8 قاڭتاردا نۇر-سۇلتاندا قازاقستان حالىق پارتياسىنىڭ ءباسپاسوز كونفەرەنتسياسى ءوتتى. بريفينگتى ۇيىمداستىرۋشىلار قحپ اتىنان پارلامەنت ءماجىلىسىنىڭ دەپۋتاتتىعىنا كانديداتتار مەن «URANkz» رقب وكىلدەرىن بىرىكتىرگەن «قىزىل اۆتوبۋس» اكتسياسىنىڭ قورىتىندىلارىمەن ءبولىستى.
بىرنەشە اي بويى، سونىڭ ىشىندە سايلاۋ الدىنداعى ۇگىت كەزەڭىندە قحپ اتىنان ءماجىلىس دەپۋتاتتىعىنا كانديداتتار جۋرناليستەرمەن جانە بلوگەرلەرمەن بىرگە ەلىمىزدىڭ وڭىرلەرىن ارالادى. «URANkz» قوزعالىسىنىڭ جانە پارتيانىڭ مۇشەلەرى قازاقستاننىڭ تۇكپىر-تۇكپىرىندە ادامداردىڭ قالاي ءومىر ءسۇرىپ جاتقانىن ءوز كوزدەرىمەن كوردى. ولار جەرگىلىكتى بيلىك تاراپىنان جىلدار بويى شەشىلمەگەن نەگىزگى پروبلەمالاردى انىقتادى.
– پروبلەمالار وتە كوپ جانە ولار ءار سالادا بار. اتقارۋشى بيلىككە قاتىستى كوپتەگەن ماسەلەلەر بار. نەگە ءبىزدىڭ ازاماتتار ءالى كۇنگە دەيىن ساپالى قىزمەت الا المايدى؟ تسيفرلاندىرۋ داۋىرىندە ادامدار ءالى كۇنگە دەيىن قۇدىقتاردان سۋ الىپ، پەش جاعۋدا، ايەلدەر مەن بالالار كومىر مەن وتىن تاسۋدا؟ كەيبىر اۋدانداردا بايلانىس جوق. ينتەرنەت تۋرالى ايتۋدىڭ قاجەتى دە جوق. حالىقتىڭ الەۋمەتتىك وسال توپتارىنان شىققان ءبىزدىڭ ازاماتتارىمىز مەملەكەتتىڭ ناقتى قولداۋىن سەزىنبەي وتىر، – دەپ پىكىر ءبىلدىردى قحپ اتىنان دەپۋتاتتىعىنا كانديدات فايزوللا كامەنوۆ.
وڭىرلەردى ارالاي وتىرىپ، اكتسياعا قاتىسۋشىلار شالعاي وڭىرلەر مەن اۋىلداردا پروبلەمالار وتە كوپ دەگەن قورىتىندىعا كەلدى. ولاردى مەملەكەتتىك دەڭگەيدە كوتەرىپ، پارلامەنتتە تالقىلاۋ قاجەت. سوندىقتان «قىزىل اۆتوبۋس» اكتسياسىن ۇيىمداستىرۋشىلار وڭىرلەردەگى جاعدايدى بارىنشا جاقسارتۋ ءۇشىن ءوز باستامالارى مەن جۇمىستارىن ودان ءارى ىلگەرىلەتۋگە نيەتتى.
– ءبىز جاقىندا «قىزىل اۆتوبۋس» اكتسياسى اياسىندا تايتوبە اۋىلىنا باردىق. ادامدار جاڭا جىلدى جارىقسىز قارسى الدى. بۇل ماسەلەنى جەرگىلىكتى اكىم تۋىنداعان ساتتە-اق شەشۋگە ءتيىس ەدى. كەيبىر تۇرعىندار ەلەكتر ەنەرگياسىن ءوز كۇشىمەن وندىرۋگە ءماجبۇر. ءبىرى كۇن باتارەيالارىن ورناتسا، ەندى ەلەكتر گەنەراتورلارىن پايدالانادى. ال قالعان تۇرعىندار كورشىلەرىنەن جارىق ساتىپ الادى. بۇل دۇرىس ەمەس، ارينە – دەدى دەپۋتاتتىققا كانديدات، «URANkz» قوزعالىسىنىڭ مۇشەسى سەرگەي رەشەتنيكوۆ.
بريفينگكە قاتىسۋشىلار وڭىرلەردەگى پروبلەمالارعا قاتىستى مىسالداردى كوپتەپ ايتۋعا بولاتىنىن اتاپ ءوتتى. قحپ وكىلدەرى قوعامدا پارتيا وكىلدەرىنە ايتىلعان بارلىق ۇسىنىستاردى قولدايتىنىنا سەنىم ءبىلدىردى. بۇل –قازاقستاننىڭ اۋماقتىق تۇتاستىعى، مەملەكەتتىك ءتىلدى دامىتۋ، ايەلدەر مەن بالالارعا قاتىستى تۇرمىستىق زورلىق-زومبىلىقتىڭ الدىن الۋ جانە ت. ب. جونىندەگى مالىمدەمەلەر.
