جۇكتى ايەلدىڭ جالاڭاش سۋرەتىنەن جارىس باستالعان با؟

4047
Adyrna.kz Telegram

ماسەلەن، فوتوگراف جانسايا قانايقۇلوۆا وسىعان دەيىن 60-قا جۋىق جۇكتى كەلىنشەككە فوتوسەسسيا جاساعان دەپ جازادى "ادىرنا" ۇلتتىق پورتالى Paryz.kz سايتىنا سىلتەمە جاساپ.

بۇرىن جاس كەلىن جۇكتى بولعاندا، بۇل جاڭالىقتى ەلدەن جاسىرىپ، ءتىپتى، اتا-ەنەسىنە ايتۋدان ۇيالاتىن. بۇل ءبىر جاعىنان ىشكە بىتكەن بالانىڭ امان-ەسەن دۇنيەگە كەلىپ، كەلىنشەكتىڭ وسى كەزەڭدى وڭاي وتكەرۋىنە سەپتىك ەتەدى دەيتىن ۇلكەندەر. ال سوڭعى كەزدەرى ەلىمىزدە اياعى اۋىر ايەلدەر ءىشىن جالاڭاشتاپ سۋرەتكە ءتۇسۋدى ادەتكە اينالدىرا باستادى. مۇنى سوڭعى ترەند دەپ بىلگەن جاندار جۇرتتان ء"سۇيىنشى" سۇراعان فوتوسەسسيا بارىسىن جەلىلەرگە جاريالاۋدى دا ۇمىتپايدى، دەپ حابارلادى paryz.kz, "ەۋرازيا ءبىرىنشى ارناسىنا" سىلتەمە جاساپ.

ءيا، بۇل – بىرنەشە جىل بۇرىن عانا پايدا بولعان جاڭا ترەند. جاڭاشىلدىقتىڭ سوڭىنان ەرەمىز دەپ تالاي جۇكتى كەلىنشەك قارنىن اشىپ فوتوسەسسيا جاساپ الەك. ساننەن قالىسپاعانداردىڭ ءبىرى – بالنۇر قۋانتاي.

"بىرىنشىدەن، مەن ول جەردە جالاڭاش تۇسكەن جوقپىن. ءىشىم اشىق بولعانى بولماسا، بىلاي كوز تيەدى دەگەن زاتتان ءبىز ءوزىمىز قورقامىز. مەن سوڭىنا دەيىن كورسەتكەن جوقپىن، بالانى بوسانىپ، ادام بولىپ، كىشكەنە وزىمىزگە كەلگەننەن كەيىن عانا بارىپ، ينستاگرامعا سالىپ، دوستارىممەن، جاقىن ادامدارمەن ءبولىسىپ، ەلگە جاريالادىق", - دەيدى ول.

بالنۇردىڭ بال-بۇل جايناعان ءجۇزىن كورىپ جولداسى دا قوشتاي تۇسكەن. دەسە دە ءۇي ۇلكەندەرى جاقتاي قويماپتى. كوز بار، ءسوز بار دەگەندەي.

"ماما رەنجىپ قالدى. ءبىراز ۋاقىت سويلەسكەن دە جوقپىز. سول سۋرەتتى كورىپ، فوتوسسەسيا جاساعان سوڭ سۋرەت جىبەرگەن بولاتىنمىن ماماما. ول ماعان رەنجىپ، ۇرسىپ-ۇرسىپ، "وسى سەندەر قانداي قىزسىڭدار؟" دەپ ۇرسىپ، ءبىراز ۋاقىت مەنىمەن سويلەسپەي قويعان. سوسىن بارىپ كىشكەنە ءتۇسىنىپ، مەنى كەشىردى، ۇنادى", - دەيدى ۆيزاجيست.

بۇل ۇلكەندەر ءۇشىن تاڭسىق بولۋى مۇمكىن. بىراق جاس كەلىنشەكتەر ءۇشىن ەستەن كەتپەس ەستەلىك. ماسەلەن، فوتوگراف جانسايا قانايقۇلوۆا وسىعان دەيىن 60-قا جۋىق جۇكتى كەلىنشەككە فوتوسەسسيا جاساعان.

"بۇل 2018 جىلدان بەرى بەيونسە باستاعاننان الەمدىك ترەند بولىپ كەتتى. جۇكتى ايەلدەر وسىنداي ۆوك ستيلدە دەيدى عوي، سونداي ماتامەن يلي بودي، سونداي ستيلدە فوتوسەسسيا جاساعاندى ۇناتادى", - دەيدى ول.

دەگەنمەن قوعام بەلسەندىسى قۇرساعىن جالاڭاشتاپ، جۇرتتىڭ كوزىنەن جاسقانبايتىن جاستارعا رەنىشىن ءبىلدىردى. ترەند دەپ ءجۇرىپ، مەنتاليتەتىمىزدەن ايىرىلىپ بارامىز دەگەن پايىمدا.

"اياعى اۋىر كەلىنشەكتىڭ قارنىن اشىپ سۋرەتكە ءتۇسۋى دەگەن، بۇل ەندى تىپتەن مادەنيەتتىڭ تومەندىگەنىنىڭ ءبىر ءتۇرى شىعار. ول ءبىر جاي ۇرلەپ قويعان قارىن ەمەس، ونىڭ ىشىندە ۇرپاق بار عوي. بالا بار. ول بالانىڭ كەلەشەگى بار. ول ءوزىن ويلاماسا دا، بالانىڭ كەلەشەگىن ويلاۋ كەرەك قوي. سول جالاڭاش تۇسكەن سۋرەت بالانىڭ ومىرلىك كەلەشەگىنە بالتا شابۋى دا مۇمكىن", - دەيدى قوعام بەلسەندىسى قارلىعاش بەكپاتشا.

ءيا، بۇرىندارى جۇكتى ەكەنىن جاريالاپ فوتوعا تۇسپەك تۇگىلى، انالارىمىز 9 اي بويى قۇرساعىن بوتەن كوزدەن جاسىرىپ ۇستاعان ەدى. ال قازىر زامان دا، كوزقاراس تا وزگەرگەن. كەز كەلگەن جاڭاشىلدىقتىڭ جاقسى جاعىن عانا قابىلداعان ءجون دەيدى ماماندار.

پىكىرلەر