قارجى پيراميداسىن قۇرىپ، 152 جابىرلەنۋشىدەن 90 ملن-نان استام قارجى جىمقىرعان الاياق سوتتالدى، دەپ حابارلايدى «ادىرنا» ءتىلشىسى ىشكى ىستەر مينيسترلىگىنە سىلتەمە جاساپ.
قىزىلوردا قالالىق پوليتسيا باسقارماسىنىڭ تەرگەۋ ءبولىمىنىڭ تەرگەۋشىسى نۇرماعانبەت نۇربولدىڭ شەبەرلىگىنىڭ جانە كۇردەلى جۇمىستارىنىڭ ناتيجەسىندە 1982 جىلى تۋىلعان، جۇمىسسىز، بۇرىن سوتتى بولعان ايەل ازاماتشا ۇستالدى. ول قارجى پيراميداسىن قۇرۋ ارقىلى 152 ازاماتتان 91 ميلليون 496 مىڭ تەڭگەدەن استام قارجىنى قولدى ەتكەن.
كەلەڭسىز وقيعا 2019 جىلدىڭ تامىز ايىنان باستاۋ الدى. ول “WhatsApp” جەلىسىندە “اي-شۋاق” توبىن اشىپ، قارجىلىق (ينۆەستيتسيالىق) پيراميدا قۇرىپ، وعان باسشىلىق جاساعان. توپقا قوسىلعان ءبىرىنشى قاتىسۋشىلار العاشقى سالىمدارىن سالىپ، 40 پايىز ۇستەمەسىمەن ءوز قاراجاتتارىن قايتارىپ الىپ وتىرعانى بەلگىلى بولدى. جالپى اينالىمداعى قارجى 1 ملرد 695 ملن 538 مىڭ تەڭگەنى قۇراعان. ۋاقىت وتە كەلە، ارتىنان كىرگەن پيراميدا قاتىسۋشىلارىنا، قۇر ۋادە ءۇيىپ-توگىپ، كوزدەن تاسا بولعان.
وسى اتالعان دەرەك بويىنشا قازاقستان رەسپۋبليكاسىنىڭ قىلمىستىق كودەكسىنىڭ 217-بابىنىڭ 3-بولىگىنىڭ 2-تارماعىمەن (قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ، اسا ءىرى مولشەردە اقشانى نەمەسە وزگە مۇلىكتى تارتا وتىرىپ جاسالعان) سوتقا دەيىنگى تەرگەپ-تەكسەرۋ امالدارى جۇرگىزىلدى.
قىزىلوردا قالالىق سوتىنىڭ شەشىمىمەن ايىپتالۋشى بەس جىلعا باس بوستاندىعىنان ايىرىلدى.
«ادىرنا» ۇلتتىق پورتالى
