قازاققا قاۋىپتى مۋلتفيلمدەر

3747
Adyrna.kz Telegram

بالالارعا تولىق تاربيەنى اتا-انا بەرەدى دەپ ايتا المايمىز. بالا ساناسىنىڭ قالىپتاسۋىندا جانە دامۋىندا ونىڭ كورگەن مۋلتفيلمدەرى ەرەكشە ورىن الاتىندىعى بارىمىزگە ءمالىم. ورتا ەسەپپەن العاندا بالالاردىڭ كەمىندە 1-2 ساعاتى تەلەديدار جانە ۇيالى تەلەفوننان مۋلتفيلم كورۋمەن وتەدى ەكەن. بارلىق دەرلىك مۋلتفيلمدەردى جاقسى دەۋگە كەلمەگەنىمەن، پايداسىنان زيانى كوپ بولعانىنا قاراماستان قازىرگى تاڭدا بالالاردىڭ سۇيىكتى مۋلتفيلمىنە اينالىپ وتىر. ەرەسەك ادامدار كورسە تۇسىنبەيتىن، بالالار بار  ۋاقىتىن ارنايتىن مۋلتفيلمدەرگە ءۇڭىلىپ، زەر سالىپ كورەيىك.

سپانچ بوب:

100 مىڭنان باستاپ 25 ملن-عا دەيىن كورەرمەنى بار بۇل مۋلتفيلم سىرت كوزگە كۇلكىلى بولىپ كورىنگەنىمەن، استارىنا ۇڭىلسەك ميعا قونىمسىز دۇنيەلەرگە تاپ بولامىز.

بالالاردىڭ سۇيىكتى كەيىپكەرىنە اينالعان گۋبكا بوبتىڭ دوسى پاتريكتىڭ ويلاۋ قابىلەتى شەكتەۋلى. ول سونىسىمەن بالالارعا شاتتىق سىيلايدى. شاتتىق سىيلاپ قانا قويماي، سونىمەن قاتار، بالالاردى اقىلسىز بولۋعا شاقىرىپ تۇرعانداي.

سپانچ بوب ءمۋلتفيلمى ارقىلى بالالار نەنى ۇيرەنەدى؟

اقشاعا قۇنىعۋ. ءمۋلتفيلمنىڭ تاعى ءبىر پەرسوناجى ميستەر كرابستىڭ اقشاعا قۇنىققاندىعىن جانە اقشا ءۇشىن بارىنە دايىن ەكەنىن كورسەتەدى.

ۇرلىق جاساۋ. مۋلتفيلمدە بالالارعا ۇرلىق جاساۋدى دارىپتەيتىن، ونىڭ نەشە ءتۇرلى ايلالارىن كورسەتەتىن پەرسوناج – پلانكتون.

دوستارىڭدى جاقتىرتپاۋ، ۇيقى قۇمارلىق. سكۆيدۆاردتىڭ ءوز دوستارىنا دەگەن سالقىن قارىم-قاتىناسى، ولاردى مەنسىنبەيتىندىگى، جالعىزدىقتى ۇناتاتىندىعى بالالارعا جاقسى ءتالىم ەمەس ەكەندىگى بەلگىلى. ءومىرى ۇيقىسى قانباي جۇرەتىن سكۆيدۆاردت بالا پسيحيكاسىنا وراسان زور زالال كەلتىرەدى.

ماشا مەن ايۋ:

ءار ءبولىمى ميلليوننان كەم كورىلىم جينامايتىن بۇل ءمۋلتفيلمنىڭ دە بالالار ءۇشىن كەرەگى شامالى. نەگە دەيسىز عوي؟ العاشىندا ماشا مەن ايۋدىڭ كۇندەلىكتى ءومىرى سىزگە دە كۇلكىلى ءارى قىزىق بولۋى مۇمكىن. كەيىن كەلە باستى پەرسوناج ماشا ءسىزدىڭ دە اشۋىڭىزعا تيە باستاعانىن بايقايسىز. كىشكەنتاي عانا قىزدىڭ ايۋعا ءوز بىلگەنىن ىستەتۋى بالالارعا نە ۇيرەتە الادى ەكەن؟

ەگويزم مەن تارتىپسىزدىك. ءتۇرلى قىلىق تانىتىپ، ايۋدىڭ باسىنا اڭگىر تاياق ورناتىپ، ءوز دەگەنىنە جەتەتىن ماشا ەگويزمدىكتىڭ سيمۆولىنا اينالدى. ونى كورگەن ءار بالا بۇزىق بولۋعا بولادى دەپ ءتۇسىنىپ اتا-اناسىن ءوزىنىڭ ارتىنان جۇگىرتىپ قويعاندى قۇپ كورەدى. بۇزىقتىقتىڭ شەگىنە جەتكەن ماشا تەك ايۋدىڭ عانا ەمەس، سونىمەن قاتار، بالاردىڭ دا پسيحيكاسىنىڭ بۇزىلۋىنا اكەپ سوقتىرۋى مۇمكىن.

ۇلكەندى قۇرمەتتەمەۋ جانە وعاش قىلىقتار. مۋلتفيلمدەگى ايۋدىڭ ۇلكەن ەكەنى بارىمىزگە ءمالىم. وسى ورايدا ماشانىڭ ايۋدىڭ جاس ەرەكشەلىگىنە بايلانىستى قۇرمەت كورسەتپەۋى ءبىز ءۇشىن تارتىپسىزدىكتىڭ شەگى ەمەس پە؟ “ۇلكەنگە قۇرمەت، كىشىگە ىزەت”– دەگەندى ەستىپ وسكەن بالانىڭ ۇلكەنگە لايىقتى قۇرمەت كورسەتەتىندىگى انىق. ماشانى كورگەن بالادان ۇلكەنگە دەگەن قانداي قۇرمەت كۇتۋگە بولاتىندىعىن ويلاۋدىڭ ءوزى قورقىنىشتى.

استە، ءتىسى اۋىرىپ جۇرگەن بالانىڭ قايتا-قايتا بارىپ ءتىسىن جۋىپ جۇرگەنىن بايقادىم. اناسىنان نەگە بالاڭىز قايتا-قايتا ءتىسىن جۋا بەرەدى دەگەن كەزدە، اناسى ءبىر بولىمدە ماشا ءتىسى اۋىرعان كەزدە ءتىسىن جۋسا، جازىلىپ كەتەتىندىگىن ايتىپ، بالاسىنىڭ سودان كورگەنىن ىستەپ جۇرگەنىن ايتتى. ءبىر وكىنىشتىسى، بالاعا ءتىستى قايتا-قايتا جۋ اسەر ەتپەدى. اۋرۋى ودان باسىلمادى.

جوعارىدا ايتىلعان وقيعا ءمۋلفيلمنىڭ بالا ساناسىنا قالاي اسەر ەتەتىندىگىنىڭ كورىنىسى. “ەل بولام دەسەڭ، بەسىگىڭدى تۇزە” دەگەن م. اۋەزوۆتىڭ تەرەڭ ءماندى ناقىل ءسوزىن قايتا-قايتا وقىپ، ءوزىمىزدىڭ ءتول مۋلتفيلمدەرىمىزدى شىعارۋ بالالاردىڭ باياندى بولاشاعى ءۇشىن ىستەگەن ەڭ قايىرىمدى ءىسىمىز بولارى انىق.

ءبىز تەك قانا ەكى عانا ءمۋلفيلمنىڭ استارىنا ءۇڭىلىپ كوردىك. تاربيەلىك ءمانى شەكتەۋلى ەكەندىگىنە عانا كوز جەتكىزبەي، ونىڭ بالا پسيحيكاسىنا، تاربيەسى مەن ساناسىنا دەگەن پايداسىنان زيانى كوپ ارەكەتتەردى بايقادىق. بالالاردىڭ كوزايىمىنا اينالىپ وتىرعان وسى ەكى عانا مۋلتفيلمنەن وسىنداي قورىتىندى شىقسا، قالعان مۋلتفيلمدەردى ويلاۋدىڭ ءوزى قورقىنىشتى.

  زيان، ماعىناسىز مۋلتفيلمدەردى كورگەنى ءۇشىن بالانىڭ ەش كىناسى جوق. باقىتتى بالالىق شاعىندا، باتىرلاردىڭ ەرلىگىن دارىپتەيتىن، سانالى وي سالا بىلەتىن، سالت-ءداستۇرىمىز ايشىقتالاتىن ماعىنالى مۋلتفيلم ۇسىنا الماعان كىنا وزىمىزدەن ەكەنىن، بالا تەك بار نارسەنى كورەتىندىگىن ءتۇسىنۋىمىز كەرەك. قازىرگى بالالار اگرەسسيۆتى، اشۋلانشاق دەپ بار كىنانى بالاعا جاپپاي تۇرىپ، ەڭ الدىمەن كىنانىڭ وزىمىزدە ەكەنىن مويىنداعانىمىز دۇرىس. الداعى ۋاقىتتا، بىرەر جىلدىڭ ىشىندە تاربيەلىك ءمانى تەرەڭ ءتول مۋلتفيلدەرىمىز شىعىپ، بالالارىمىزدى دۇرىس تاربيەلەي الاتىن جاعدايعا جەتەمىز دەپ سەنەمىز!

 

لاۋرا تۇرسىنجان،

“ادىرنا” ۇلتتىق پورتالى

پىكىرلەر