ءبىلىم جانە عىلىم ءمينيسترى اسحات ايماعامبەتوۆ زاڭعا جاڭا تۇزەتۋلەر ەنگىزدى، دەپ حابارلايدى «ادىرنا» ءتىلشىسى. ول بۇل تۋرالى Facebook جەلىسىندەگى رەسمي پاراقشاسىندا جازدى.
الداعى ۋاقىتتا ستۋدەنتتەردىڭ دۋالدى جۇيەسى ارقىلى ءبىلىم العان مەرزىمى ەڭبەك ءوتىلى رەتىندە ەسەپتەلەتىن بولادى. بۇل تۇلەكتەردىڭ جۇمىسقا ايتارلىقتاي تاجىريبەمەن ورنالاسۋ مۇمكىندىگىن ارتتىرادى.
سونداي-اق، بەكىتىلگەن زاڭناماعا سايكەس ۋاكىلەتتى ورگاننىڭ كوللەدجدەردە وقۋ مەرزىمدەرىن بەلگىلەۋى تۋرالى نورما الىنىپ تاستالدى.
«بۇعان دەيىن ءبىز ءار بىلىكتىلىكتەر بويىنشا ءبىلىم الۋ مەرزىمدەرىن قاتاڭ بەكىتەتىنبىز. ورتاشا ەسەپپەن العاندا، وقۋ مەرزىمى 2 جىلدان 3 جىل 10 ايعا دەيىن جالعاساتىن. ەندى وقۋ ۇزاقتىعى ناقتى ءبىلىم بەرۋ باعدارلاماسىنا جانە قاجەتتى وقۋ ناتيجەلەرىنە بايلانىستى بولادى. جاڭا وزگەرىستەرگە سايكەس كوللەدجدەر جۇمىس بەرۋشىلەرمەن كەلىسە وتىرىپ، كاسىپتىك ستاندارتتار نەمەسە نارىق تالاپتارى نەگىزىندە ءبىلىم بەرۋ باعدارلامالارىن ازىرلەيتىن بولادى. كەيىن ونى قر بعم باعدارلامالارىنىڭ تىزىلىمىنە قوسىپ، سوعان بايلانىستى كادرلار دايىندايدى. وسىلايشا، جۇمىسشى جانە ورتا بۋىن ماماندارىن دايارلاۋدا كوللەدجدەردىڭ يكەمدىلىگى ارتا تۇسەدى»،-دەدى مينيستر.
ايماعامبەتوۆ كوللەدج وكىلدەرى كوتەرگەن تاعى ءبىر ماسەلەنىڭ شەشىمىن تاپتى. ەندى كوللەدجدەر اقىلى نەگىزدە قىزمەت كورسەتىپ، وقۋ-وندىرىستىك شەبەرحانالاردا، شارۋاشىلىقتاردا، وقۋ پوليگوندارىندا دايىنداعان تاۋارلارىن ساتا الادى.
«دانەكەرلەۋ ءىسى» ماماندىعى بويىنشا وقيتىن ستۋدەنتتەر پراكتيكا كەزىندە تەمىردەن ساپالى كونسترۋكتسيالار جاسايدى، جاس كونديتەرلەر كەرەمەت ونىمدەر پىسىرەدى، قولونەر باعىتىنداعى ماماندىقتارى بويىنشا وقيتىن ستۋدەنتتەر كيىزدەن، كەراميكادان، اعاشتان، بىلعارىدان، زەرگەرلىك بۇيىمداردان اۆتورلىق بۇيىمدار دايىندايدى. بىراق ونىڭ ءبارىن ساتا المايتىن. ەندى ولار ءوز قولىمەن دايىنداعان ونىمدەرىن (جۇمىستارىن، قىزمەتتەرىن) ساتا الادى جانە تۇسكەن تابىس ەسەبىنەن شەبەرحانالار ءۇشىن قوسىمشا شىعىن ماتەريالدارىن ساتىپ الۋىنا بولادى. وقۋ تاجىريبەسى كەزىندە ستۋدەنتتەر دايىنداعان ونىمدەردى ساتۋعا رۇقسات بەرۋ ارقىلى وندىرىستىك وقىتۋدىڭ ساپاسىن ارتتىرۋعا بولادى. تۇتاستاي العاندا، مۇنى كادرلاردى دايارلاۋ ساپاسىن ارتتىرۋ ءۇشىن جاسالعان ىنتالاندىرۋ رەتىندە دە قاراستىرۋعا بولادى”،-دەپ ءسوزىن تولىقتىردى ول.
«ادىرنا» ۇلتتىق پورتالى
