حالىق دەنساۋلىعىن جاقسارتۋ —- قازاقستاننىڭ دامۋ ساياساتىنىڭ باسىم باعىتتارىنىڭ ءبىرى. بۇگىنگى كۇنى اۋىلدارداعى ەمدەۋ مەكەمەلەرىنە جاڭا قۇرىلعىلار، كولىكتەر ءبولىنىپ، ستاندارتقا ساي جابدىقتالۋعا تالپىنىس جاسالۋدا. ناۋقاسقا قاجەتتى ەم-دوم جاساۋ ءۇشىن جاڭا تەحنولوگيانى مەڭگەرگەن، بىلىكتى دە ءبىلىمدى ماماندار جىل سايىن دايارلانۋدا. بۇدان بولەك، وتاندىق عالىمدارىمىز حالىق دەنساۋلىعى ءۇشىن تەر توگىپ، يگى جاڭالىقتارىمەن بولىسۋدە.
مىسالى، اقتوبەدەگى باتىس قازاقستان مەديتسينالىق ۋنيۆەرسيتەتىنىڭ ماماندارى پلاستيكالىق لانگەتتەردى باسىپ شىعارۋعا كىرىستى.
3D پرينتەرىمەن جاسالاتىن زاماناۋي داكە قول نەمەسە اياق سۇيەكتەرىنىڭ سىنىعى كەزىندە قولدانىلادى. بۇل مەديتسينالىق بۇيىمداردىڭ ءداستۇرلى گيپستەن ايىرماشىلىعى، قىزدىرۋ ارقىلى كەز-كەلگەن پىشىنگە كەلتىرۋگە بولادى. سالماعى جەڭىل بولعانىمەن گيپسكە قاراعاندا اناعۇرلىم بەرىك. توركوزدى ەتىپ جاسالاتىن لانگەتتەر ادام تەرىسىنىڭ ويىلماۋى ءۇشىن ىڭعايلى.
ايتا كەتەيىك، بۇرىن-سوڭدى ەلىمىزدە زاماناۋي 3D پرينتەردىڭ كومەگىمەن داكە باسىپ شىعارىلماعان. سوندىقتان مەديتسينا ۋنيۆەرسيتەتىنىڭ عالىمدارى ازىرگە جاپپاي ءوندىرىستىڭ بولمايتىنىن جەتكىزدى. ساناۋلى ۇلگىسى عانا جەرگىلىكتى اۋرۋحانانىڭ تراۆموتولوگيا بولىمىنە جىبەرىلەدى.
– ءبىزدىڭ عالىمدار لانگەتتەردىڭ ساپاسىن زەرتتەۋگە كىرىستى. ەگەر ءۇمىتىمىز اقتالسا، قازاقستاننىڭ تاجىريبەلىك مەديتسيناسىندا ۇلكەن جاڭالىق بولايىن دەپ تۇر. سەبەبى، ءبىزدىڭ پايىمداۋىمىزشا بۇل لانگەتتەردىڭ ءداستۇرلى گيپستەردەن ارتىقشىلىعى كوپ. ماسەلەن، بۇرىنعى داكەلەردىڭ سالماعى 1,5 كەلىگە دەيىن جەتەتىن بولسا، بۇل 50 گرامم عانا، بالالار ءۇشىن دە جەڭىل. تەرى دە ويىلمايدى. قول، اياق سۇيەكتەرى بەرىك تانىلادى، - دەيدى م.وسپانوۆ اتىنداعى بقمۋ پرورەكتورى سامات ساپارباەۆ.
دۋمان ارعىنگەلدى،
«ادىرنا» ۇلتتىق پورتالى
