2021 جىلدىڭ قاڭتارىنان باستاپ قازاقستانداعى ءبىلىم بەرۋ ۇيىمدارىنىڭ بارلىعى "بۇلتتى بۋحگالتەريا مەن قارجى" جۇيەسىنە كوشۋدى باستايدى، - دەپ حابارلايدى “ادىرنا” ۇلتتىق پورتالى ءبىلىم جانە عىلىم ءمينيسترى اسحات ايماعامبەتوۆتىڭ Facebook پاراقشاسىنا سىلتەمە جاساپ.
مينيستر جاڭا جۇيەنىڭ قاجەتتىلىگى جونىندە: “جاڭا جۇيەنى ەنگىزۋدەگى ماقسات – كوپشىلىك ءۇشىن ءبىلىم سالاسىنداعى قارجىلاندىرۋدىڭ اشىقتىعىن جانە تيىمدىلىگىن باقىلاۋدى قامتاماسىز ەتۋ. بۋحگالتەريانى، كادرلاردى، ەسەپكە الۋ مەن بيۋدجەتتى جوسپارلاۋدى اۆتوماتتاندىرۋ سىبايلاس جەمقورلىق تاۋەكەلدەرىن الدىن الۋعا جانە قارجىنى ءتيىمدى پايدالانۋدى ارتتىرۋعا جاعداي جاسايدى.
ياعني مەكتەپتىڭ بيۋدجەتىنە، ونىڭ ءاربىر جۇمساعان تەڭگەسىنە قاتىستى اقپاراتقا ءبىزدىڭ مينيسترلىك، باسقا قۇزىرلى مەملەكەتتىك ورگاندار، جانە ازاماتتىق قوعام وكىلدەرى قول جەتكىزە الادى.
بۇل – ماڭىزدى باستاما”،- دەيدى.
سونداي-اق مينيستر ءبىلىم بەرۋ سالاسىن قارجىلاندىرۋداعى بىرقاتار كەمشىلىكتەردى ايتا كەلىپ، ونى : ء“بىلىم بەرۋ سالاسىن قارجىلاندىرۋ جىلدان جىلعا ارتىپ كەلەدى.
ارينە، ونىڭ قانشالىقتى جەتكىلىكتى نەمەسە جەتكىلىكسىز ەكەندىگى تۋرالى كوپ ايتۋعا بولادى. الايدا، سول بولىنگەن قاراجاتتى ءتيىمدى پايدالانۋ ماڭىزدىراق.
تاعى ءبىر ماسەلەگە توقتالايىن.
كوپشىلىك مەكتەپتەردى، بالاباقشالار مەن كوللەدجدەردى ءبىلىم جانە عىلىم مينيسترلىگى رەسپۋبليكالىق بيۋدجەت ەسەبىنەن قارجىلاندىرادى دەپ ەسەپتەيدى. ودان بولەك جالاقىنىڭ ۋاقىتىلى جانە دۇرىس ەسەپتەلۋى، وقۋلىقتاردى ساتىپ الۋ نەمەسە ءبىلىم بەرۋ ۇيىمدارىنداعى جوندەۋ جۇمىستارىن دا مينيسترلىكتىڭ ءوزى تىكەلەي جۇرگىزەدى دەپ ويلايدى.
بىراق ءىس جۇزىندە ولاي ەمەس.
زاڭعا سايكەس بۇل جۇمىس اكىمدىكتەردىڭ قۇزىرىندا.
ەلىمىزدە ءبىلىم بەرۋدى باسقارۋ ورگاندارىنىڭ سانى 200-دەن اسادى، ياعني، قارجىلاندىرۋ دا سول قالالار، اۋداندار مەن وبلىستاردىڭ بيۋدجەتىنەن وتەدى. اكىمشىلەندىرۋ دەڭگەيى ءارتۇرلى ءارى كوپ بولعان سوڭ ولاردى قاداعالاپ وتىرۋ وتە قيىن.
سوندىقتان ءتىپتى وبلىستىق ءبىلىم باسقارمالارىنىڭ ءوزى كوپ جاعدايدا جالاقىنى ۋاقىتىلى تولەۋگە، وقۋلىقتاردى ساتىپ الۋعا نەمەسە مەكتەپ، كوللەدجدەردى جوندەۋ جۇمىستارىنا قاتىستى پروبلەمالاردى بۇقارالىق اقپارات قۇرالدارىنا شىققاندا نەمەسە شاعىمدار كەلىپ تۇسكەردە ءبىلىپ وتىرادى.
بۇل مۇلدەم دۇرىس ەمەس.
اتا-انالار مەن مۇعالىمدەرگە ورىن العان پروبلەمالارعا «كىم جاۋاپ بەرەتىنى، نەگە بۇلاي بولعانى» ەمەس، ولقىلىقتاردىڭ ورىن الماۋى ماڭىزدى عوي.
سوندىقتان ءبىز جان باسىنا قارجىلاندىرۋ مەحانيزمدەرىن ەنگىزۋ جانە بارلىق قارجىلاندىرۋ جۇيەسىن تسيفرلاندىرۋ بويىنشا باستامانى قولعا الدىق”، - دەپ ماسەلەنى شەشۋدىڭ جولىن ۇسىندى.
ءمينيستردىڭ سوزىنشە، بۇل جۇيە نۇر-سۇلتان قالاسى مەن پاۆلودار وبلىسىنداعى ءبىلىم بەرۋ ۇيىمدارىندا پيلوتتىق جوبا رەتىندە اپروباتسيادان ءوتىپ، ءبىلىم باسقارمالارى مەن مەكتەپ باسشىلارى وڭ باعا بەرگەن. سونداي-اق العاشقى ناتيجەسىن دە كورسەتكەن: “جۇرگىزىلگەن پيلوتتىق جوبانىڭ ناتيجەسىندە تەك ەلوردادا بيۋدجەت قاراجاتىنان بىرنەشە ملرد. تەڭگە ۇنەمدەلىپ، ءبىلىم بەرۋ ۇيىمدارىنىڭ قارجىلىق قىزمەتى رەتتەلدى.
بۋحگالتەرلىك جانە سالىق ەسەبىنە الۋ بارىسىندا بۇزۋشىلىقتار سانى ەداۋىر قىسقارىپ، شىعىندار بويىنشا تاۋەكەلدەر ازايدى.
اتالعان جوبا جالاقىنى دۇرىس ەسەپتەمەۋ، قارجىلىق بۇزۋشىلىقتار، جوسپارلاۋ، قارجىلاندىرۋ كەزىندەگى سۋبەكتيۆيزم سياقتى پروبلەمالاردى شەشۋگە جانە ءبىلىم بەرۋ مەكەمەلەرىنىڭ قارجىلىق جاعدايىنا جەدەل مونيتورينگ جۇرگىزۋگە جاقسى مۇمكىندىك بەرەدى.
بۋحگالتەريامەن قوسا بيۋدجەتتى جوسپارلاۋ، مەملەكەتتىك ساتىپ الۋ، تاريفيكاتسيالاۋ، جۇمىسقا الۋ پروتسەستەرى دە اۆتوماتتاندىرىلادى.
بۇل – ءبىلىم سالاسىنا باعىتتالعان قارجىنى اشىق ءارى ءتيىمدى پايدالانۋدى قوعام بولىپ قاداعالاۋعا باعىتتالعان تاعى ءبىر قادام”.
فوتو اشىق دەرەككوزدەن الىندى
“ادىرنا” ۇلتتىق پورتالى
