى ءىس-ارەكەتتەر اتقارىلادى.
فوتو اشىق دەرەككوزدەن الىندى.
ايجان پەردەبەكقىزى،
«ادىرنا» ۇلتتىق پورتالى
