Memleket basşysy Qasym-Jomart KEMELŪLYNYŊ bastamasymen Nūr-Sūltan qalasyndaǧy Jekpe-jek saraiyna Jaqsylyq ÜŞKEMPIROVTIŊ aty berıletın boldy, - dep habarlaidy «Adyrna» ūlttyq portaly Prezidenttıŋ baspasöz hatşysy Berık UÄLİDIŊ Facebook paraqşasyna sılteme jasap.
Jekpe-jek saraiyna Olimpiada chempionynyŋ esımın beru turaly Ükımettıŋ Qaulysy şyqqan.
Baspasöz hatşysy Facebook paraqşasynda: «Memleket basşysy Qasym-Jomart KEMELŪLYNYŊ tıkelei bastamasymen ärı qoldauymen Elordamyzdaǧy Jekpe-jek saraiyna resmi türde daŋqty baluan, Olimpiada chempiony Jaqsylyq ÜŞKEMPIROVTIŊ aty berıletın boldy, aǧamyzdyŋ esımımen atalatyn boldy. Būl şeşım bylai qabyldanǧan edı...
Osydan bırneşe jyl būryn osy Jekpe-jek ortalyǧynyŋ ırgetasy qalanyp jatqanda Jaqsylyq aǧamyz ülken ūly Jandospen bırge qūrylys bastalǧaly jatqan jerdıŋ janynan ötıp bara jatady. Endı ǧana qazyǧy qaǧylyp jatqan jerge qarap: «Osy qazaqqa, qazaqtyŋ sportyna, qazaqtyŋ küresıne bır kısıdei aq eŋbek sıŋırdım dep oilaimyn. Äsırese, Odaqtyŋ daŋqy däuırlep, bızdıŋ ūlttyŋ ökılderınıŋ bäige almaq tügıl, özgemen teŋ tūruynyŋ özı mūŋ bolyp tūrǧan şaqta Olimpiadanyŋ jüldesın jūlyp aldym. Onymdy bügıngı qazaqqa mındet qylmaimyn, ärine. Ol kezde jastyqtyŋ buymen bılınbegen de eken. Qazır oilaimyn, älı künge özımnıŋ ızımdı basatyn jıgıtterdıŋ şyqpaǧanyna qaraǧanda, sol 80-degı Olimpiada maǧan da oŋaiǧa soqpaǧan eken au dep. Endı bır armanym bar, şırkın osy Jekpe-jek ortalyǧynyŋ qūrylysy bıtıp, menıŋ atymdy berse ǧoi, arman joq edı au» degen eken. Jandos: «Oi äke ai, būl qai uaqytta salynyp bıtedı deisız? Oǧan deiın kım bar, kım joq? Qandai şeşım qabyldanady? Bılmeimız ǧoi...» dep qoia salady.
Jaqsylyq aǧamyz baqilyq bolyp ketkennen keiın joǧarydaǧy äŋgıme Memleket basşysyna jetedı. Qasym-Jomart Kemelūly bırden qoldaidy. Tiıstı oryndarǧa tapsyrma beredı.
Söitıp, künı keşe ǧana Ükımettıŋ resmi Qaulysy şyqty. Jekpe-jek saraiy resmi türde Jaqsylyq Üşkempırov aǧamyzdyŋ atymen atalatyn boldy.
Baluan aǧamyzdyŋ aruaǧy razy bolsyn! «Er esımı, el esınde» degen osy!
Aitpaqşy, joǧarydaǧy äŋgımenı aityp bergen, osy ülken şaruaǧa qozǧau salǧan Üşkempırov Jandos Jaqsylyqūly, qazır osy Jekpe-jek saraiynyŋ direktory.
Keşe Ükımettıŋ Qaulysy şyqqannan keiın Jandos qūrdasym habarlasyp, süiınşı sūrap, aqjoltai habaryn jetkızdı. Men de osy quanyşty özderıŋızben bölısudı jön kördım», - dep jariialady.
Foto aşyq derekközden alyndy
«Adyrna» ūlttyq portaly
