ءتاۋ ەتۋشىلەردەن سىز وتپەسىن دەپ
الماتى وبلىسى، ىلە اۋدانى، پوكروۆكا اۋىلىنداعى المەرەك بابا كەسەنەسىنە ءتاۋ ەتىپ كەلۋشىلەرگە ارناپ قۇران وقيتىن ورىن بوي كوتەردى.
المەرەك جانشىقۇلىنىڭ بالاسى جانىبەكتىڭ ۇرپاقتارى قاراجات جيناپ، قۇران وقيتىن نىساندى سالدى. قۇرىلىس نىسانىن سالۋعا 5 ميلليون تەڭگە كولەمىندە قاراجات جۇمسالدى. قاجەتتى قاراجاتتى جيناۋدا اتىمتاي-جومارت ازاماتتار الماسبەك نوكەربانۇلى مەن دانيار ىسقاقۇلى ارقايسى 500 مىڭ تەڭگەدەن اقشالارىن قوسىپ، وراسان كومەك جاسادى.
ىنتىماق پەن بىرلىكتىڭ ارقاسىندا المەرەكۇلى جانىبەك باتىردىڭ ۇرپاقتارى وسىناۋ قاراجاتتى جيناپ، مەجەلى مەرزىمدە قۇران وقيتىن ورىن بوي كوتەردى.
ء"بىزدىڭ جوسپارىمىز بويىنشا قۇرىلىس بىلتىرعى جىلدىڭ ناۋرىز ايىندا باستالىپ، مامىردا اياقتالۋى ءتيىس ەدى. وعان كولدەنەڭ كيلىككەن پاندەميانىڭ پارمەنى قولبايلاۋ بولدى. بۇرىندارى اسىرەسە كۇزدىڭ قارا سۋىعى قارلى قىسقا ۇلاسقان مەزگىلدە المەرەك بابامىزدىڭ باسىنا كەلىپ قۇران وقۋشىلاردىڭ تابانىنان سىز ءوتىپ، دىردەك قاعىپ جاۋرايتىن ەدى. ەندى مىنە ەرجان كاكەنوۆ، جانات قاسىموۆ باسقاراتىن "توو پروفي پگس" قۇرىلىس كومپانياسىنىڭ جىگىتتەرى جىپ-جىلى ورىندى دەر ۋاقىتىندا سالىپ بەردى. جىلدىڭ ءتورت مەزگىلىندە دە بابامىزدىڭ باسىنا ءتاۋ ەتىپ كەلۋشىلەردىڭ قاتارى سيرەگەن ەمەس. سوندىقتان دا وسىنداي قۇران وقيتىن ورىن قاجەت بولعاندىقتان شارۋانى قولعا الدىق" دەيدى "المەرەك بابا" مادەني-تاريحي قوعامدىق قورىنىڭ ديرەكتورى ىسقاق ءمولدالىمۇلى.
المەرەك بابانىڭ كەسەنەسى ماڭىندا كەلەشەكتە بۇدان وزگە وسىنداي كوپتىڭ يگىلىگىنە ارنالعان نىساندار بوي كوتەرمەك. ابىز بابادان تاراعان ۇرپاقتارى كەلەشەكتە كەشەننىڭ اينالاسىن اباتتاندىرىپ، كەلۋشىلەردىڭ قاجەتتىلىگىن وتەيتىن تاعى بىرنەشە نىساندى سالادى.
ىلگەرىدە كوكشەتاۋلىق كاسىپكەر "Newton edu" كومپانياسىنىڭ ديرەكتورى ماقسات جامانكارين المەرەك ابىز كەسەنەسىنىڭ اينالاسىنا جارىق جەلىسىن تارتىپ، شامدارىن ورناتىپ سامالاداي جارقىراتىپ، كوپتىڭ العىسىن العان ەدى. باتىر، اۋليە، ابىز اتانعان بابانىڭ كەسەنەسى ماڭىنداعى بۇلاقتان سۋ الۋشىلار ءۇشىن دە جارىق جەلىسىنىڭ تارتىلۋىنا كوپشىلىك العىسىن جاۋدىردى.
ق.راحمەت
