QR Ükımetı 2017 jyly «Sifrlyq Qazaqstan» memlekettık baǧdarlamasyn bekıtken bolatyn. Biyl osy baǧdarlama aiasynda Şymkent qalasynyŋ ekonomikalyq äl-auqaty men bäsekege qabılettılıgın arttyru, sondai-aq qala tūrǧyndarynyŋ ömır süru sapasyn jaqsartu maqsatynda bırneşe salada josparly ıs-äreketter jüzege asyryldy.
İnternet jelısımen tolyq qamtu. Şymkent elımızdıŋ maŋyzdy qalalarynyŋ bırı statusyna ie bolǧaly sifrlandyru jūmystaryna erekşe nazar audarylyp, qala 80%-ǧa sapaly internet jelısımen qamtyldy. Būl körsetkış 100 %-ǧa jetuı üşın bazalyq stansiialar tolyq ornatylyp bıtuı tiıs.
Osy künge deiın 105 şaǧynaudan men tūrǧyn alaptary internet jelısımen qamtamasyz etılgen. Mobildı internetke – 74, symdy internetke – 79, talşyqty-optikalyq bailanys arnasyna 49 şaǧynaudan qol jetkızgen.
Aldaǧy uaqytta qalany 5G jelısımen qamtamasyz etu qarastyryluda.
Memlekettık qyzmettı oŋtailandyru. Ötken jyly qala äkımdıgı ūsynatyn 195 memlekettık qyzmettıŋ 179-y oŋtailandyrylǧan. 2021 jylǧa deiın būl salanyŋ 90%-yn sifrlandyru josparlanǧan.
Medisinalyq kömek. Koronavirus turaly naqty aqparat taratatyn arnaiy https://covid19shymkent.kz/ aqparattyq portaly ıske qosyldy. Sait arqyly qala tūrǧyndary pnevmoniia jäne JRVİ-men auyratyn nauqastar sany, täulık ışınde auruhanaǧa tüsken jäne emdelıp şyqqan nauqastar sany turaly aqparat bıle alady.
Sondai-aq saitta bılıktı därıgerler beine-brifingter ötkızıp, halyqqa aurudyŋ aldyn alu jäne onyŋ belgılerı jaily keŋ maǧlūmat beredı. Būdan bölek medisinalyq mekemeler men provizorlyq ortalyqtardyŋ meken-jailary men telefondary turaly aqparatty tabuǧa bolady.
Tek koronovirus infeksiiasynyŋ taraluyna qatysty ǧana emes özge de medisinalyq kömekterdı onlain alu maqsatynda Şymkenttıŋ bılıktı därıgerlerı 1430.kz saity arqyly tegın keŋes beruge köştı. Osy saitqa tırkele otyryp, halyq jergılıktı emhanalardyŋ därıgerlerınen onlain keŋes pen alǧaşqy medisinalyq kömek aluyna bolady. Qazırde saitqa hirurg, travmotolog, urolog, ginekolog syndy jetpıske juyq maman tırkelgen. Mūndai Start-Up joba būǧan deiın Nūr-Sūltan men Almaty qalalarynda jüzege asqan.
Bılım salasy sifrlanuda. Pandemiiaǧa bailanysty biyl oqu prosesı onlain rejimge ötetındıkten qaladaǧy bılım beru ūiymdary joǧary sapadaǧy internetpen qamtamasyz etılude. Taiauda Şymkent qalasynyŋ Sifrlandyru basqarmasy basşysynyŋ mındetın atqaruşy Dosan Älıbekov baspasöz brifingınde qalanyŋ bılım salasy tolyq sifrlanǧanyn mälımdedı. Sondai-aq ol öz sözınde: «Bılım salasy – eŋ maŋyzdy äleumettık salanyŋ bırı. Biyl bılım salasy tolyq avtomattandyryldy. Balalalardy bılım ūiymdaryna qabyldau tolyq elektrondy formatta jüzege asty. Sondai-aq, tehnikalyq jäne käsıptık bılım beru ūiymdaryna qabyldau, otbasy jäne balalarǧa qatysty qyzmetter, taǧy basqa qyzmetter tolyq avtomattandyryldy. Qala aumaǧyn joǧary jyldamdyqty jäne quatty internet jelısımen qamtamasyz etu maqsatynda bügınde 11 bazalyq stansiia ornatyluda. Olardy ornatatyn 11 oryn boiynşa da qalada zaŋdastyru jūmystary aiaqtaldy. Şymkent qalasynyŋ aumaǧyna kıretın barlyq şalǧaidaǧy eldımekenderdı joǧary sapadaǧy internetpen qamtu üşın qosymşa 43 nüktege taldau jūmystary jürgızıldı. Qyrküiek, qazan ailarynda bazalyq stansiialardyŋ jūmysyn ıske qosu jūmystary aiaqtalady», – dep oŋ özgerıstermen tanystyrdy.
Aldaǧy uaqytta özge salalardyŋ da jūmysyn uaqyt talabyna beiımdeu maqsatynda «Sifrlyq Qazaqstan» memlekettık baǧdarlamasy aiasynda josparly ıs-äreketter atqarylady.
Foto aşyq derekközden alyndy.
Aijan PERDEBEKQYZY,
«Adyrna» ūlttyq portaly
