شىمكەنت قالاسىندا قر ازاماتتىق قورعاۋ ورگاندارىنىڭ 25 جىلدىعىنا وراي قالالىق توتەنشە جاعدايلار دەپارتامەنتىنە ءورت ءسوندىرۋ جانە اۆاريالىق-قۇتقارۋ جۇمىستارىنا ارنالعان كولىكتەردىڭ كىلتىن تابىستاۋ ءراسىمى ءوتتى. وندا قۇتقارۋشىلارعا كاسىبي مەرەكەلەرى قارساڭىندا 31 دانا زاماناۋي ارنايى ءورت ءسوندىرۋ تەحنيكاسى بەرىلدى.
جيىنعا قالا اكىمى مۇرات ايتەنوۆ، بەلارۋس رەسپۋبليكاسىنىڭ «پوجسناب» جشق ديرەكتورى ولەگ دەريابين، قالالىق ءماسليحات دەپۋتاتتارى مەن توتەنشە جاعدايلار دەپارتامەنتىنىڭ جەكە قۇرامى قاتىستى.
ءىس-شارادا ءسوز العان شىمكەنت قالاسىنىڭ اكىمى مۇرات ايتەنوۆ ءوز قۇتتىقتاۋىن جەتكىزدى.
- سىن ساعاتتاردا ەرلىك كورسەتىپ، كومەككە ءبىرىنشى كەلۋگە دايىن بولۋ ۇلكەن قۇرمەتكە لايىق. بۇل جاۋاپتى دا، قيىن ماماندىقتى يگەرۋ كەز كەلگەن ادامنىڭ قولىنان كەلە بەرمەيتىن، شىدامدىلىقتى قاجەت ەتەتىن اسا ماڭىزدى ءىس. شىمكەنتتىك قۇتقارۋشىلار تاۋلىك بويى تۇرعىنداردىڭ قاۋىپسىزدىگىن قامتاماسىز ەتۋ ءۇشىن تىنىمسىز ەڭبەك ەتۋدە. اكىمشىلىك-ىسكەرلىك ورتالىقتا 4 اۆتوكولىككە ارنالعان ءورت ءسوندىرۋ دەپوسى كەشەنىنىڭ قۇرىلىسى جۇرگىزىلىپ وتىر. بۇل جۇمىستار الداعى ۋاقىتتا دا ءوز جالعاسىن تاباتىن بولادى، - دەدى مۇرات دۇيسەنبەكۇلى.
سونىمەن قاتار، شاھار باسشىسى بيىل 9 ايدا قالا اۋماعىندا ءورتتىڭ سانى 10,8 پروتسەنت، ادامداردىڭ ورتتە قايتىس بولۋ جايتى 20 پروتسەنتكە تومەندەپ وتىرعانىن تىلگە تيەك ەتىپ قۇتقارۋشىلارعا ءوز العىسىن ءبىلدىردى. سونداي-اق، شىمكەنتتە ۋلى جانە تابيعي گازدان ۋلانۋدان قايتىس بولعانداردىڭ سانى 16 پروتسەنتكە، ماتەريالدىق شىعىندار 3,6 پروتسەنتكە تومەندەگەن.
مەرەكەلىك شارا بارىسىندا ازاماتتىق قورعاۋ ورگاندارىنىڭ 25 جىلدىعىنا وراي قىزمەتىن ءمىنسىز ورىنداعانى ءۇشىن 10-عا تارتا قىزمەتكەر قالا اكىمىنىڭ العىس حاتىمەن ماراپاتتالدى.
شىمكەنت قالاسى اكىمىنىڭ ءباسپاسوز قىزمەتى
