مەملەكەت باسشىسى قاسىم-جومارت توقاەۆ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆتى قابىلدادى، دەپ حابارلايدى "ادىرنا" ءتىلشىسى اقورداعا سىلتەمە جاساپ.
قازاقستان پرەزيدەنتىنە سىبايلاس جەمقورلىققا قارسى ءىس-قيمىل اگەنتتىگىنىڭ بيىلعى 9 اي ىشىندە اتقارعان جۇمىستارىنىڭ نەگىزگى كورسەتكىشتەرى جونىندە ەسەپ بەرىلدى.
مەملەكەت باسشىسىنا جەمقورلىققا قارسى زاڭناماعا تۇزەتۋ ەنگىزىلگەنى جانە دۇنيەجۇزىلىك بانكتىڭ جەمقورلىقتى باقىلاۋ يندەكسىندەگى ەلىمىزدىڭ كورسەتكىشى ايتارلىقتاي جاقسارعانى تۋرالى باياندالدى.
قاسىم-جومارت توقاەۆ قازاقستاننىڭ جەمقورلىققا قارسى ساياساتىن حالىقارالىق ستاندارتتارعا سايكەس كەشەندى ءارى دايەكتى تۇردە جاڭعىرتۋدى جالعاستىرۋدىڭ ماڭىزدى ەكەنىن اتاپ ءوتىپ، جەمقورلاردى شارتتى تۇردە مەرزىمىنەن بۇرىن بوساتۋدان باس تارتۋ تۋرالى تاپسىرمالاردىڭ ساپالى جۇزەگە اسىرىلۋ جانە مەملەكەتتىك قىزمەتشىلەر، دەپۋتاتتار مەن سۋديالار ءۇشىن شەتەلدىك شوتتارىنىڭ بولۋىنا تىيىم سالۋ قاجەتتىگىنە نازار اۋداردى.
كەزدەسۋ سوڭىندا پرەزيدەنت الدىن الۋ جۇمىستارىن ءتيىمدى جۇرگىزۋدىڭ جانە بيۋدجەت قارجىسىنىڭ ماقساتتى جۇمسالۋىنا جۇيەلى باقىلاۋ جاساۋدىڭ ماڭىزدى ەكەنىن ايتتى. بۇل پاندەميا كەزىندە وتە وزەكتى بولىپ تابىلادى.
"ادىرنا" ۇلتتىق پورتالى
