جەكپە-جەك سارايىنا جاقسىلىق ۇشكەمپىروۆتىڭ اتى بەرىلەدى

2434

مەملەكەت باسشىسى قاسىم-جومارت كەمەلۇلىنىڭ باستاماسىمەن نۇر-سۇلتان قالاسىنداعى جەكپە-جەك سارايىنا جاقسىلىق ۇشكەمپىروۆتىڭ اتى بەرىلەتىن بولدى، - دەپ حابارلايدى «ادىرنا» ۇلتتىق پورتالى پرەزيدەنتتىڭ ءباسپاسوز حاتشىسى بەرىك ءۋاليدىڭ Facebook پاراقشاسىنا سىلتەمە جاساپ.

جەكپە-جەك سارايىنا وليمپيادا چەمپيونىنىڭ ەسىمىن بەرۋ تۋرالى ۇكىمەتتىڭ قاۋلىسى شىققان.

ءباسپاسوز حاتشىسى Facebook پاراقشاسىندا: «مەملەكەت باسشىسى قاسىم-جومارت كەمەلۇلىنىڭ تىكەلەي باستاماسىمەن ءارى قولداۋىمەن ەلوردامىزداعى جەكپە-جەك سارايىنا رەسمي تۇردە داڭقتى بالۋان، وليمپيادا چەمپيونى جاقسىلىق ۇشكەمپىروۆتىڭ اتى بەرىلەتىن بولدى،  اعامىزدىڭ ەسىمىمەن اتالاتىن بولدى. بۇل شەشىم بىلاي قابىلدانعان ەدى...

وسىدان بىرنەشە جىل بۇرىن وسى جەكپە-جەك ورتالىعىنىڭ ىرگەتاسى قالانىپ جاتقاندا جاقسىلىق اعامىز ۇلكەن ۇلى جاندوسپەن بىرگە قۇرىلىس باستالعالى جاتقان جەردىڭ جانىنان ءوتىپ بارا جاتادى. ەندى عانا قازىعى قاعىلىپ جاتقان جەرگە قاراپ: «وسى قازاققا، قازاقتىڭ سپورتىنا، قازاقتىڭ كۇرەسىنە ءبىر كىسىدەي اق ەڭبەك ءسىڭىردىم دەپ ويلايمىن. اسىرەسە، وداقتىڭ داڭقى داۋىرلەپ، ءبىزدىڭ ۇلتتىڭ وكىلدەرىنىڭ بايگە الماق تۇگىل، وزگەمەن تەڭ تۇرۋىنىڭ ءوزى مۇڭ بولىپ تۇرعان شاقتا وليمپيادانىڭ جۇلدەسىن جۇلىپ الدىم. ونىمدى بۇگىنگى قازاققا مىندەت قىلمايمىن، ارينە. ول كەزدە جاستىقتىڭ بۋىمەن بىلىنبەگەن دە ەكەن. قازىر ويلايمىن، ءالى كۇنگە ءوزىمنىڭ ءىزىمدى باساتىن جىگىتتەردىڭ شىقپاعانىنا قاراعاندا، سول 80-دەگى وليمپيادا ماعان دا وڭايعا سوقپاعان ەكەن اۋ دەپ. ەندى ءبىر ارمانىم بار، شىركىن وسى جەكپە-جەك ورتالىعىنىڭ قۇرىلىسى ءبىتىپ، مەنىڭ اتىمدى بەرسە عوي، ارمان جوق ەدى اۋ» دەگەن ەكەن. جاندوس: «وي اكە اي، بۇل قاي ۋاقىتتا سالىنىپ بىتەدى دەيسىز؟ وعان دەيىن كىم بار، كىم جوق؟ قانداي شەشىم قابىلدانادى؟ بىلمەيمىز عوي...» دەپ قويا سالادى.

جاقسىلىق اعامىز باقيلىق بولىپ كەتكەننەن كەيىن جوعارىداعى اڭگىمە مەملەكەت باسشىسىنا جەتەدى.  قاسىم-جومارت كەمەلۇلى بىردەن قولدايدى. ءتيىستى ورىندارعا تاپسىرما بەرەدى.

ءسويتىپ، كۇنى كەشە عانا ۇكىمەتتىڭ رەسمي قاۋلىسى شىقتى. جەكپە-جەك سارايى رەسمي تۇردە جاقسىلىق ۇشكەمپىروۆ اعامىزدىڭ اتىمەن اتالاتىن بولدى.

بالۋان اعامىزدىڭ ارۋاعى رازى بولسىن! «ەر ەسىمى، ەل ەسىندە» دەگەن وسى!

ايتپاقشى، جوعارىداعى اڭگىمەنى ايتىپ بەرگەن، وسى ۇلكەن شارۋاعا قوزعاۋ سالعان ۇشكەمپىروۆ جاندوس جاقسىلىقۇلى، قازىر وسى جەكپە-جەك سارايىنىڭ ديرەكتورى.

كەشە ۇكىمەتتىڭ قاۋلىسى شىققاننان كەيىن جاندوس قۇرداسىم حابارلاسىپ، ءسۇيىنشى سۇراپ، اقجولتاي حابارىن جەتكىزدى. مەن دە وسى قۋانىشتى وزدەرىڭىزبەن ءبولىسۋدى ءجون كوردىم»، - دەپ جاريالادى.

فوتو اشىق دەرەككوزدەن الىندى

«ادىرنا» ۇلتتىق پورتالى

پىكىرلەر
رەداكتسيا تاڭداۋى