ۇزاق جىلدار بويى ءبىز ادامنىڭ جۇلدىزى (استرولوگيالىق بەلگىسى) ونىڭ ومىرلىك جولىنا، مىنەزىنە، ماماندىعىنا اسەر ەتەدى دەپ ويلاپ كەلدىك. اسپان دەنەلەرىنىڭ ادامنىڭ دەنساۋلىعىنا دا اسەرى بارىن استرولوگتار كەينىگى جىلدارى عانا انىقتادى. ەندى وسى باعىتتا زەرتتەۋ-تالداۋ جۇمىستارى جاندانىپ جاتىر. ءبىز سول زەرتتەۋ قورىتىندىسىنان قىزىقتى دەگەن تۇستارىن وقىرمانعا ۇسىنباقپىز.
جۇلدىزدار قاڭتار مەن جەلتوقسان ايىندا تۋىلعان ادامدار جازدا ومىرگە كەلگەن قۇرداستارىنا قاراعاندا پىسىقتاۋ، شاپشاڭ قيمىلدايتىن، شيراق بولىپ كەلەدى ەكەن. ولار تەز اۋىرىپ،تەز جازىلادى، بىراق سوزىلمالى دەرتكە شالدىعىپ،قانداي دا ءبىر اۋرۋدان ازاپ كورە قويمايدى. قايتا تەز قيمىلدايتىنىنىڭ ارقاسىندا سپورتپەن اينالىسپاسا دا ءوز جاسىنان جاس كورىنەدى، ۇزاق ءومىر سۇرەدى دەپ جازادى «اۋىرماڭىز!» گازەتى. دەگەنمەن «جەلتوقساندىقتاردىڭ» شيزوفرەنيا دەرتىنە بەيىم كەلەتىنى انىقتالعان. بۇل قىستا تۋىلسا دا سۋىقتى سۇيمەيتىن ولارعا د ءۆيتامينىنىڭ جەتىسپەۋشىلىگىن بىلدىرەدى.
اقپان مەن ناۋرىز ايىندا تۋىلعان ادامدار گۇل توزاڭىنا ءتوزىمسىز كەلەدى ەكەن. ءبىر قىزىعى، وسى ايلاردا تۋىلعان بالالاردىڭ كوپشىلىگى سابىرلى بولىپ كەلەدى، ولاردا پسيحولوگيالىق تۇراقتىلىق بايقالادى. بىراق باسىم كوپشىلىگى بۇيرەك پەن قۋىق اۋرۋلارىنا بەيىم كەلەدى ەكەن.
ءساۋىر مەن مامىر ايىنداعى ادامدار كوبىنە ءبىلىمدى، وقۋعا، ىزدەنۋگە قۇمار بولىپ كەلەتىندىگىمەن ەرەكشەلەنەدى. سودان بولار، وسى ايدا تۋىلعاندار اراسىندا پسيحيكاسى بۇزىلعان، كۇيزەلىسكە بەيىم، كوڭىل-كۇيى تەز بۇزىلاتىن ادامدار كوپ. گەرمانياداعى زەرتتەۋ جۇمىستارى 150 مىڭ ادامنىڭ 17 پايىزى وسى دەرتكە بەيىم ەكەنىن دالەلدەگەن.
جاز ايلارىندا تۋىلعان ادامداردىڭ جۇرەك-قان تامىرلارى اۋرۋلارىنا بەيىم ەكەنىن دارىگەرلەر دە مويىندايدى. جاسى قىرىقتان اسا باستاعاندا تىنىس الۋ ورگاندارىندا اسقىنۋ بايقالۋى مۇمكىن. ولاردىڭ جۇزدەن اسا ءومىر ءسۇرۋى قىستا تۋىلعاندارعا قاراعاندا 23 پايىزعا كەم ەكەن. ۆيتامين جەتىسپەۋشىلىگىنەن تۋىندايتىن اۋرۋ بەلگىلەرى دە وسىلارعا ءتان.
جازدىڭ سوڭى مەن كۇزدە ومىرگە كەلگەن ادامدار اراسىندا سپورتسمەندەر كوپ ەكەنى ايتىلادى. ولاردىڭ دەنساۋلىقتارى دۇرىس ءومىر ءسۇرۋى مەن كۇتىنۋىنە بايلانىستى. يممۋنيتەت السىزدىگى كوبىنە وسىلاردا كەزدەسەدى.
جاراس قاسىم.
