ءتۋريزمدى قايتسەك دامىتامىز؟

2158
Adyrna.kz Telegram

نۇر-سۇلتان قالاسىندا ءتۋريزمدى دامىتۋ بويىنشا ءداستۇرلى كونسۋلتاتيۆتىك كەڭەس ءوتتى. KAZGUU جوعارى گۋمانيتارلىق مەكتەبى جۇمىس بەرۋشىلەرمەن بىرلەسىپ «تۋريزم» جانە «قوناقجايلىلىق» بويىنشا ءبىلىم بەرۋ باعدارلامالارىن  تالقىلادى دەپ حابارلايدى «ادىرنا» ۇلتتىق پورتالى ۋنيۆەرسيتەتتىڭ ءباسپاسوز قىزمەتىنە سىلتەمە جاساپ.

جۇمىس بەرۋشىلەردىڭ پىكىرىنشە، تۋريزم سالاسىندا وقىپ جاتقان ستۋدەنتتىڭ كاسىبي دامۋى وندىرىستىك پراكتيكا كەزىندە شىڭدالادى. سوندىقتان تاجىريبەدەن ءوتۋ ۋاقىتىن 30%-عا دەيىن ارتتىرۋ ۇسىنىلدى. جيىندا تۇلەكتەردىڭ تسيفرلىق داعدىلارىن Digital marketing جانە It in Hospitality سياقتى كۋرستار ارقىلى كۇشەيتۋ دە ۇسىنىلدى.

«Kazakh Tourism» باسقارما توراعاسىنىڭ ورىنباسارى قايرات سادۋاقاسوۆ پەن نۇر-سۇلتان قالاسى اكىمدىگىنىڭ «بالالار مەن جاسوسپىرىمدەر ءتۋريزمى جانە ولكەتانۋ ورتالىعى»  ديرەكتورى مەلس ابەنوۆ گيد-ەكسكۋرسوۆودتار، گيد-اۋدارماشىلار جانە گيد-نۇسقاۋشىلار بويىنشا ىشكى سەرتيفيكاتتاۋ جۇيەسىن ەنگىزۋ قاجەتتىگىن اتاپ ءوتتى.

كونسۋلتاتيۆتىك كەڭەستىڭ قوناقتارى مەن مۇشەلەرىنىڭ اراسىندا "ەۋرازيالىق تۋريزم قاۋىمداستىعى" پرەزيدەنتى رىستى قاراباەۆا، "AstanaInvest" ءتۋريزمدى دامىتۋ دەپارتامەنتىنىڭ ديرەكتورى دامير شامەتوۆ، "Hilton-Astana" قوناق ءۇيىنىڭ باس مەنەدجەرى شتەفان رايتەر، سونداي-اق "Sheraton", "Wyndham Garden Astana", "Radisson Astana" قوناق ۇيلەرى مەن ەلىمىزدىڭ وزگە دە تۋريستىك كومپانيالارىنىڭ وكىلدەرى بولدى.

كەزدەسۋگە قاتىسۋشىلار Dark tourism-ءنىڭ دامۋ الەۋەتىن ەرەكشە اتاپ ءوتتى. قاتىسۋشىلار ءتۋريزمنىڭ مۇنداي  زاماناۋي تۇرلەرى تاريحقا  قىزىعۋشىلىق تانىتاتىن تۋريستەردى تارتادى دەيدى. ستۋدەنتتەردى دە وسىنداي جاڭاشىل تۋريستىك ونىمدەردى جاساۋعا بەيىمدەۋ قاجەت دەگەن پىكىر ايتتى.

«بۇگىنگى تاڭدا پاندەمياعا بايلانىستى تۋريزم جانە قوناقجايلىلىق يندۋسترياسى ۇلكەن شىعىنعا ۇشىراپ وتىر. سوعان قاراماستان، بۇل سالادا جاڭا سۇرانىستار پايدا بولۋدا. ۋنيۆەرسيتەتتەر ەڭبەك نارىعىنىڭ سۇرانىسى ساي زاماناۋي ترەندتەردى ۇستانۋى كەرەك», - دەدى «تۋريزم» جانە «قوناقجايلىلىق» ءبىلىم بەرۋ باعدارلامالارىنىڭ جەتەكشىسى راۋشان مۇحامەدجانوۆا.

پىكىرلەر