بەلگىلى ءانشى قايرات نۇرتاستىڭ جۇبايى جۇلدىز ابدۋكاريموۆا «الەم حانىمى-2020» بايقاۋىنا قاتىسپاق. بۇل تۋرالى ول Instagram جەلىسىندەگى رەسمي پاراقشاسىندا جازدى، دەپ حابارلايدى «ادىرنا» ۇلتتىق پورتالى.
«قۇپيانى اشاتىن ۋاقىت كەلدى. بيىل “الەم حانىمى-2020” بايقاۋىندا قازاقستاندى تانىستىرامىن. بۇل – سىرتقى سۇلۋلىقتىڭ عانا ەمەس، ىشكى قۇندىلىق پەن اقىلدىڭ ادەمى ۇيلەسىم تاۋىپ، نازىك الەمدى ايشىقتاي تۇسەتىن بايقاۋ. باستى ماقساتى - الەمنىڭ ءار تۇكپىرىندەگى ايەلدى قولداۋ. پاندەميا سالدارىنان بيىل بايقاۋ ونلاين وتەدى. سوندىقتان 1-24 جەلتوقسان ارالىعىندا سايتتا داۋىس بەرۋ جۇرەدى. ەل ابىرويى ءۇشىن ءبارىمىز بىرىگىپ جەڭىسكە قادام جاسايىق. قازاق قىزدارى مەن ايەلدەرىنىڭ تابيعي سۇلۋلىعىن الەمگە مويىنداتايىق»،-دەدى ول.سونداي-اق، ابدۋكاريموۆا قازاقستاننىڭ عانا ەمەس ورتا ازيانىڭ دا نامىسىن قورعايتىنىن اتاپ ءوتتى.
«قۇرمەتتى مەنىڭ قىرعىزستانداعى، وزبەكستانداعى، جالپى ورتا ازياداعى وقىرماندارىم! ماعان سىزدەردىڭ دە قولداۋلارىڭىز اۋاداي قاجەت»،-دەپ ءسوزىن قورىتىندىلادى اكتريسا.
«ادىرنا» ۇلتتىق پورتالى
