Jekpe-jek saraıyna Jaqsylyq ÚShKEMPIROVTIŃ aty beriledi

4712
Adyrna.kz Telegram

Memleket basshysy Qasym-Jomart KEMELULYNYŃ bastamasymen Nur-Sultan qalasyndaǵy Jekpe-jek saraıyna Jaqsylyq ÚShKEMPIROVTIŃ aty beriletin boldy, - dep habarlaıdy «Adyrna» ulttyq portaly Prezıdenttiń baspasóz hatshysy Berik ÝÁLIDIŃ Facebook paraqshasyna silteme jasap.

Jekpe-jek saraıyna Olımpıada chempıonynyń esimin berý týraly Úkimettiń Qaýlysy shyqqan.

Baspasóz hatshysy Facebook paraqshasynda: «Memleket basshysy Qasym-Jomart KEMELULYNYŃ tikeleı bastamasymen ári qoldaýymen Elordamyzdaǵy Jekpe-jek saraıyna resmı túrde dańqty balýan, Olımpıada chempıony Jaqsylyq ÚShKEMPIROVTIŃ aty beriletin boldy,  aǵamyzdyń esimimen atalatyn boldy. Bul sheshim bylaı qabyldanǵan edi...

Osydan birneshe jyl buryn osy Jekpe-jek ortalyǵynyń irgetasy qalanyp jatqanda Jaqsylyq aǵamyz úlken uly Jandospen birge qurylys bastalǵaly jatqan jerdiń janynan ótip bara jatady. Endi ǵana qazyǵy qaǵylyp jatqan jerge qarap: «Osy qazaqqa, qazaqtyń sportyna, qazaqtyń kúresine bir kisideı aq eńbek sińirdim dep oılaımyn. Ásirese, Odaqtyń dańqy dáýirlep, bizdiń ulttyń ókilderiniń báıge almaq túgil, ózgemen teń turýynyń ózi muń bolyp turǵan shaqta Olımpıadanyń júldesin julyp aldym. Onymdy búgingi qazaqqa mindet qylmaımyn, árıne. Ol kezde jastyqtyń býymen bilinbegen de eken. Qazir oılaımyn, áli kúnge ózimniń izimdi basatyn jigitterdiń shyqpaǵanyna qaraǵanda, sol 80-degi Olımpıada maǵan da ońaıǵa soqpaǵan eken aý dep. Endi bir armanym bar, shirkin osy Jekpe-jek ortalyǵynyń qurylysy bitip, meniń atymdy berse ǵoı, arman joq edi aý» degen eken. Jandos: «Oı áke aı, bul qaı ýaqytta salynyp bitedi deısiz? Oǵan deıin kim bar, kim joq? Qandaı sheshim qabyldanady? Bilmeımiz ǵoı...» dep qoıa salady.

Jaqsylyq aǵamyz baqılyq bolyp ketkennen keıin joǵarydaǵy áńgime Memleket basshysyna jetedi.  Qasym-Jomart Kemeluly birden qoldaıdy. Tıisti oryndarǵa tapsyrma beredi.

Sóıtip, kúni keshe ǵana Úkimettiń resmı Qaýlysy shyqty. Jekpe-jek saraıy resmı túrde Jaqsylyq Úshkempirov aǵamyzdyń atymen atalatyn boldy.

Balýan aǵamyzdyń arýaǵy razy bolsyn! «Er esimi, el esinde» degen osy!

Aıtpaqshy, joǵarydaǵy áńgimeni aıtyp bergen, osy úlken sharýaǵa qozǵaý salǵan Úshkempirov Jandos Jaqsylyquly, qazir osy Jekpe-jek saraıynyń dırektory.

Keshe Úkimettiń Qaýlysy shyqqannan keıin Jandos qurdasym habarlasyp, súıinshi surap, aqjoltaı habaryn jetkizdi. Men de osy qýanyshty ózderińizben bólisýdi jón kórdim», - dep jarııalady.

Foto ashyq derekkózden alyndy

«Adyrna» ulttyq portaly

Pikirler