ادام بالاسى ءارتۇرلى. اتىن شىعارۋ ءۇشىن «جەر ورتەيتىندەر» بار. بىراق ماسەلە مىنادا: مۇنداي ارەكەتتەر الدىمەن ادامنىڭ وزىنە، اينالاسىنا، قورشاعان ورتاعا زيانىن تيگىزبەۋى ءتيىس.
بىراق اتىن شىعارىپ، ەرجۇرەكتىگىمەن گيننەستىڭ «رەكوردتار كىتابىنا» اتىن قالدىرىپ جاتاتىندار راز ەمەس. مىسالى، قىتايدىڭ تۇرعىنى جۋان ليان ءميندى ەشقاشان ارالار شاقپايدى ەكەن. وعان قاتىستى مىنا ءبىر وقيعانى ەسكە الساق تا جەتكىلىكتى. قورعانىش كوستيۋمىن كيگەن اسسيسەنتتەر ونىڭ ۇستىنە بىرنەشە كورزيناعا تولى ارالاردى جىبەرگەن. ارالاردىڭ سالماعى شامامەن 63,5 كەلى تارتقان. ءۇستى-باسىنا ارا جابىسقان قىتايلىق جىگىت قوزعالماي بىرنەشە ساعات تۇرعان. مامانداردىڭ ايتۋىنا قاراعاندا، ەگەر وسىنشاما ارالار جۋان ليان ءميندى شاعاتىن بولسا، ول دەنەسىنە 3 مىڭنان اسا «ۋ» الىپ، ونى كوتەرە الماي ءولىپ كەتەتىن ەدى. قۋانىشقا وراي، قىتايلىق جىگىتتى ارالار شاقپايدى ەكەن.
سونداي-اق تايلاند تۇرعىنى كانچانۋ كەتكەوۋ ۋلى شايانداردان قورىقپايدى. ول 33 كۇن بويى 3,4 مىڭنان استام شاياندارمەن بىرگە تۇرعان. جۇرەك جۇتقان قىز سونىمەن قاتار، ۋلى شاياندى 3,5 مينۋت بويى اۋزىندا ۇستاعان.
بۇل عانا ەمەس، تەحاس تۇرعىنى دجەكي بوببي ۆاننادا 45 مينۋت بويى 195 ۋلى جىلانمەن وتىرعان. ول ءوزىنىڭ ۋلى جىلاندارىمەن بۇكىل اقش-تى شارلاپ، گاسترولدىك ساپاردا جۇرەتىن بولعان. بىراق قانداي دا ءبىر وقىس جاعداي قايتالانباعان. ال مۇنىڭ سەبەبى نەدە؟ ءبيببيدىڭ ايتۋىنا قاراعاندا، ۋلى جىلانمەن ۆاننادا وتىرعاندا ەش قوزعالماۋىڭ كەرەك. ەگەر ءسال قوزعالساڭ ءبىتتى، شاعىپ الادى، ءسويتىپ ومىرمەن قوشتاساسىڭ. بىراق دجەكي بوببي ومىرىندە ءبىر رەت قيىن جاعداي ورىن العانىن دا جاسىرمايدى. ونى ءبىر گاسترولدە ۋلى جىلان شاعىپ العان. اقىرىندا جاعداي قيىنعا اينالىپ، دارىگەرلەر ونىڭ ءبىر اياعىن تىزەسىنەن تومەن كەسىپ تاستاۋعا ءماجبۇر بولعان. قازىر ول پروتەزبەن جۇرەدى.
زاپوروجەدەگى شاعىن زووپاركتىڭ يەسى الەكساندر پىلوشەنكو ەكى جولبارىسپەن توردا 36 كۇنىن وتكىزگەن. مۇنىڭ سەبەبى نەدە؟ ول وسى ارەكەتى ارقىلى جۇرتشىلىقتىڭ نازارىن اۋدارىپ، تورداعى حايۋاناتتارىنا تاماق پەن قارجى جيناعان كورىنەدى.
وڭتۇستىك افريكانىڭ بوتسۆان قالاسىنداعى وكاۆانگو وزەنىندە ۇزىندىعى 4 مەتر بولاتىن قاۋىپتى قولتىراۋىندارمەن بىرگە جۇزۋگە بولادى. ول ءۇشىن ءسىز الدىمەن 5,5 مىڭ ەۆرو تولەۋىڭىز كەرەك جانە وزەنگە تۇسەر الدىندا «بۇل شارانى ۇيىمداستىرۋشىلارعا ەشقانداي كىنا ارتپايمىن» دەپ قولحات جازۋىڭىز قاجەت.
مىنە ادامدار وزدەرىنىڭ باسىن تىگىپ، قانشاما قاۋىپ-قاتەرگە بارادى. بىراق اتىڭدى شىعارىپ، مۇنى قايتالاۋدىڭ ەش قاجەتى جوق. بۇل ادام بالاسى قايتالاۋعا ءتيىس ەمەس رەكوردتار. سوندىقتان ساقتىقتا قورلىق جوق، تىنىش جۇرگەنگە نە جەتسىن؟!.
ەركىن قالدان،
«ادىرنا» ۇلتتىق پورتالى.
