قازاقستاندىق وقۋشى حالىقارالىق وليمپيادادا كۇمىس مەدال الدى

2049
Adyrna.kz Telegram

قازاقستاننىڭ قۇراما كومانداسى ينفورماتيكا بويىنشا حالىقارالىق وليمپياداعا (International Olympiad in Informatics – IOI 2020) قاتىستى، دەپ حابارلايدى "ادىرنا" قر ءبىلىم جانە عىلىم مينيسترلىگىنىڭ ءباسپاسوز قىزمەتىنە سىلتەمە جاساپ.

IOI 2020 ناتيجەلەرى بويىنشا وسكەمەن قالاسى «ءبىلىم-يننوۆاتسيا» مامانداندىرىلعان ليتسەيىنىڭ تۇلەگى بايبولوۆ تەمىرلان كۇمىس مەدال جەڭىپ الدى.

بيىل جارىسقا 80-نەن استام ەلدىڭ وقۋشىلارى قاتىستى. قازاقستاندىق كوماندانىڭ قۇرامىنا ينفورماتيكا ءپانى بويىنشا رەسپۋبليكالىق وليمپيادا جانە ىرىكتەۋ تۋرىنىڭ ناتيجەلەرى بويىنشا جەڭىمپاز اتانعان 4 وقۋشى كىردى.

ينفورماتيكا بويىنشا حالىقارالىق دودا اياسىنداعى ينتەللەكتۋالدى بىرىنشىلىكتە بۇكىل الەمنىڭ جاس پروگرامميستەرى جينالاتىنىن ايتا كەتكەن ءجون. اتالعان وليمپيادا كۇللى الەم بويىنشا اقپاراتتىق تەحنولوگيالار سالاسىندا جاقسى كورسەتكىشتەرگە قول جەتكىزگەن دارىندى وقۋشىلاردى انىقتاۋ جانە قولداۋ ماقساتىندا ۇيىمداستىرىلعان.

"ادىرنا" ۇلتتىق پورتالى

پىكىرلەر