14-قازان، سارسەنبى كۇنى اقتوبە وبلىسىنىڭ اكىمى وڭداسىن ورازالين جۇمىس ساپارىمەن قارعالى اۋدانىندا بولدى، دەپ حابارلايدى "ادىرنا" ۇلتتىق پورتالى.
ايماق باسشىسى بادامشاداعى جولداردىڭ جوندەۋىن قارادى. اۋداندا “ جۇمىسپەن قامتۋدىڭ جول كارتاسى” باعدارلاماسى بويىنشا بيىل 10 جوبا ىسكە اسىرىلادى. اۋدان ورتالىعىندا 9 كوشەگە اسفالت توسەلىپ، 7 كوشە جارىقتاندىرىلعان. قاۋىپسىزدىكتى قامتاماسىز ەتۋ ماقساتىندا جولدارعا بەينەباقىلاۋ ورناتىلدى. كوپقاباتتى تۇرعىن ۇيلەردىڭ 6 اۋلاسىنا جوندەۋ جۇرگىزىلىپ، ويىن الاڭدارى پايدا بولدى. قارعالى اۋدانىندا 2021 جىلى قوسىمشا 8 اۋلانى جوندەۋ جوسپارلانىپ وتىر. سونداي-اق، وبلىس اكىمى مەملەكەتتىك باعدارلاما بويىنشا 70 ورىندىق ينتەرناتپەن بىرگە سالىنىپ جاتقان 300 بالاعا ارنالعان مەكتەپتىڭ قۇرىلىسىن باقىلادى. وڭداسىن ورازالين اتالعان قۇرىلىستىڭ ساپاسىن باقىلاي وتىرىپ، جىل سوڭىندا اياقتاۋدى تاپسىردى. ءوڭىر باسشىسى بۇدان سوڭ قوس ەستەك اۋىلىندا بولدى. جقجك-سى بويىنشا قۇنى 57 ملن تگ كۇردەلى جوندەۋدەن وتكەن بالاباقشانىڭ جاعدايىمەن تانىستى. سالىنعانىنا 30 جىلدان استام ۋاقىت بولعان مەكتەپكە دەيىنگى مەكەمە زامان تالابىنا ساي جابدىقتالىپ، قاجەتتى ماتەريالدارمەن قامتىلعان.
قوس ەستەك اۋىلدىق اكىمدىگى بيىلعى جىلى مەملەكەتتىك باعدارلاما اياسىندا بوي كوتەرگەن جاڭا عيماراتقا قونىستاندى. مۇندا اكىمدىك قىزمەتكەرلەرىنەن وزگە، ۋچاسكەلىك پوليتسيا ءبولىمى مەن ۆەتەريناريا ماماندارى دا ورنالاساتىن بولادى. نىساندى سالۋعا 35 ملن تگ قارجى قارالدى. وتكەن جىلى جقجك بويىنشا اۋىلدىق كلۋب پايدالانۋعا بەرىلسە، بيىل تۇرعىنداردىڭ دەمالۋىنا ارنالعان ساياباق سالىندى. اۋىلدىق وكرۋگتەگى 4 كوشە جوندەلىپ، جارىقتاندىرىلدى. كوشەلەردى قالىپقا كەلتىرۋ جۇمىستارى ودان ءارى جالعاسىپ، اۋىلعا كىرەبەرىس جول قۇرىلىسى قارقىن الدى. ايتىپ وتەيىك باعدارلاما اياسىندا قارعالى اۋدانىندا 200-گە جۋىق ازامات ۋاقىتشا مەرزىمدى جۇمىسپەن قامتىلدى.
“مەملەكەت باسشىسىنىڭ تاپسىرماسىمەن «جۇمىسپەن قامتۋ 2020 جول كارتاسى» باعدارلاماسى ىسكە اسىرىلىپ وتىر. باعدارلاما حالىقتى جۇمىسپەن قامتۋ ماسەلەلەرىن جەدەل شەشۋ جانە قوسىمشا جۇمىس ورىندارىن قۇرۋعا، الەۋمەتتىك، ينجەنەرلىك-كولىكتىك ينفراقۇرىلىمدى جانە تۇرعىن ءۇي-كوممۋنالدىق شارۋاشىلىقتى دامىتۋ، ەلدى مەكەندەردى اباتتاندىرۋ بويىنشا ينفراقۇرىلىمدىق جوبالاردى ىسكە اسىرۋ ەسەبىنەن جۇمىسسىز ازاماتتار سانىنىڭ وسۋىنە جول بەرمەۋدى كوزدەيدى، جوسپارلانعان جوبالار ساپالى، ۋاقىتىلى ىسكە اسىرىلۋى قاجەت”،- دەگەن وبلىس اكىمى اۋدان باسشىسى اسقار جۇسىباليەۆكە الداعى جىلى دا كوشەلەردى اسفالتتاۋ جۇمىستارىن بەلسەندى جۇرگىزۋدى تاپسىردى.
