پەدوفيلدەردىڭ تۇرمەدەگى ءومىرى «جۇماققا» اينالا باستاعان

4503

پارامەن ۇستالعان جانە بالا زورلاپ تۇرمەگە تۇسكەندەردىڭ تەمىر توردىڭ ارعى بەتىندەگى ءومىرى قانداي؟ اباقتىدان شىققان سوڭ، مۇنداي قىلمىسكەرلەر وسى قاتەسىن قايتا جاساماۋعا بارىنشا كۇش سالا ما؟ شارتتى جازامەن تۇرمەدەن شىققان پاۆلودارلىق  شەنەۋنىك وسى سۇراقتاردىڭ جاۋابىن تارقاتىپ ايتىپ بەردى دەپ جازادى، Ratel.kz. سايتى.  

سۇحباتتاسۋشى جەمقورلىققا بايلانىستى ءىستى بولعان شەنەۋنىك، بۇرىندارى قوعامداعى ءتۇرلى ماسەلەلەرگە بايلانىستى ەركىن پىكىر بىلدىرەتىن. الايدا ءىستى بولىپ، قاماۋدان شىققان سوڭ، ءوزىنىڭ اتى-ءجونىن ايتۋدان باس تارتتى.

پەدوفيلدەر كولونيادا ەليتا قاتارىنا كىرە مە؟

- ەلىمىزدە بالالار قاۋىپسىزدىگى ماسەلەسىنە ۇلكەن كوڭىل بولىنەدى دەگەن ءۇمىت بار. بالالارعا زورلىق كورسەتكەن قىلمىسكەردىڭ جازاسى قاتاڭداتىلسا دا، ءالى كۇنگە بالاعا كۇش كورسەتىپ، بالانى جىنىستىق قاتىناسقا كۇشتەپ سالۋ ارەكەتتەرى ازايماي تۇر. 

- بۇرىندارى تۇرمەدە پەدوفيلدەر وتە از بولاتىن. سونىمەن قاتار پەدوفيلدەر تۇرمەگە تۇسۋگە ولەردەي قورقاتىن. ويتكەنى بالا زورلاپ قاماۋعا الىنعان قىلمىسكەردىڭ ءوزىن تۇرمەدە زورلاپ، ازاپتايتىن. قالا بەردى، ونداي قىلمىسكەردىڭ قولىنان ەدەن جۋعىش شۇبەرەگى تۇسپەيتىن. تۇرمەدەگى بۇكىل ءومىرى ەدەن جۋىپ، باسقالارعا قىزمەت كورسەتۋمەن وتەتىن. ال قازىر مۇنداي جوق. بارلىق زونادا «قىزىل» رەجيم ورناتىلعان، ەدەندى ءبولىم كەزەكشىسى جۋادى. ال ەگەر كەزەكشى جۋعىسى كەلمەسە، تەمەكى بەرىپ، ورنىنا باسقانى جالدايدى. قازىر پەدوفيلدەر زونادان قورىقپايدى. ولاردا «ۋدو» دا جوق. «ۋدو» بولماعان سوڭ، مەيلىنشە قاۋىپسىز جاعدايدا جازاسىن وتەيدى. كەيبىرى 25 جىلعا باس بوستاندىعىنان ايىرىلىپ كەلەدى.

قازىر تۇرمەدە بىرەۋدى ۇرىپ-سوعۋعا بولمايدى.  قاراعاندى، الماتى، پاۆلودارداعى تۇرمەلەردە ۇرىپ-سوعۋعا بايلانىستى شۋ شىعىپ، كولونيانىڭ كوپتەگەن قىزمەتكەرى جاۋاپقا تارتىلعان ەدى. وسى جاعدايدان كەيىن قازىر قاماۋداعى ادامدى ۇرۋعا تۇرمە قىزمەتكەرلەرى قورقادى دا. مىنە، وسىنداي جاعدايدان كەيىن تۇرمەدەگى پەدوفيلدەر ءتىپتى ەركىنسىپ كەتكەن قازىر. اناۋ- مىناۋ تارتىپكە دە باعىنا بەرمەيدى. شاعىم جاساماسىن دەپ پەدوفيلدەرگە تۇرمە اكىمشىلىگى ءتۇرلى جەڭىلدىك جاساپ، تۇرمەدە جاقسىراق ءومىر سۇرۋىنە ىقپال دا ەتەدى. بۇلاي كەتە بەرسە، كوپ ۇزاماي پەدوفيلدەردىڭ تۇرمەدەگى ەليتاسى پايدا بولارى انىق. ناقتى ستاتيستيكادا پەدوفيلدەردىڭ سانى كورسەتىلە بەرمەيدى. ال مۇندايلار جىل ساناپ كوبەيىپ بارا جاتىر. مىسالى، 2019 جىلى ءبىزدىڭ لاگەرگە 53 پەدوفيل ءتۇستى. ال بيىلعى تامىز ايىندا ولاردىڭ سانى 59 بولدى. زونا پەدوفيلدى تۇزەمەيدى، بىراق وندايلاردىڭ كۇن ساناپ كوبەيۋىنە دە توسقاۋىل بولا المايدى.

- حيميالىق كاستراتسيا شە?

- كاستراتسيا ماسەلەسى تەك قاعاز جۇزىندە عانا. پەدوفيل ەگەر وزىنە كاستراتسيا جاسايتىن بولسا، اسىلىپ قالام دەپ تۇرمە باسشىسىن قورقىتادى. تۇرمە باسشىسى ونىڭ ولىمىنە جاۋاپ بەرمەۋ ءۇشىن ايتقانىن ورىنداۋىنا تۋرا كەلەدى.

مەنىڭشە، پەدوفيلدەردى بولەك لاگەرگە وتىرعىزىپ، وندايلارعا زەرتتەۋ جۇرگىزۋ كەرەك. ەشكىم دە پەدوفيلدەرگە زەرتتەۋ جاساپ جاتقان جوق. زەرتتەۋ بولماعان سوڭ، بالا زورلاۋدىڭ الدىن الۋ شارالارىن قالاي جۇرگىزۋگە بولادى؟ پەدوفيلدەر ءارتۇرلى بولادى. ءوز بالاسىن، نەمەرەسىن زورلاعاندار بار.

سوڭعى رەت وزدەرىنىڭ التى قارىنداسىن ايۋانشا ازاپتاعان ەكى ەركەك ءتۇستى. بەس جىلعى ارەكەتتەرى 26 ەپيزودتى قۇراعان. ارينە، تۇرمەگە تۇسكەن العاشقى ۋاقىتتا ولار وزدەرىنىڭ كىناسىز ەكەنىن ايتىپ، اقتالادى. ۋاقىت وتە كەلە، بۇل ارەكەتكە نە سەبەپتى بارعاندارىن دا ايتا باستايدى. نەگە پەدوفيلدەرمەن سۇحباتتار جۇرگىزىلىپ، ولاردىڭ تابيعاتىن زەرتتەۋ قولعا الىنبايدى؟ مۇنداي لاس ارەكەتكە نە سەبەپتى بارعاندارىن نەگە انىقتاماسقا؟ بۇل اۋرۋ ما، نە نارسە ەكەنى نەگە زەرتتەلمەيدى؟

 VIP قىلمىسكەرلەر مەن  بيشىمباەۆ تۋرالى

- جاقىندا جەمقورلىققا قاتىستى زاڭ قاتايتىلىپ، وندايلارعا ەندى مەرزىمىنەن بۇرىن شارتتى تۇردە بوساتۋ جازاسى بولمايدى دەپ كۇتىلۋدە.

- جەمقورلار ءۇشىن زاڭدا «جەلدەتكىش» دەپ اتالاتىن ءبىر «مايشەلپەك» بار. ياعني، رەجيمىڭدى جالپى رەجيمگە اۋىستىرساڭ، قالعان ۋاقىتىڭ «ۋدو» بولادى. بۇل «جەلدەتكىشتى» پارا الۋ بابىنىڭ ەڭ اۋىر جازاسىنا كەسىلگەندەرگە دە قولدانۋىنا بولاتىنىن قۋاندىق بيشىمباەۆ تۇرمەگە تۇسكەندە بىلدىك. قۋاندىق تۇرمەگە تۇسكەندە وسىنداي «جەلدەتكىشتىڭ» بارىن ءبىلىپ كەلگەن سياقتى. بۇلاي بولۋى مۇمكىن ەمەس دەپ داۋلاسقام دا. سويتسەك، راسىمەن بار ەكەن. بارىنشا قاۋىپسىز كولونيادا «جەلدەتكىش» جەڭىلدىگى بەرىلمەيدى ەكەن دە، ال جەمقورلارعا بۇل باپتى پايدالانۋىنا زور مۇمكىندىك بەرىلگەن ەكەن. ەگەر جەمقورلىققا قاتىستى زاڭدى قاتايتسا، وندا نەگە «جەلدەتكىش» ارقىلى جەڭىلدىك بەرىلگەن؟ بۇل تۋرالى ەشكىم ايتپايدى، جازبايدى.

- ءىرى شەنەۋنىكتەرگە ارنالعان لاگەردەگى VIP كامەرالاردىڭ جاعدايى قالاي؟ راسىمەن جويىلدى ما؟

- كامەرا تيپتەگى كولونيا تەك قىزىلوردادا عانا بار. ليۋكس پا، باسقا ما، ەڭ باستىسى، كوپشىلىكتەن الىس، جەكەدە بولۋ عوي. بقو سپورت ءبولىمى باسشىسى ءمۇسلىم وڭداعانوۆتىڭ كامەراداعى سۋرەتتەرىن كوردىم. الدىندا اسىلعان ەت، شاراپتار. تالعات ەرمەگياەۆكە قاتىستى داۋلى وقيعادان كەيىن وسىلاي ەركىنسۋگە بولا ما؟ ەرمەگياەۆتىڭ كىم ەكەنىن ەل بىلەدى. ەرمەگياەۆتىڭ قولداۋشىلارى كىم ەكەنىن دە ەل بىلەدى عوي. سول سۋرەتتەن كەيىن تۇرمەدەگى ونداي كامەرالار جابىلدى. قاتاڭ باقىلاۋ ورناتىلدى. قازىر مەملەكەتتىك قىزمەتكەر مەن VIP تۇلعالاردىڭ قايدا، قانداي جاعدايدا وتىرعانى تۋرالى ءتىزىم جاسالىپ، ءجيى تەكسەرىلەدى. تەكسەرۋشىلەر ەسكەرتپەي كەلەتىن. قانداي تاماق ءىشىپ، نە كيىپ العانىمىزدى، ءتىپتى شاشىمىزدىڭ قانداي ۇلگىمەن قيىلعانىنا دەيىن ءمان بەرىپ، تەكسەرىپ كەتەتىن. ياعني، قازىر VIP كامەرالار راسىمەن جوق دەۋگە بولادى.

كولونيانىڭ پايداسى

- قازىر بارلىق كولونيالار «قىزىل» رەجيمدە. كارانتيننەن كەيىن بىرتىندەپ سىرتقا شىعۋعا مۇمكىندىك بەرىلە باستادى. ءبىز ءبارىمىز كوروناۆيرۋسپەن اۋىردىق. بىراق ونى ءوزىمىز بىلمەدىك. مەنىڭ ءدام، ءيىس سەزۋىم جوعالىپ، السىزدىك باسىپ، سۇيەكتەرىم سىرقىرادى. تۋىستارىمىزبەن كەزدەسۋگە تىيىم سالىندى.

سالەمدەمەلەر كونۆويرمەن جەتكىزىلدى. ەگەر لاگەردەگى ءبىزدىڭ اۋىرعانىمىزدى رەسمي تىركەسە، نە بولار ەدى، قالاي ويلايسىز؟ دۇرىس تاماق جوق، ءدارى جوق، ارا قاشىقتىقتى ساقتاۋ مۇمكىن ەمەس، وقشاۋلاۋ مۇمكىن ەمەس. الايدا كولونيادا تاجىريبەلى زەكتەر بار عوي. سولاردىڭ كەڭەسىمەن «بويارسكي»، «كرەپاك» دەپ اتالاتىن قويۋ شايدى ۇزبەي ىشتىك. نە ءۇشىن؟ ءاسپيريننىڭ ورنىنا ىشتىك، قان جۇرگىزۋى ءۇشىن. كوبىسى اياقتارىن ىستىق سۋعا سالىپ، قان قىسىمىن تومەندەتسە، ەندى ءبىرى قان تازالاۋ ءادىسىن جاسادى. دەنەنى الماسپەن ۇساقتاپ ءتىلىپ، شىققان قاندى ۆاكۋممەن سورۋ ارقىلى لاس قاننان ارىلۋدىڭ بۇل ءادىسىن مۇسىلمان ەمى دەپ اتايدى.

كولونيانىڭ بەرگەن ەڭ ۇلكەن پايداسى نە، بىلەسىز بە؟دوستارىمنىڭ  90 پايىزىن جوعالتتىم. ءبارى مەنەن تەرىس اينالدى. بۇرىن ارالاسقان دوستارىم ەدى، ولارعا تالاي رەت كومەكتەسكەن ەدىم. وكىنىشتىسى، جوعالتقان سول دوستارىم شەنەۋنىك نەمەسە سوت شەنىندەگىلەر ەمەس، مەن دوس ساناعان ادامدار ەدى. قازىر تەك سىنىپتاس جانە جاس كەزىمدە ارالاسقان دوستارىم مەن كەيبىر جۋرناليستەر عانا مەنى قولدايدى. باسقاسىنىڭ ءبارى كەتتى.

ماتەريالدى ورىس تىلىنەن اۋدارىپ دايىنداعان:

مەرۋەرت حۋساينوۆا.

«ادىرنا» ۇلتتىق پورتالى.

فوتو اشىق دەرەككوزدەن الىندى.

پىكىرلەر
رەداكتسيا تاڭداۋى