بۇل تۋرالى بۇگىن اقپاراتتىق-كوممۋنيكاتسيالىق ورتالىعىندا قالاداعى ەڭبەك قاتىناستارىنىڭ جاعدايى بويىنشا وتكەن ءباسپاسوز بريفينگىندە «شىمكەنت قالاسى كاسىپوداقتار ورتالىعى» اۋماقتىق كاسىپوداقتار بىرلەستىگىنىڭ توراعاسى بەرىك بەكجانوۆ باياندادى.
– قالادا ەڭبەك ماسەلەسىنە قاتىستى ءۇش جاقتى كوميسسيانىڭ جۇمىسى اكىمشىلىك-الەۋمەتتىك ارىپتەستەر تاراپىنان ۇلكەن بەلسەندىلىككە يە بولىپ، جاڭا دەڭگەيدە جۇرگىزىلۋدە. ناقتىراق ايتساق، بۇل – ۇجىمدىق شارت، ياعني، جۇمىس بەرۋشى مەن جۇمىسشىنىڭ اراسىنداعى كەلىسىم. نورماتيۆتىك-قۇقىقتىق قۇجات كومەگىمەن جۇمىسشى دا، جۇمىس بەرۋشى دە ءوز قۇقىعىن قورعاي الادى. وكىنىشكە قاراي، بىزدەگى جەكە كاسىپورىنداردىڭ ۇجىمدىق شارتتى جۇمىسشىلارمەن بەكىتۋ دەڭگەيى وتە تومەن، – دەدى بەرىك ايداربەكۇلى.
كاسىپوداق توراعاسىنىڭ ايتۋىنشا، وسى جىلى 8 كاسىپورىن جالاقىدان 74 جۇمىسشىعا 14 ملن 104 مىڭ تەڭگە قارىز بولعان. بۇل قارىز بويىنشا ءۇش جاقتى كوميسسيانىڭ كومەگىمەن 37 جۇمىسشىنىڭ الدىنداعى 10 ملن 764 مىڭ تەڭگە وندىرىلگەن.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – سەرىك قوساي
